IFYO TWINGACITA PA KULEKA UKUBA NO LUPATO

3 | Mwilatontonkanya pa Lupato

Ifyo Baibolo Ilanda:

“Mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.”—ABENA ROMA 12:2.

Umo aya Mashiwi Yalola:

Lesa alibikako sana amano ku fyo tutontonkanya. (Yeremia 17:10) Tatufwile ukupelela fye pa kukanacita nelyo ukukanalanda ifintu ifingalanga ukuti twaliba no lupato, lelo tatulingile no kulatontonkanyapo. Kanshi nga kuli ifili fyonse ifyo tuletontonkanya ifingalenga twaba no lupato tufwile ukuleka ukutontonkanyapo ilyo line fye. Nga tulecita ifi kuti twa-aluka no kuleka ukuba no lupato.

Ifyo Mwingacita

Tontonkanyeni pa fyo mumfwa nga mwamona umuntu uwa ku calo cimbi nelyo uwapusana na imwe inkanda. Ipusheni amuti bushe mona shani abantu ba musango uyu? Bushe icilenga ndeumfwa ifi, fintu naishiba pali bena nelyo fintu naumfwa fye? Nelyo naliba fye na kapaatulula. Mwilatamba amafilimu nelyo ukubelenga ifitabo pa intaneti umuba sana ulupato e lyo no bunkalwe.

Icebo ca kwa Lesa kuti catwafwa ukwishiba “amatontonkanyo na mapange ya mutima.”

Kwena taca-anguka ukuipusha aya mepusho e lyo no kwasuka ifyasuko mu bufumacumi. Lelo Icebo ca kwa Lesa kuti catwafwa ukwishiba “amatontonkanyo na mapange ya mutima.” (AbaHebere 4:12) Kanshi muletontonkanya sana pa fyaba mu Baibolo. Mulelinganya ifyo Baibolo isambilisha ku fyo mutontonkanya. Kabili mulebombesha pa kuti ifyo mutontonkanya filelingana ne fyo Baibolo isambilisha. Icebo ca kwa Lesa kuti calenga twaleka ukutontonkanya pa fili fyonse ifilenga tuleba no lupato.—2 Abena Korinti 10:4, 5.

Ifyo Bamo Bashimike—BA STEPHEN

Balyalwike mu fyo Baletontonkanya

Ba Stephen e lyo na ba mu lupwa lwabo balibapatile sana ku basungu kabili ici calengele ba Stephen baingila mu kalibumba ka fikansa fya calo akalelwisha insambu sha bantu. Mu kuya kwa nshita balitendeke ukusansa abantu abalefuma ku fyalo fimbi. Ba Stephen batile: “Bushiku bumo twatambile filimu iyalelanda pa fyo abasha abafumine ku Africa balebacusha mu America. Apo muli iyi filimu abasungu balecusha sana abasha, twatendeke ukupuma abasungu abaishile mu kutamba filimu. Lyena twaile pa mayanda apaleikala abasungu mu kubapuma.”

Lelo ba Stephen balyalwike mu fyo baletontonkanya ilyo batendeke ukusambilila Baibolo ne Nte sha kwa Yehova. Batile: “Nalesangwa sana na bantu abali na kapaatulula ka mushobo, lelo ba Nte bena te fyo bali. Ku ca kumwenako, ilyo Nte umusungu aile ku calo cimbi ashiile abana bakwe ku lupwa lwa bantu abafiita ukuti balebasakamana. Na kabili umusungu alisendele umulumendo uwafiita uushakwete ukwakwikala ukuti aleikala nankwe.” Ba Stephen balishininkishe ukuti Inte sha kwa Yehova balitemwana kabili ici calengele bashininkishe amashiwi Yesu alandile aya kuti abasambi ba cine bali no kulatemwana.—Yohane 13:35.

Cinshi calengele ba Stephen baleke ukuba abankalwe e lyo baleke no kupata abantu? Amashiwi yaba pa bena Abena Roma 12:2 yalibafwile. Batile: “Nailwike ukuti mfwile ukuleka ukucita ifyabipa. Nalyalwike pa kuti ndeumfwana na bantu kabili nalimwene ukuti imikalile yali no kuba bwino.” Napapita imyaka 40 ukutula apo ba Stephen balekeele ukucita ubunkalwe no kupata abantu kabili balekala mu mutende na bantu.