Ifyo Momba no Kubulubusa

Nga fintu cashimikwa na Sven Sievers

UKUTULA ku bwaice ndabulubusa. Nga naibukisha, ndatasha abafyashi bandi ifyo balebomba no bu bwafya. Lintu nabulubusa, lyonse baleesha ukutontomesha pa kukutika ku fyo nalefwayo kusosa mu cifulo ca kulungika imilandile yandi. Ukulingana na bantu abondapa ifya milandile, abafyashi abaikalila fye ukulolekesha pa kubulubusa kwa mwana kuti pambi balenga ubwafya ukubipilako.a

Bamayo baishileba bamo aba Nte sha kwa Yehova lintu nali ne myaka itatu. Mu myaka ya bupungwe napingwilepo ukukonka ica kumwenako cabo kabili nalyafwiwe ukusambilila Baibolo mu kushika. Pa July 24, 1982, nalibatishiwe ngo mubomfi waipeela uwa kwa Lesa pe bungano mu Neumünster, Germany. Pa numa, nalikuukile ku South Africa, uko natwalilile ukubombako umulimo wa kushimikila ku cintubwingi, uo bonse Abena Kristu ba cine bakambishiwa ukubombako. (Mateo 28:19, 20) Nalimo icingamusungushako ca kuti, momba shani no kubulubusa?

Ifilambu Ififuma mu Kuba Uwaicetekela

Te kuti nkaane ukuti limo limo cilankosela ukuba uwaicetekela, lelo nalisanga ukuti ukuba uwaicetekela mu cine cine kulangafwa. Icishinka cili ca kuti lyonse ndabomfya inshila shimo pa kulanshanya na bantu. Nga nshibomfeshe akanwa, momfya ifyebo ifyalembwa nelyo fye ukubatambika impapulo sha Baibolo. Ukuba uwaicetekela kulangafwa ukucimfya ubwafya bwa kutendeka ukulanshanya. Ndesha ukutendekelako ne fyebo ifyayanguka. Ku ntendekelo ya kulanshanya, ndaleka umwine wa ng’anda alanda ukufika apo engapesha. Abantu balitemwa ukulanda, kabili ici cindetelako ishuko lya kwishiba imitontonkanishishe yabo. Lyene, ndatwalilila ukulanshanya na bo pa fintu ifyo batemwa, no kukomaila pa bukombe bwa Baibolo. Ukutontomesha pa fyo balelanda kulangafwa ukulaba amafya ya kubulubusa, no kubulubusa kulacepako.

Na kabili ukuba uwaicetekela kulangafwa ukwasukapo pa kulongana kwa Bwina Kristu. Nalimona ukuti mu nshita ya kulanshanya Baibolo nga nayasukapo, ibumba pamo na katungulula besa mu kunjishiba bwino no kukutikako sana ku fyo ndesosa kabili tabapoosako amano ku milandile yandi.

Pa kusanga ukusekelela kwaba mu kutunguluka, mfwile ukutwalilila ukuibikilishako. Pa mulandu wa ici, nshiililila ubulanda nangu ukutontomesha pa mibele yandi. Ukulwisha ubwafya bwa kuililila ubulanda kwaba bulwi bwa mutatakuya. Calisoswa ukuti ngo muntu aluntuka pali kabalwe, alingile ukuninapo na kabili pa kuti ukuicetekela kutwalilile. E co nga nafilwa ukutwalilila ukulanda pa mulandu wa kubulubusa, mu mampalanya ndeshako ukuninapo na kabili pali kabalwe, uko e kuti, ukulandapo nge shuko limbi lyamoneka.

Ifyo Bambi Bengafwilisha

Lintu ndetuma lamya nelyo ukwipusha abantu abo nshaishiba, ndatasha nga bangafwa mu nshila iisuma. Lelo bamo pa kufwaya ukungafwa balacishamo, ica kuti bamona kwati ndi mwaice uushingaipingwila.

Na kabili ndatasha ubwafwilisho bwa kwa Tracy, umukashi wandi uwakwato kutemwa. Ilyo talati atendeke “ukunandilako,” intanshi tulakolobondamo ica kuti aleshiba ifyo ningatemwa ukupwishishisha. (Linganyeniko Ukufuma 4:10, 14, 15.) Muli yo nshila, alancindika pamo ngo mulume wakwe, no kunenga ukuti ndeyumfwa ukuti ncili na maka pa bumi bwandi.

Isukulu lya Butumikishi bwa Teokrasi e ca kwaafwa cikalamba cimbi. Pali uku kulongana kwa cila mulungu, abana be sukulu balabelengako Baibolo pa cintubwingi no kulandako amalyashi ayepi ayashimpwa pali Baibolo. Nalipapile pa kusango kuti lyonse nalekwata amaka ya kubelenga bwino e lyo no kulanda bwino pa ntanshi ye bumba. Nkaanalembesha mwi sukulu, nalimo nga nshaishibe ukuti nalikwata amaka ya musango yu.

Lintu nalelandako amalyashi mwi Sukulu lya Butumikishi bwa Teokrasi, nalekoseleshiwa maka maka lintu katungulula atontomesha pa fyo nsosele, te pa milandile yandi iyo. Nalinonkelemo apakalamba mu Icitabo ca Kutungulula Isukulu lya Butumikishi bwa Teokrasi,b nangu cingatila imbali shimo isha ici citabo shalikosa ku babulubusa ukucila ku bantu abalanda bwino. Ku ca kumwenako, inshita shimo, pa mulandu wa kubulubusa, ndafilwa ukupwisha ilyashi lyandi mu nshita yapimwa. Nangu ni fyo, ndakoseleshiwa, lintu katungulula atontomesha pa fishinka ifyo ningaba na maka ya kubombelapo.

Amashuko Yakalamba aya Mulimo

Ku numa, nalikwete ishuko lya kubelenga pa cintubwingi ulupapulo lwa Bwina Kristu ulo tusambililamo pa kulongana kwesu. Na kabili nalikwete ishuko lya kutungulula isambililo lintu abatumikishi abafikapo tabalebapo, kabili ilelo ntungulula fye lyonse. Nangu cingati intanshi nali no mwenso, Lesa alingafwa ukubomba imilimo ya musango yu.

Nangu cibe fyo, pa myaka iingi nali na mashuko ayanono aya kubelenga nelyo ukusambilisha pa cisebele mu cilonganino. Ici cali fye bwino, pantu kwalebako inshita lintu nalekokola sana pa kuti nondolole ifingomfwika. E co kanshi, naleibikilishako sana pa kubomba imilimo imbi. Pa kubalilapo, nalebomba nga kaafwa mu kusakamana bamagazini ba cilonganino aba Ulupungu lwa kwa Kalinda na Loleni! Lyene, pa numa nasontelwe ngo mubomfi utumikila, natendeke ukusakamana amaBaibolo, ifitabo, ne mpapulo shimbi. Pa numa, nalipeelwe umulimo wa kubebeta amakardi ya cifulo ca kubombelamo ayabomfiwa mu mulimo wesu uwa kucitilo bunte ku cintubwingi. Ukutontomesha pali iyi milimo, no kubombesha, kwandetele ukusekelela kukalamba.

Pa myaka 8 iyapitapo, nalibomba pamo na Tracy nga kabila wa mbila nsuma uwa nshita yonse. Mu cine cine, Yehova alimpaala na muli uyu mulimo. Na kuba, limo limo ndatwishika nampo nga Yehova alabomfya ubunake bwandi ubwa kubulubusa. Pa bantu basano abo naafwilisha ukuba Abena Kristu baipeela, babili aba bene balabulubusa.

Mu kusekelela, ncili ndebukisha ubushiku nasontelwe ukubomba nga eluda wa pa cilonganino. Nangu cingati amaka yandi aya kusambilisha pa cisebele yanono, ndeshako ukutontomesha pa kwafwilisha umuntu umo umo. Ukubulubusa takwandesha ukusapika kwa mu Malembo pa kuti ningaafwako aba mu cilonganino abalepita mu mafya yakakala.

Pa myaka isano iyapitapo, nalelaalikwa ukulanda amalyashi ayafulilako. Pa mbali ya kulanda amalyashi mwi Sukulu lya Butumikishi bwa Teokrasi, ndabilishako ifyebo ifinono pa kulongana kumbi. Panono panono imilandile yandi yaishilewaminako. Lelo mu kupita kwa nshita ukubulubusa kwabipisha kwaishilebwela. Mu kusakamikwa, natontonkenye ukuti, ‘nshakapeelweko ilyashi limbi,’ lelo nalipapile ilyo ishina lyandi lyabikilwe pa kutantika kwakonkelepo! Kangalila wa kutangilila mu cilonganino umo nalelongana anjebele ukuti ngo kubulubusa kwacilamo ica kuti nafilwa ukutwalilila, kuti namulolesha fye pa kuti engesa pa cisebele ukwisatwalilila ukulanda ilyashi. Nabomfeshe ubu bwafwilisho bwa kutemwa umuku umo nelyo imiku ibili, lelo mu myeshi ya nomba nshabubomfyapo. Ilyo imilandile yandi yaishilewaminako, nalipeelwe amalyashi ayataliko, ukubikako fye na malyashi ya pa cintubwingi. Naishileishiba fye ukuti ninunduluka lintu nomba line nalombelwe ukubamo mu filangililo fibili pa kulongana kwa muputule ukwa Nte sha kwa Yehova.

Ukuba kwena, nshaishiba bwino bwino icalenga ukuti imilandile yandi iwamineko. Na kabili, nalimo ku nshita ya ku ntanshi ikesabipilako. Na kuba, ilyo cilemoneka kwati ninunduluka bwino mu kulanda pa cisebele, ukubulubusa kwena kulesa lintu ndelanshanya no muntu umo umo. E co kanshi nshingasoso kuti nincimfya ukubulubusa. Lintu ukubulubusa kwaisako, ndeshako ukuicinkulako ukuti ndekabila ukusumina ukupelebela kwandi no ‘kwenda bufuke bufuke na Lesa.’—Mika 6:8.

Te mulandu na fintu inshita ya ku ntanshi ikaletako, ine nkatwalilila ukuibikilishako, pantu nalishiba ukuti mu calo ca kwa Lesa icilepalamina, ukubulubusa kukacimfiwa umupwilapo. Baibolo isoso kuti: “Indimi sha babulubusa shikaangufyanyo kusosa no kushikimika.” Nalicetekela ukuti ici cikafikilishiwa mu cine cine e lyo na lwa ku mupashi, no kuti “ululimi lwa kwa cibulu lukaula.”—Esaya 32:4; 35:6.

[Amafutunoti]

[Icikope pe bula 18]

Pamo no mukashi wandi, Tracy