Pa muulu ku kuso: Marek M. Berezowski/Anadolu Agency via Getty Images; pa nshi ku kuso: Halfpoint Images/Moment via Getty Images; pa kati: Zhai Yujia/China News Service/VCG via Getty Images; pa muulu ku kulyo: Ismail Sen/Anadolu Agency via Getty Images; pa nshi ku kulyo: E+/taseffski/via Getty Images
MULELOLA!
Mu Mwaka wa 2023 Mwali Amasakamika Ayengi—Finshi Baibo Yalandapo?
Ifyacitike mu mwaka wa 2023 mwi sonde lyonse, fyalelangilila ubushininkisho bwa fyo Baibo ilanda ukuti tuleikala “mu nshiku sha kulekelesha” (2 Timote 3:1) Moneni ifyo ifilecitika mwi sonde filefikilisha ifyo Baibo yasobele ukuti e fikalacitika muno nshiku.
Ifyo Baibo yalanda ne filecitika mwi sonde
“Inkondo mupepi no kutali.”—Mateo 24:6.
“Ulukaakala luleya lulefulilako fye mu fyalo ifingi.”a
Moneni icipande citila “Nani Akacingilila Abantu Bakaele Abashilwako Inkondo?” ne citila “World Military Spending Surpasses $2 Trillion.”
“Ifinkukuma mumo mumo”—Marko 13:8.
“Ukutula apo umwaka wa 2023 watendekele, kwalipita ifinkukuma ifikalamba ukufika kuli 13 mwi sonde lyonse, takwatala ukubapo ifinkukuma fyafule fi mu mwaka umo ukutula apo twatendekela ukusunga ifipendo fya finkukuma.”b
Moneni icipande citila “Icinkukuma Calipita mu Turkey na mu Syria.”
“Ifya kutiinya”—Luka 21:11.
“Mu nshiku sha fumako isonde lyalekaba sana nomba pali ino nshita kuti twatila lilekaba ukucila mu cipimo nelyo lilebilauka.”—E fyalandile ba António Guterres ba UN secretary-general.c
Moneni icipande citila “Umwela Uwakabisha uwa mu Lusuba mwi Sonde Lyonse mu 2023.”
“Ifipowe”—Mateo 24:7.
“2023, mwaka umwali sana insala mwi sonde fye lyonse kabili abantu abengi balishupikwa sana pa kusakamana indupwa shabo.”d
Moneni icipande citila “Ukucepa kwa fya Kulya mwi Sonde Lyonse pa Mulandu wa Nkondo no Kwaluka kwa Miceele.”
“Inshita ishayafya nga nshi.”—2 Timote 3:1.
“Mwi sonde fye lyonse pa bantu 8 umo ninshi alilwala ubulwele bwa matontonkanya.”e
Moneni icipande citila “Imisepela Abengi Balelwala Sana Amalwele ya Matontonkanyo.”
Finshi tule-enekela mu 2024?
Kwena tapali nangu umo uwingeshiba ifikacitika mu 2024. Lelo ifilecitika mwi sonde filelangilila ukuti nomba line Ubufumu bwa kwa Lesa nelyo ubuteko bwa ku muulu, buli no kufumyapo amabuteko ya bantu kabili bukafumyapo na fyonse ifilenga abantu balecula no kusakamikwa.—Daniele 2:44; Ukusokolola 21:4.
Lelo pali ino nshita, nga twasakamikwa kuti twacetekela ukuti Lesa alatwafwa. Baibo itila:
“Ubushiku bonse ubo nkomfwamo umwenso, nkamutetekela.”—Amalumbo 56:3.
Kuti twalanga shani ukuti twalicetekela Lesa? Tulemukoselesha ukusambilila na fimbi pa fyo Baibo yalaya pa fyo tukalaikala ukwabula ukucula ku ntanshi. Tendekeni ukusambilila Baibo ukwabula ukulipila, pa kuti mumone ifyo imwe no lupwa lwenu mwinganonkelamo mu malayo ayo Baibo yatulaya.
a Ifilecitika mu calo, “Mwi sonde muli inkondo: Cinshi cilengele ukuti mwi sonde mube sana ifimfulunganya?” E fyaipwishe ba Emma Beals na ba Peter Salisbury, October 30, 2023.
b Ilyashi pa Finkukuma, “Umwaka wa 2023: E Mwali Ifinkukuma Ifingi Ukutula apo Twatendekela Ukusunga ifipendo fya Finkukuma,” May, 2023.
c Amashiwi ya Kwiswila Ayalandile ba Secretary-General ba Kabungwe ka United Nations, pa ku Kumana Ukwaliko pa July 27, 2023 Ukwalelanda pa Kwaluka kwa miceele.
d Akabungwe ka World Food Programme, “Ifya Kulya mwi Sonde Ukwafya.”
e Akabungwe ka World Health Organization, “Ubushiku bwa Kulanda pa fyo Abantu Balelwala Amatontonkanya,”October 10, 2023.