Paradise Wabulamo Amacushi—Alaswa Abeko

“ULI no kuba na ine mu Paradise.” Fintu ayo mashiwi yakoseshe umwaume uwali kale mpulamafunde! Tacili ukuti aleyumfwa ifyo ali no kufyuka ku mulilo wa helo kabili ali no kuya ku muulu nga afwa. Mu cifulo ca ico, ulya mupuupu uwali pa mbali ya kwa Yesu alisansamushiwe ne subilo lya kuti aali no kubuushiwa ku bumi lintu Paradise abweshiwa kwi sonde. Moneni twapaapaata uwalandile ayo mashiwi ya kufika pa mutima pa lwa Paradise—Umwana wine uwa kwa Lesa, Yesu Kristu.—Luka 23:43, NW.

Cinshi calengele Kristu ukulaya Paradise? Ulya mupuupu apaapeete ati: “Mwe Yesu, munjibukishe ilyo mukesa mu bufumu bwenu.” (Luka 23:42) Bushe ubu Bufumu cinshi, kabili bwalundana shani na paradise wa pano isonde? Ni shani fintu ici citwebekesha ukuti Paradise takabemo amacushi?

Amaka Ayakaletako Paradise

Kuti mwasumino kuti paradise wa cine kuti aisa fye pe sonde lintu amacushi ya ndakai yafumapo. Ukubombesha kwa bantu ukwa kuyafumyapo ukufika na nomba kwalifilwa, nga fintu ifyacitika filelanga. Kasesema wa ciHebere Yeremia alandile ati: “Mwe Yehova, ninjishibo kuti . . . te kwa muntu uuleya ukushikimika amatampulo yakwe.” (Yeremia 10:23) Nani kanshi uwingafumyapo amacushi yonse aya ndakai?

Imiceele Yacishamo Ukukaba no Kutalala no Kukowesha. Lintu icikuuku ca mwela pali bemba wa Galili cabalamwine amabimbi ayakalamba ayengaleto bonaushi bwa kubunda, abaleoba bashibwishe umuyendo munabo uwali nasendama. Awe, atile kuli bemba: “Ba tondolo, talala.” Ilandwe lya kwa Marko lishimike cacitike ati: “Umwela walinakile, kwali no kukutama kukalamba.” (Marko 4:39) Uyo muyendo munabo aali ni Yesu. Alikwete amaka pa myendele ya mwela.

Ni uyu Yesu umo wine e wasobele ukupitila mu mutumwa Yohane ukuti kwali no kwise nshita lintu Lesa ali no “konaula abaleonaule calo.” (Ukusokolola 1:1; 11:18) Ici tacili cintu icishingacitika kuli Umo uwaonawile icalo conse ica bantu abashipepa mu Lyeshi lya mu kasuba ka kwa Noa.—2 Petro 3:5, 6.

Bumpulamafunde no Lukaakala. Baibolo yalilayo kuti: “Incitatubi shikafitwa; lelo abalolela Yehova, bene bakapyaninine calo. Lelo abalanda bakapyaninine calo, no kuilemeno bwingi bwa mutende.” (Ilumbo 37:9, 11) Na kabili, ni Lesa, Yehova, e walaya ukufumyapo bumpulamafunde bonse, ukusungila abafuuka Paradise.

Ubupiina ne Nsala. Ulufyengo lwa pali ndakai lulasuminisha amabuteko ku lubali lumo ulwa calo ukututile fya kulya “imipili” ifishalapo ilintu pa nshita imo ine ifyalo fipiina filecululuka no bupiina. Ifipani fya kukumbusuka, ifitungililwa na bantu bayangwako mwi sonde lyonse, filesha ukupeela ifikabilwa sana lelo ilingi line filafilwa lintu amapange ya kwananya yabongoloka pa kukanakwata ifunde no muyano. Cilanyeniko na cintu kasesema Esaya alembele ukuti: “Mu lupili ulo lwa Sione, Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa, ifya mafuta ifyaisulamo ubufyompo, imyangashi ya pa fisekwa iyalengululwa.” (Esaya 25:6) Bushe ico tacileumfwike fyo icipowe no kufwa ku nsala fikafumapo? Mu kushininkisha.

Inkondo. Ukwesha ukuteka cino calo ku bulashi bumo ubwingatungulula ifyalo fyonse kwalifilwa. League of Nations, uwaimikwe mu 1920, alifililwe ukulesha ukubalamuka kwa Nkondo ya Calo iya 2 kabili alibongolweke. United Nations, uyo ilingi bawila pamo nge subilo lyawamisha ilya mutende, aleshashala ku kulamununa utubungwe tuleshenkana. Ukukanasakamana ukubombesha kwa iko ukwa kupango mutende, inkondo shilefulilako fye, cibe sha mu bana calo, isha mishobo, nelyo isha mu bwikashi. Ubufumu bwa kwa Lesa bwalilaya ukufumyapo utubungwe utulwishanya no kusambilisha abatekwa ba buko mu nshila sha mutende.—Esaya 2:2-4; Daniele 2:44.

Ukubongoloka kwa Ndupwa no kwa Mibele Isuma. Ukubongoloka kwa ndupwa nakwanana. Ubuulungani bwa bana nabufula. Bucisenene bwandatile fye mbali shonse isha mu bwikashi. Lelo, ifipimo fya kwa Lesa ukufuma fye ku kutendeka tafyaluka. Yesu aikalileko bunte ukuti “umwaume akasha wishi na nyina, no kulambatila ku mukashi wakwe; kabili aba babili bakaba umubili umo . . . E ico, ico Lesa alundenye, umuntu elundulula.” (Mateo 19:5, 6) Yehova Lesa na kabili akambishe ati: “Cindika wiso na noko . . . ukuti kuwame kuli iwe; kabili ube wa nshiku ishingi pano nse.” (Abena Efese 6:2, 3) Ifipimo fya musango yo e fikakumane sonde ilyo Ubufumu bwa kwa Lesa bukalateka.

Ukulwala ne Mfwa. “Yehova . . . akalatupususha,” e fyalaile kasesema Esaya, “e lyo umwikashi wa mu calo takasose, ati, Nindwala.” (Esaya 33:22, 24) Umutumwa wa Bwina Kristu Paulo alandile ati: “Icilambu ca lubembu ni mfwa; lelo ica bupe ca kwa Lesa mweo wa muyayaya muli Yesu Kristu.”—Abena Roma 6:23.

Yehova Lesa akafumyapo aya macushi yonse ukupitila mu buteko bwakwe ubwa ku muulu mu maboko ya Mwana wakwe, Kristu Yesu. Nangu cibe fyo, kuti pambi mwatila, ‘Ici caumfwika kwati Mwelenganya. Kwena, kuti cawama nga caisabako, lelo bushe cikabako?’

Icacitika Pali Ndakai

Ku bengi, ukwikala muli paradise wabulamo amacushi pano pene pe sonde cumfwika kwati kwenekele cishingacitika. Nga e fyo muleyumfwa, langulukeni ubushinino bwa kuti mu cine cine cikacitika.

Inte sha kwa Yehova baba pali ndakai bwikashi bwa pa kati ka fyalo ubwa bantu ukucila pa mamilioni yasano abo kale kale bashingulukwa ne mibele yabamo mutende eyefilya mu filonganino fyabo 82,000 ifyasalangana mu fyalo 233. Kuti mwatandalila amabungano yabo ukuli konse, ayakalamba nelyo ayanono, kabili cinshi cintu mukasanga?

(1) Imibele ya Cimwemwe, iya Busaka. Ukulanda pe bungano limo ilya Nte sha kwa Yehova mu Norwich, England, umukalamba wa cibansa ca mupila atile: “Imibele ya mutende pa nshiku shine . . . kuti yakwambukila. E ko wingasanga umutalalila uwine wine uwapusaninina fye ku nshiku ishili shonse shine nga uli mu calo caumina ku bukwebo no bumi bwa cila bushiku ubwatushinguluka. Inte balikwatako cimo icibalenga ukupusanako kabili ico ushingalondolola.”

Impanda mano mu kusambilisha ifya makuule uwatandalile amaofesi ya Nte sha kwa Yehova aya mu London atile: “Nalipapushiwe ku fyo namwene na ku fyo naumfwile kabili nalipeshiwe amano ku mibele ya mutende uutuntulu no mutalalila uwaba mu fikuulwa fyenu na pa [baume na banakashi]. Ndeyumfwa ukuti inshila mwikalilamo kuti yasambilishako bambi ifintu ifingi muli cino calo ca macushi.”

(2) Umutelelwe no Mutende. Kalemba wa mikululo mwi pepala lya Journal de Montréal mu Canada alembele ati: “Nshili Nte. Lelo ndi nte ku cishinka ca kuti Inte shipeelo bunte ukuti kwaliba imibombele yatelela no kuisunga bwino. . . . Nga e baaliko fye beka mu calo, tatwingalakakilile fiibi ubushiku no kuteye ndibu.”

(3) Bucishinka kuli kamfulumende wa Bufumu bwa kwa Lesa e bwishibisha baNte. Ukukanaibimbamo mu milandu ya calo bamo kulabakalifya, nangu line takulekabila kubakalifya. Ukutaluka ku kuipoosa mu mapange ya bupolitiki aya muno nshiku aya kukambika pa fyaonaika tacaba pa mulandu wa kuti tabafwaya ukukakililwa ku kuwamyako ubwikashi. Mu cifulo ca ico, besha ukuisunga mu nshila iitemuna uuteka ukupitila muli kamfulumende wa ku muulu, e kuti, Kabumba we sonde, Yehova Lesa.

Ifisumino fya Nte, ifyashimpwa fyonse pa Cebo ca kwa Lesa, Baibolo, filabalesha ukuponena mu citeyo ca kusanguka icakaniko nelyo imipepele ya kusefya. Balalange cikuuku mu bantu fye bonse, te mulandu na fintu basuminamo. Kwena, tabesha ukupatikisha aba bantu ukwalula imimwene yabo. Balatukuta ukupashanya Intungulushi yabo, Kristu Yesu, pa kulanga ubushinino bwa mu Malembo ubwa Paradise wabulamo amacushi uwalaswa abeko pano isonde.—Mateo 28:19, 20; 1 Petro 2:21.

(4) Ubutuntulu bwa ku Mupashi ne Nsansa. Mu kushininkisha, Inte sha kwa Yehova tabatila takwaba icibacusha nangu cimo pali ino nshita. Ico tacingacitika ku bantu abapyana ulubembu kuli Adamu. Lelo mu kuba no kwaafwa kwa mupashi wa mushilo uwa kwa Lesa, babombela pa kulundulula imibele ya pa lwabo pamo nga “ukutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Kwaba kupepa Yehova ukupitila muli Kristu Yesu e kubekatanya no kusunga amasubilo yabo ayomi.

Ilyo mukatandalila apalonganina Inte ku ncende uko mwabela, tulesubilo kuti cikamushinina ukuti Lesa akaalula isonde ukuba paradise wa cine cine.

Amacushi ya pali ndakai yakaba nayaya. Nangu fye ukukanapwililika twakokola na ko panono panono kukalafumapo ilyo ukwaafwa kwa cilubula ca kwa Kristu kukalabomfiwa pa muntu wa cumfwila. Ee, ubumi bwapwililika ne nsansa kuti mwafikwata.

Ukuipekanya ukwayanguka kukamwaafwa ukuipakisha icilolelo ca musango yo. Ipusheni Inte ukuti mwingakwatako icitabo ca pa lwenu ica Ukwishiba Uko Kutungulula ku Mweo wa Muyayaya.a Muli ici citabo kuti mu nshita fye inono, mwasambilila cintu Lesa afwaya kuli imwe pa kuti na imwe mukaipakisheko ubumi muli paradise wabulamo amacushi kuli pe na pe.

[Futunoti]

[Amashiwi pe bula 10]

Ifisumino fya Nte, ifyashimpwa fyonse fye pali Baibolo, fibalenga ukukanasanguka icakaniko nelyo ukupepa kwa kusefya

[Ifikope pe bula 8, 9]

Icitendekelo nomba cilebikwa ica paradise wabulamo amacushi

Mu kwangufyanya, paradise ali no kubako isonde lyonse