Inshita Ilyo Kushakabe Ulupato!
Nangu ifwe twingaleka ukuba no lupato, abantu bambi bena kuti batwalilila ukuba no lupato. Abantu abakaele balabapata. Kanshi cinshi cingalenga abantu bonse baleka ukupatana?
Yehova Lesa fye e wakwata amaka ya kufumyapo ulupato kabili ifi e fyo Baibolo yatulaya ukuti e fyo akacita.—Amapinda 20:22.
LESA AKAFUMYAPO FYONSE IFILENGA ABANTU BABA NO LUPATO
1. SATANA KASEBAANYA. Satana malaika wapondweke, e ulenga abantu baba no lupato. Lesa akonaula Satana e lyo na bonse abapata abantu banabo.—Amalumbo 37:38; Abena Roma 16:20.
2. ICALO CABIPA ICA KWA SATANA. Lesa akafumyapo ifyabipa ificitika muli cino calo, ukubikako na ba mu fikansa fya calo abacita amafisakanwa e lyo ne ntungulushi sha mapepo ishilenga abantu bapatana. Lesa akonaula abantu abacita amakwebo ababa no bufunushi kabili abaliila abantu banabo amasuku pa mutwe.—2 Petro 3:13.
3. UKUKANAPWILILIKA. Baibolo ilondolola ukuti fwe bantunse twalipyana ulubembu, kanshi tulatontonkanya e lyo no kucita ifyabipa. (Abena Roma 5:12) Cimo icilanga ukuti tatwapwililika ni filya tupata umuntu e lyo no kucita ifilanga ukuti twalimupata. Lesa fye e ukafumyapo fyonse ifi pa kuti ulupato lukapwe.—Esaya 54:13.
BAIBOLO YALITULAYA ICALO UMUSHAKABE ULUPATO
1. ABANTU TABAKALEFYENGWA. Ubufumu bwa kwa Lesa ubukalatekela ku muulu e bukalateka isonde. (Daniele 2:44) Kabili bukaleta umulinganya pe sonde. Lesa akafumyapo akapatulula e lyo no lufyengo kabili akaleta umulinganya.—Luka 18:7.
2. ABANTU BONSE BAKALAIKALA MU MUTENDE. Abantu tabakalecula pa mulandu wa bunkalwe e lyo ne nkondo. (Amalumbo 46:9) Pe sonde pakaba umutende pantu abantu abakabapo bantu aba mutende.—Amalumbo 72:7.
3. ABANTU BONSE BAKALAIKALA BWINO. Abakalaikala pe sonde bakaba abatemwana. (Mateo 22:39) Abantu tabakalecula nelyo ukutontonkanya pa fyabipa ifyacitike kale. (Esaya 65:17) Pali iyo inshita, abantu bonse “bakasekelela nga nshi pantu umutende ukafula.”—Amalumbo 37:11.
Bushe mulafwaisha ukwikala mu calo ca musango yu? Na muno nshiku, abantu balasambilila amashinte ya mafunde ya mu Baibolo pa kuti bengaleka ukuba no lupato. (Amalumbo 37:8) Ifi fine e fyo Inte sha kwa Yehova mwi sonde lyonse bacita. Nangu ca kuti baba ne nkulilo ishalekanalekana kabili bakonka intambi ishapusanapusana, balitemwana kabili balikatana.—Esaya 2:2-4.
Inte sha kwa Yehova kuti batemwa ukumwebako ifyo basambilila pa fyo mwingacita nga ca kuti bamufyenga. Ifyo mwingasambilila kuti fyalenga mwaleka ukuba no lupato kabili mwaba no kutemwa. Kuti mwasambilila ifyo mwingalalanga ukutemwa na ku bantu abashitasha e lyo na kubamoneka ukuti balimupata. Nga mulecita ifi, mukaba sana ne nsansa kabili bucibusa na banenu bukalakoselako. Kabili mukeshiba ne fyo mukalaikala mu Bufumu bwa kwa Lesa umushakabe ulupato.—Amalumbo 37:29.