Finshi Fyalenga Abantu Belacindika Abantu Banabo?—Finshi Baibo Yalandapo?

Bantu fye abanono e bacita ifilanga ukuti balicindika abantu banabo. Abalwele bamo balasasukila badokota; abangalila abantu umo bashitisha ifya kulya abashaba no mucinshi balapaatila ababomfi abapekanishisha abantu ifya kulya; bamo abanina indeke balacusha abafwilisha abantu ifyo balekabila mu ndeke; abana abashakwata umucinshi balatumfya, ukutiinya nelyo ukusansa bakafundisha; intungulushi sha fikansa fya calo shilacita ifimfulunganya e lyo shimbi nasho shilailanga kwati shaliba bwino sana.

Baibo e ilondolola fye bwino imibele iyo umuntu afwile ukukwata. Yalilanda ne calenga ukuti abantu belacindika abantu banabo muno nshiku.

Finshi fyalenga abantu belacindika abantu banabo?

Abantu abengi mwi sonde lyonse balileka ukucindika abantu banabo kabili balileka ukuba ne mibele iisuma.

• Ukulingana no kufwailisha kumo ukwa nomba line, abantu mu America baliba ne mibele iyabipa sana ukucila ifyo bali imyaka 22 ku numa.

• Mu kufwailisha na kumbi uko bacitile ku bantu ukucila pali 32,000 mu fyalo 28, abantu ukucila pali hafu balandile ukuti tababala abamonapo abantu ukuba ne mibele iyabipa nge fyo bali pali ino nshita.

Baibo yalisobeele pa mibele iyo abantu bakwata pali ino inshita.

• “Lelo ishibe ci, ukuti mu nshiku sha kulekelesha mukesaba inshita ishayafya. Pantu abantu bakaba abaitemwa, abatemwe ndalama, aba mataki, aba miya, aba miponto, aba bucintomfwa ku bafyashi, abashitotela, . . . ababulo kuiteka, [kabili] abankalwe.”—2 Timote 3:1-3, United Bible Societies.

Pa kuti mwishibilepo na fimbi pa fyo ubu ubusesemo bulefikilishiwa, belengeni icipande citila “Did the Bible Predict the Way People Think and Act Today?”

Icingatwafwa ukuba ne mibele iisuma

Nangu ca kuti mu calo tamwaba imibele iisuma, abengi basanga ukuti Baibo ilaafwa sana abantu ukuba ne mibele iisuma. Ifyebo fyabamo ‘lyonse filacetekelwa kabili fya muyayaya.’ (Amalumbo 111:8) Moneni ifya kumwenako fimo:

• Ifyo Baibo ilanda: “Fyonse ifyo mufwaya abantu ukuti balemucitila, e fyo na imwe mulebacitila.”—Mateo 7:12.

  Umo ili ilembo lyalola: Tufwile ukuba ne cikuuku ku bantu no kulabacindika nga filya fine na ifwe tufwaya abantu ukuba kuli ifwe.

• Ifyo Baibo ilanda: “Nomba apo mwalipoosa ubufi, mulelanshanya icine.”—Abena Efese 4:25.

  Umo ili ilembo lyalola: Tufwile ukuba aba cishinka muli fyonse ifyo tulanda ne fyo tucita.

Nga mulefwaya ukwishibilapo na fimbi pali ili lyashi, belengeni:

• Ulupungu lwa kwa Kalinda ulutila “Cinshi Cingamwafwa—Ukulasala Bwino Ifya Kucita.”

• Ne cipande citila “Tolerance—How the Bible Can Help.