Inkondo ya ku Ukraine Yaingila mu Mwaka Walenga Bubili—Finshi Baibo Yalandapo?

Pali Cisano pa 24 February 2023, e po umwaka wakumene ukutula apo inkondo ku Ukraine yatendekele. Ukulingana na malipoti yamo, abashilika abena Ukraine na bena Russia nalimo 300,000 balifwa nelyo ukucenekwa, kabili abantu nalimo 30,000 balifwa pa mulandu wa iyi nkondo. Na lyo line impendwa ya bantu abafwa nelyo ukucenekwa nalimo yalicila na pali iyi twalandapo.

Ku ca bulanda, cilemoneka kwati iyi nkondo tayakapwe bwangu.

• “Umwaka nalimo naupwa ukutula apo abashilika abena Russia baingilile mu Ukraine, lelo tapali ifilelangilila ukuti inkondo kuti yapwa bwangu. Tapali ifilelanga no kuti pali abakacimfya abanabo muli iyi nkondo. Kabili tapali ifilelanga ukuti ifi fyalo fibili fikasuminishanya ukuti fileke ukulwa.”—NPR (National Public Radio), February 19, 2023

Abantu abengi bali no bulanda sana pa mulandu wa kuti iyi nkondo ne nkondo shimbi fyalilenga abantu abakaele balacula mwi sonde lyonse. Finshi Baibo Yalandapo? Bushe inkondo shikatala ashipwa?

Inkondo iikapwisha inkondo shonse

Baibo yalilanda pa nkondo iikapususha abantu, te kubalofya iyo. Iyi nkondo ni nkondo ya Armagedone, Baibo ilanda ukuti iyi ni “nkondo ya bushiku bukalamba ubwa kwa Lesa Wa Maka Yonse.” (Ukusokolola 16:14, 16) Lesa akabomfya iyi nkondo pa kufumyapo amabuteko ya bantunse ayalenga kuleba inkondo. Pa kuti mwishibe ifyo inkondo ya Armagedone ikalenga mu calo mukabe umutende, belengeni ifipande fyakonkapo:

• “Bushe Inkondo ya Armagedone Cinshi?”

• “Tulafwaisha Ukuti Armagedone Ikese!”