Abacaice Bepusha Ukuti . . .

Bushe Lesa Akatwalilila Ukuba Cibusa Wandi?

IMFUMU DAVIDI yali mwaume waipakishe bucibusa na Lesa. Lelo pa nshita imo asoselo kuti: “Ukumanama kwa mutima wandi [nakufulilako, NW].” Davidi alecuula, te pa mulandu fye wa kucushiwa na bambi iyo lelo na kabili na pa mulandu wa filubo fyakwe. Atendeke ukuyumfwa ukuti na Lesa na o namutaluka, kabili apepele ukuti: “Alukileni kuli ine, no kumbelelo luse; pantu ndi neka, kabili ndi mulanda.”—Ilumbo 25:11, 16-19.

Nakalimo na iwe wine uleyumfwa uwamanama. Pambi kuti waliba mu mibele ishawama iingaba iya kupesha mano ku ng’anda nelyo ku sukulu. E lyo na kabili, kuti nukwata amafya yakalamba aya butuntulu bwa bumi nelyo ukuyumfwa uwafuupulwa pa mulandu wa bunake buntu ulepitamo. Te mulandu fintu umulandu wingaba, taufwile ukucuula weka iyo; Lesa mu kuba na bukapekape alatambika bucibusa bwakwe no bwafwilisho.a Nga ca kuti walitendeka kale kale ukukuula bucibusa nankwe, walasansamushiwa ukwishiba ukuti talekelesha ifibusa fyakwe lintu fili mu nshita iyayafya. Nangu cingabe fyo, nga ca kuti wasanswa na mafya, kuti pambi wayumfwa ukuti Lesa ali apatali. Kuti pambi na kabili wamona kwati talekwafwa nakalya. Bushe e fintu caba?

“Umuunga mu Mubili”

Ica kubalilapo, shi belenga 2 Abena Korinti 12:7-10. Apo umutumwa Paulo alelanda fintu acuulile ku cintu icitwa “umuunga mu mubili.” Cilemoneka kwati “umuunga” wali bulwele bwa ku mubili, nakalimo bwasanshishemo amenso yakwe. Te mulandu na fintu wali, walitwalilile ‘ukumututamo’ lwa mu nkuntu. Te mulandu no kulomba kwa mukoosha kutatu kuli Lesa ukuti aufumyepo, uyu ‘muunga’ walikalilile.

Bushe Yehova alesuula amapepo ya kwa Paulo? Awe nakalya! Lesa amwebele ati: “Ukusenamina kwandi kwakumana kuli iwe; Pantu mu kunaka e mo amaka yandi yalengwo kufikapo.” Nangula cali ca kuti Yehova asalilepo ukukanafumya ulya ‘muunga’ talekeleshe Paulo iyo. Ukupitila mu kusenamina kwa kwa Lesa, Paulo aipakishe bucibusa bwe senge nankwe. Ico cali ‘icakumana’ ukwafwa Paulo ukwikala no bulwele bwakwe. Ilyo Paulo aletulukusha ukucite co, na kabili ali no kwisakumanya amaka ya kwa Lesa ayatusungilila mu nshila iipya kabili iya pa lwakwe.

Ubwafwilisho mu fya Kwikala na Amafya

Ukupala Paulo, na iwe pambi kuti naukwata ‘umuunga’ nelyo ubwafya, ubukulasa, ukukulenga ukwenekela ifibi no kuyumfwa uwafupulwa. Nga fintu cali kuli Paulo, Lesa pambi kuti asuminisha ubu bwafya ukutwalilila. Ico kwena tacilepilibula ukuti naleka ukuba Cibusa obe iyo. Lesa aebele umutumwa Paulo ukuti: “Mu kunaka e mo amaka yandi yalengwo kufikapo.” Nga ca kuti washintilila pa maka ya kwa Lesa ukucila ayobe, kuti washipikisha. Pambi kuti wasanga no kuti ukupitila mu bwafwilisho bwa mupashi wa kwa Lesa, kuti waba na maka ya kupwilikisha ifintu tawatontonkenye fyo kuti waficita. Paulo asoselo kuti: “Mbekelwa mu fya kunaka . . . Pantu ilyo nanaka, e lyo naba na maka.”

Umukashana we shina lya Robinb asangile ici ukuba ica cine. Pa myaka 14, alilekele ukumona pa mulandu wa bulwele ubwitwo kuti glaucoma. Mu mwaka uyo wine nyina mu kupumikisha alifwile. “Nashele fye na Yehova nomba,” e fyasosa Robin pa lwa kutendeka ukushomboka ne yi ‘myunga’ yakalipisha nga nshi. “Nalishibe ukuti nga nali no kucimfya imibele bwino bwino, nalingile ukukambatila kuli wene.” Robin acitile fye ico cine, mu kupelako aishileba kabila wa mbila nsuma uwa nshita yonse. Asosa ukuti: “Nalilombele Yehova ukungafwilisha muli fyonse. Alingafwilishe mu cine cine.”

Abacaice abengi nabasango kuti ukukumanya amesho kulabafwa ukupalamina kuli Lesa icine cine. Languluka Jeff wacaice. Wishi alifulumwike ulupwa lwakwe, no kushila nyina wa kwa Jeff umulimo wa kusakamana abana 7. “Naleyumfwa ukubulwa tata apakalamba,” e fyo Jeff, uwali fye ne myaka 12 pali ilya nshita asumina. “Nalefwaisha umuntu uwingesafumyapo uku kuyumfwa kwa kubulisha kuntu naleyumfwa cila bushiku.” Cinshi Jeff acitile? “Nalipepele kuli Yehova ukuti angafwe ukupwisha uku kubulisha.” Jeff alebomba mu kumfwana na mapepo yakwe kabili aisanshishe mu milimo ya ku mupashi. Mu kupita kwa nshita, alishilesango kuti Yehova alemwafwa—ukupitila mu mupashi wakwe uwa mushilo Uukukoselesha na mu cilonganino ca Bwina Kristu. (Linganyako Ilumbo 27:10.) Nomba pa myaka ya bukulu 27, Jeff ebukisho kuti: “Nshakwete umuntu wa kuncingilila, e co nalipalamine sana kuli Yehova.” Eta uko kwampana kwapalamisha nga nshi nge “paalo ilya mutengo nga nshi ilyafumine mu bwesho bu.”

Ifya Kukwata Ubwafwilisho bwa kwa Lesa

Mu kupalako, Cibusa obe uwa ku muulu akakwafwa mu mafya yobe. Lelo cinshi ufwile ukucita? Cisuma, pa kuti bucibusa ubuli bonse bulunduluke, pafwile paba ukumfwana. Ipepo lyaba e nshila tumfwaninamo na Lesa. Ukupitila muli lyene, tulamulengo kwishibo kuti tulakabila ubwafwilisho bwakwe. Nangu ni fyo, ipepo te kuti libe no mutengo sana nga ca kuti lili fye ilyatalala nelyo nga lya cibelesho fye. Ukupala abacaice abalandilwepo pa muulu, ufwile ‘ukupongolwele fya mu mutima obe’ kuli Lesa! (Ilumbo 62:8) Pambi kuti wafwaya no kupaapaata. (Abena Filipi 4:6) Ukupaapaata kwaba mapepo yabamo ukuyumfwa kwakosa kabili aya mukoosha nga nshi.

Tutile walikwato bwafya ukulama amatontonkanyo yobe nelyo ukucimfya icibelesho cabipa. Paapaata kuli Yehova! Lomba ubwafwilisho bwakwe mu nshita sha matunko. Te lyonse ici cingaba icayanguka. “Nga ca kuti itunko lyakosa ilyabipa lyaisa, ndaipatikisha ukupepa,” e fyasumine Gary. “Inshita shimo ndatontonkanyo ukuti, ‘Nga kuti natununuka shani Yehova?’ Nalyo line, ndalomba ubwafwilisho kuli wene. Alampeela amaka nkabila ukuti nshipikishe.” Nangu cingaba icayafya pa kubalilapo, twalilila ukweba Lesa ifya mu mutima.

Lelo ni shani nga camoneko kuti amapepo yobe tayaleasukwa? Ku ca kumwenako, Lora aletulukusha ukucimfya icibelesho cabipa ica kusuko bwamba. “Nalesosa kuli Yehova pa lwa ubu bwafya mu bufumacumi,” e fyo alondolola, “lelo nalefilwa ukuleka.” Inshita shimo Lesa kuti atusuminisha ukulangisha fintu tukatamike ifyo tulelomba. (Linganyako Ilumbo 88:13, 14.) E ico kanshi, tufwile ukukosapo ukupepa! (Mateo 7:7; Abena Roma 12:12) Lora acitile fye ico cine. Pa nshita imo ine, alitendeke ukubomfya fintu ifyebo fya mu mpapulo sha Watch Tower Society fyalelanda pali uyu mulandu.c Mu nshita, alitendeke ukumona ifyalefumamo. Ebukisho kuti: “Lyonse lintu nacimfya itunko, naletasha Yehova pantu nalishibe ukuti alengafwa.” Cine cine, pambi kuti wasango kuti ulebwekeshapo icibelesho cimo cine lintu uletulukusha ukulama ubwafya bobe. Lelo nga ca kuti uletwalilila ukulwisha kabili taulebwekeshapo ubunake ku mumbo, Lesa akatemunwa no ‘kucincila’ kobe kabili akatwalilila ukuba Cibusa obe.—2 Petro 1:5.

Ukubomba na Lesa

Inshila na imbi iya kubomfya bwino ubwafwilisho bwa kwa Lesa yaba kusumina ukulaalika kwakwe ukwa kuba umo uwa “babomfi abalebomba pamo” nankwe. (1 Abena Korinti 3:9) Ici cisanshamo ukwafwako bambi ukusambilila pali Lesa. (Mateo 28:19, 20) Lintu wayumfwa uwacushiwa nelyo uwafupulwa, itontonkanyo lya kuisansha mu mulimo uwa musango uuli onse te kuti ulitemwe. Nangu cibe fyo, “ukupikintika pe mu mulimo wa kwa Shikulu” kuti kwakwafwa icine cine. (1 Abena Korinti 15:58) Kukakwafwa ukuleka ukulangulushiwa. (Linganyako Amapinda 18:1.) Robin, uwacambulwako pa kubala, asosa pa lwa nshita shakwe isha mafya ukuti: “Icangafwile ukushipikisha cali mulimo wandi kuli Yehova!”

Ukubomba na Lesa kuti kwakwafwa ukucimfya no kuyumfwa kulekoselela ukwa kuti Lesa nakulekelesha. Lintu abantu babili balebombela pamo no buyo bumo bwine, bushe ilingi line bucibusa bwabo tabukoselako? Lintu waisansha mu mulimo wa kushimikila, ulakumana na mesho lyonse. Upulikilwako fye ulelomba ubwafwilisho kuli Lesa. Lintu Lesa alepaala imilimo yobe, bucibusa bwakwe bulatendeka ukuba ubwa cine cine. Ulatendeka ukumona ifyo Lesa akucetekela pamo ngo mubomfi uulebombela pamo nankwe. Ici kuti calenga ukuitetekela kobe ukukula.

Ku ca kumwenako, Carol aleyumfwa uushatemwikwa nangula panono. Nyina aliipeye, kabili wishi uwalemucusha, alemusaalula lyonse. Lelo ilyo afikile pa myaka 17, abele umo uwa Nte sha kwa Yehova kabili atendeke no kubomba umulimo wa kushimikila. Nomba, pa numa ya myaka 10 pamo nga kabila wa mbila nsuma uwa nshita yonse, asosa ukuti: “Uyu mulimo walingafwa apakalamba pa mulandu wa kuti nalimona ifyo Yehova ampaala. Ndaisosho kuti, ‘Nga ca kuti Lesa alintemwa, ninshi nalicindama.’ Ukubomfiwa na Yehova mu kubile shina lyakwe nakunenga ukuyumfwa uwatemwikwa.”

“Sondeni no Kumono Kuti Aliwama Yehova”

“Mu fya kunengo munsokwe [Lesa] alimpokolwele,” e fyalembele Imfumu Davidi pa numa ya kupusuka kwempe. (Ilumbo 34:4, 6, utulembo twa pa muulu; 1 Samwele 21:10-12) E ico pa mulandu wa fyo apitilemo Davidi kuti asosa ukuti: “Sondeni no kumono kuti aliwama Yehova; alishuko muntu uuba muli wene.”—Ilumbo 34:8.

Nangula ca kuti ubumi bobe pambi tabwakatale abubapo nge fintu cali kuli Davidi, pa nshita shimo ukalakumanya ifya kumanama fimo nelyo ukutitikisha. Lintu ‘ukumanama kwa mutima obe kwafula,’ paapaata kuli Lesa. (Ilumbo 25:17) Witiina ukuti Lesa alaleka ukuba cibusa obe. Lintu mu kutekanya uleshipikisha mu kucula no kuimwena ubwafwilisho bwa kwa Yehova no kusakamana, uli no ‘kusonda no kuimwena’ we mwine “ukuti aliwama Yehova.” Kabili akatwalilila ukuba Cibusa obe kuli pe na pe.—Yakobo 4:8.

[Amafutunoti]

[Icikope pe bula 15]

Bushe Lesa alalekelesha ifibusa fyakwe mu nshita sha mafya?