Mulandu Nshi Ulupato Lufuliile?—Finshi Baibo Yalandapo?

Muno nshiku, mu malyashi ya pa milabasa ififulamo sana milandile ya musalula, abantu ukucita ifyabipa ku banabo pa mulandu wa lupato, ukucita ulukakaala ku banabo pa mulandu wa kuti bafuma ku calo cimbi, e lyo ne nkondo.

• “Abantu balelanda sana ifyabipa pa intaneti pa mulandu no kulwishanya ukuli pa kati ka calo ca Israel e lyo na Gaza.”—E fyalandile The New York Times, iya pa November 15, 2023.

• “Ukutula pa 7 October, abantu mwi sonde baliba sana na masakamika pa mulandu wa lupato ulwile lulefulilako, pa fyo abantu balelanda ifyabipa na pa fyo abantu balecita ulukakaala.”—E fyalandile ba Dennis Francis, ba president ba kabungwe ka United Nations General Assembly, pa November 3, 2023.

Imilandile ya musalula, ulukakaala e lyo ne nkondo kale fyatendeka. Na kuba Baibo yalilandapo pa bantu “abaletoonta imifwi yabo, e kutila amashiwi ayakali” kabili abaletungilila inkondo ne fimfulunganya. (Amalumbo 64:3; 120:7; 140:1) Na lyo line Baibo yalilandapo ukuti ulupato tumona muno nshiku kwaliba icalenga lubeko.

Ulupato—Cishibilo ca nshiku tuleikalamo

Baibo yalilanda pa milandu ibili iyalenga ulupato lufule muno nshiku.

1. 1. Baibo yalisobeele ukuti “ukutemwa kwa bengi kukacepa.” (Mateo 24:12) Mu nshita ya kuti baletemwana, abantu baliba ne mibele iilenga balapata abantu banabo.—2 Timote 3:1-5.

2. 2. Icalenga ulupato ulo tumona muno nshiku lufule sana ni co Satana Kaseebanya e utungulula cino calo. Baibo ilanda ukuti “icalo conse calaala mu maka ya mubifi.”—1 Yohane 5:19; Ukusokolola 12:9, 12.

Na kabili, Baibo yalilanda ukuti nomba line Lesa ali no kufumyapo fyonse ifilenga kuleba ulupato. Ne cacilapo ca kuti, akafumyapo no kucula konse uko ulupato luleta. Baibo yalilaya ukuti:

• Lesa “akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:4.