IFYO TWINGACITA PA KULEKA UKUBA NO LUPATO

2 | Mwilalandula

Ifyo Baibolo Ilanda:

“Mwilabwesesha ububi pa bubi. . . . Mule-esha na maka yenu yonse ukuba aba mutende ku bantu bonse. Mwe batemwikwa, mwilalandula, . . . pantu calembwa ati: “Nine mfwile ukulandula; nine nkabweseshapo pa fibi ifyo bacita, e fyasosa Yehova.””—ABENA ROMA 12:17-19.

Umo aya Mashiwi Yalola

Nangu ca kuti mu cifyalilwa fye tulomfwa ububi nga batukalifya, Lesa tafwaya ukuti tulelandula. Lelo atweba ukuti tuletekanya no kulolela pali ena pantu nomba line fye ali no kuleta umulinganya.—Amalumbo 37:7, 10.

Ifyo Mwingacita

Nga tulelandula ulupato lulaya lulekulilako. Kanshi nga ca kuti umuntu amukalifya nelyo amucita icabipa mwilalandula. Muleilama kabili mulecita ifingaleta umutende. Inshita shimo cilawama no kusuulako fye ku fyo batukalifya. (Amapinda 19:11) Limo kuti mwaebako bambi ifyacitike. Ku ca kumwenako nalimo ifyacitike kuti fyalenga mwasalapo ukwebako bakapokola nelyo aba buteko bambi.

Nga mwatwalilila fye ukulandula ulupato te kuti lupwe.

Inga ca kuti mulemona ukuti tapali ifyo mwingacitapo pa kupwisha ubwafya, nelyo nga ca kuti mwalicita fyonse ifyo mwalemona ukuti nalimo e fingapwisha ubwafya lelo tafilebomba? Na lyo line tamufwile ukulandula, pantu nga mwalandula ifintu kuti fyabipilako. Mu kuya kwa nshita ulupato kuti lwasuka lwapwa. Mulecetekela ifyo Yehova acita pa kupwisha amafya. “Mutetekele, na o akabombelapo.”—Amalumbo 37:3-5.

Ifyo Bamo Bashimike—BA ADRIÁN

Ifyo Bacitile pa Kuleka Ukulalandula

Ilyo ba Adrián bali abalumendo bali sana no lubuli kabili balefwaya ukulandula onse uwabacitilepo ifyabipa. Batile: “Ilingi nalelwa sana ne mfuti mu misebo, kabili ilingi line balenguma ica kuti umubili onse waleba fye umulopa kabili naleshala fye impondo.”

Ba Adrián batendeke ukusambilila Baibolo ilyo bali ne myaka 16. Balandile ukuti: “Ilyo natendeke ukumfwikisha ifyo nalesambilila mu Baibolo namwene ukuti mfwile ukwalula imibele yandi.” Ba Adrián balingile ukuleka ukulwa e lyo no kuba no lupato. Balitemenwe sana ifyo basambilile pe lembo lya Abena Roma 12:17-19 ukuti tabalingile ukulalandula. Balandile ukuti: “Naishile ishiba ukuti mu nshita yakwe Yehova akalandula abantu ababa no lufyengo kabili panono panono nalilekele ukuba umunkalwe.

Bushiku bumo icungulo bushiku ba Adrián balibasanshile ku fipondo ifyo balelwa na fyo ilyo bashilatendeka ukusambilila Baibolo. Uwali intungulushi yabo apundile ati: “Ipokolole!” Ba Adrián batile: “Nalifwaile ukulandula.” Lelo mu cifulo ca kulandula ba Adrián balipepele kuli Yehova no kufumako.

Ba Adrián batile: “Ubushiku bwakonkelepo nalikumenye uwali intungulushi ya muli lilya ibumba ninshi ali fye eka. Nalifwaile ukulandula lelo na kabili nalipepele mu mutima kuli Yehova ukuti angafwe ukuilama. Icampapwishe ca kuti ulya mulumendo aishilenjeba ati, ‘unjeleleko pali filya twacitile ubushiku bwafumineko.’ Naine ndefwaya ukulasambilila Baibolo pa kuti nkabe nga iwe.’ Nalitemenwe pa fyo nailamine ne cawamishe ca kuti nalitendeke ukusambilila Baibolo nankwe.”