Ulupato Kuti Twalucimfya!

Nga tabamupatapo nalimo mwalimonapo ulupato mu nshila ishalekanalekana. Tulomfwa no kutamba ama lipoti pa milabasa umo balanda ifyo abantu bacusha abafuma ku fyalo fimbi, abo bapusana nabo inkanda nelyo abaume abalaala na baume banabo nelyo abanakashi abalaala na banakashi banabo. Ici calilenga amabuteko ayengi ukubikako ifunde lya kukanda umuntu uwaba no lupato.

Abantu abacula pa mulandu wa kuti balibapata, na bo balapata abantu bambi. Abantu abo bapata ilingi line balafwaya ukulandula, ne ci cilenga abantu batwalilila ukulapatana.

Abantu balikwata akapaatulula, balatiinya abanabo, e lyo fye no kubatuka. Bushe na imwe ifi fyalimucitikilapo? Ulupato nga lwatwalilila lulalenga abantu baba no bunkalwe, balacita ulubuli, balaonaula ifipe fya buteko, balacenda abaume nelyo abanakashi, balaipaya abanabo e lyo no kwipaya fye abantu abafuma ku fyalo fimbi nelyo aba mushobo umbi.

Ino magazini yala-asuka amepusho yali pe samba kabili yalalenga twishibe ifyo twingacimfya ulupato:

• Mulandu nshi abantu babela sana no lupato?

• Finshi twingacita pa kuti twilaaba no lupato?

• Bushe kukabako inshita ilyo kushakabe ulupato umuyayaya?