Abateuluka, Nalyo Line Abakakatila ku Fipimo fya Bulesa

“ABANTU abasuminisho kuilumbulwila tabaatumpa iyo, kabili abantu abatumpa tabasuminisha ukuilumbulwila nakalya,” e fisosa ipinda lya ciChinese limo. Mwalibamo icine muli ili pinda, apantu ukusuminisha ukuilumbulwila kwaliba kusonsomba, ukufwaya ukwikatilila ku fipimo fyalinga ifya myendele. Lelo bushe ni ku fipimo nshi fintu tulingile ukwikatilila? Bushe te kuti cibemo ukupelulula ukukonka ifipimo ifyaimika Kalenga wa mutundu wa muntu, nga fintu fyalondololwa mu Cebo cakwe, Baibolo wa Mushilo? Lesa umwine alemika ica kumwenako cawamisha ukukuma ku kusunga ifipimo fyakwe.

Kabumba—Ica Kumwenako Cesu Icakulisha

Lesa Wa maka yonse, Yehova, alibo washikatala nga nshi mu kusuminisha ukuilumbulwila, ukukanacishamo kabili ukukanakwata fye ukunono nga nshi. Pa makana na makana aya myaka, alisuminisha abasaalule shina lyakwe, ababotelesha umutundu wa muntu, no konaule sonde. Umutumwa Paulo alembele, nga fintu calembwa pa Abena Roma 9:22, ukuti Lesa “[asuminishe, NW] no kutekanya ukwingi ku fipe fya bukali ifyapekaniwa ku kulola ku boni.” Mulandu nshi Lesa abela uusuminisho kuilumbulwila pa nshita ntali ifyo? Pa mulandu wa kuti ukusuminisha kwakwe ukwa kuilumbulwila kwaliba ne mifwaile.

Lesa alibo watekanya ku mutundu wa muntu “pa kukanafwayo muntu ukonaika, lelo onse ukulola ku kulapila.” (2 Petro 3:9) Kabumba alipeela umutundu wa muntu Baibolo kabili alituma ababomfi bakwe ukwishibisha ifipimo fyakwe pa lwa myendele konse konse. Abena Kristu ba cine balekatilila kuli ifi fipimo. Lelo bushe ici cilepilibula ukuti ababomfi ba kwa Lesa bali no kuba abaumina kumo mu mibele yonse?

Abashangila, Nalyo Line Abateuluka

Yesu Kristu akoseleshe abalefwaya ubumi bwa muyayaya ‘ukwingila pa mpongolo ya kamfyemfye.’ Lelo ukwingila pa mpongolo ya kamfyemfye takupilibulo kuba abaumina kumo. Nga ca kuti twalemenena ku kutekela ku muunga we fwafwa nelyo ukupampamina fye pali cimo lintu tuli na bambi, mu kushininkisha cili no kulenga ubumi ukuba ubwawaminako kuli bonse abalipo nga ca kuti twacimfya uku kukongama. Lelo mu nshila nshi?—Mateo 7:13; 1 Petro 4:15.

Theofano, umusambi wa ciGriki uwalondolwele ukuti inshita apoosele ukuba na bantu ba fikulilo fyapusanapusana yamulengele ukubomfwikisha bwino, atile: “Caliba icakatama ukuti twaesha ukubombela mu nshila batontonkanishishamo ukucila ukubapatikisha ukupokelela inshila yesu.” E ico, ukupitila mu kwishiba bwino umuntu, kuti twasanga ukuti ifya kulya atemwa ne milandile yakwe na kuba tafyabipa nga nshi nga fintu twaletontonkanya. Mu cifulo ca kuba ni fwe fwe ba kusosa ifingi nelyo ukupampamina pa co tupingwilepo, tulasambilila ifintu ifingi ifya mutengo pa kukutika ku mimwene yakwe. Mu cine cine, abantu bashaumina kumo balasambilila ifingi mu bumi.

Lyonse lintu mubimbilwe ukusala kwa muntu pa lwakwe, tulingile ukuba abateuluka no kuleka bambi ukuipakisha fintu batemwa na bo. Lelo lintu imyendele ilekabila ukumfwila Kabumba wesu, tufwile ukuba abashangila. Lesa Wa maka yonse tatekelesha imyendele fye yonse apo yapela. Alangile ici ukupitila mu mibombele yakwe na babomfi bakwe aba ku kale.

Iciteyo ca Kucishamo Ukusuminisho Kuilumbulwila

Eli, shimapepo mukalamba uwa luko lwa ku kale ulwa Israele, aali mubomfi wa kwa Lesa uwaiketwe mu citeyo ca kuba uwacishamo kusuminisho kuilumbulwila. Abena Israele balipingene icipingo na Lesa, ukusumina ukumfwila amafunde yakwe. Lelo abana baume babili aba kwa Eli, Hofni na Finehasi, baali abafunushi kabili aba bucisenene kabili tabacindike Uwa maka yonse nangu panono. Eli, nangu ca kuti alishibe bwino Amalango ya kwa Lesa, aleshimaula fye mulele mulele kabili uwa muleketela mu kusalapula kwakwe. Apangile icilubo ca kutontonkanya ukuti Lesa aali no kutekelesha ububifi. Kabumba alalekanya pa kati ka bunake no bubifi. Pa kutoba Amalango ya kwa Lesa ku mufulo, abana baume aba kwa Eli ababifi balikandilwe icabipisha—kabili ici cintu cali icalinga.—1 Samwele 2:12-17, 22-25; 3:11-14; 4:17.

Fintu cingaba ica bulanda kuli ifwe ukucishamo kusuminisho kuilumbulwila mu lupwa lwesu ukupitila mu kusuula ukulufyanya kwabwekeshiwabwekeshiwapo ukwa bana besu! Fintu cingacilapo kuwama ukubakusha “mu kufunda no kukonkomesha kwa kwa Shikulu”! Ici cilepilibula ukuti fwe bene tufwile ukukakatila ku fipimo fya bulesa pa lwa myendele no kufifundisha abana besu.—Abena Efese 6:4.

Mu kupalako, icilonganino ca Bwina Kristu te kuti cisuminishe ububifi. Nga ca kuti uwaba mu cilonganino acita ububifi bwabipisha kabili akaana ukulapila, afwile ukufumishiwamo. (1 Abena Korinti 5:9-13) Nangu cibe fyo, ku nse ya lupwa ne cilonganino, Abena Kristu ba cine tabesha ukwalula ubwikashi bonse apo bwapela.

Ukwampana Kwakosa na Yehova

Ukukanasuminisha ukuilumbulwila kulafulilako nga kuli imibele ya kusakamika. Nga ca kuti, nangu ni fyo, natukwata ukwampana kwapalamisha ukwa pa lwesu na Lesa, tulaipakisha umutelelwe uutwaafwa ukusungilila ukushikatala kwalinga. “Ishina lya kwa Yehova lupungu ulwakosa, e mo abutukilo mulungami no kuba fye,” e fyo tubelenga pa Amapinda 18:10. Mu kushininkisha takwaba ukucena ukwingesa kuli ifwe nelyo ku batemwikwa besu uko Kabumba ashakafumyepo mu nshita yakwe iyalinga.

Umuntu umo uwanonkelemo apakalamba mu kwampana kwapalamisha na Lesa aali mutumwa Paulo. Pa kuba umuYuda uwaishibikwe ukuti Sauli, apakese abakonshi ba kwa Yesu Kristu kabili abele no mulandu wa mulopa. Lelo Sauli umwine aishileba Umwina Kristu kabili, pamo nga umutumwa Paulo, pa numa abombele bukabila bwa mbila nsuma ubwa nshita yonse. Paulo alangishe imibele ya mutima iyabamo kuteuluka mu kushimikila ku bantu bonse, “ku bena Hela na batuutu pamo, ku ba mano na bapelwa amano pamo.”—Abena Roma 1:14, 15; Imilimo 8:1-3.

Ni kwi afumishe amaka ya kwaluka? Ukupitila mu kunonka ukwishiba kwalungikwa ukwa Malembo na pa kulundulula ukutemwa Kabumba, uushaba na kapaatulula. Paulo aishibe ukuti Lesa wa bulungi pantu Apingula umuntu umo umo, te kulingana no lutambi nelyo umushobo, lelo ukulingana na fintu uyo muntu aaba na fintu acita. Ee, kuli Lesa, imilimo yalicindama. Petro asosele ukuti “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Imilimo 10:34, 35) Lesa Wa maka yonse taba ne mpatila. Ici capusanako ne ntungulushi shimo isha mu calo, isho pambi ku mufulo fye kuti shakaanya ukuilumbulwila ku mifwaile yabo abene.

Inshita Shilealuka

Ukulingana na John Gray, uwa ku Oxford University mu England, ukusuminisho kuilumbulwila “kwaba mibele ya bulumba iyo pali nomba ishimonaika.” Lelo ici cili no kwaluka. Ukusuminisha ukuilumbulwila ukwendela pamo na mano ya bulesa kuli no kwanana.

Mu calo cipya ica kwa Lesa icisungamine, ukukanasuminisho kuilumbulwila takwakabemo. Imibele yacishamo iya kukanasuminisho kuilumbulwila, pamo nga impatila na bumano kuikwatila, ikaya. Ukuumina kumo takwakalepumfyanya ukuipakisho bumi na kabili. Lyene, kukabako paradise uwacilapo bukulu pali ulya uwaliko mu Mupokapoka wa Kashmir.—Esaya 65:17, 21-25.

Bushe mulefwaisha ukwisaikala muli cilya calo cipya? Mwandi lishuko kabili fintu ico cikaba ica kucincimusha!

[Icikope pe bula 26]

Umutumwa Paulo alishikatele bwino bwino pantu aali ne senge na Lesa