Bushe Na Imwe Kuti Mwaputuka Ifilundwa?

Benjamin ali pa nse aleontela akasuba akalekafya umusumba wa Sarajevo, lintu anyantile pa kapata. Ukuulu kwakwe ukwa ku kuso kwaliputwike. Benjamin ebukisho kuti: “Nalyeseshe ukwima lelo nalifililwe.” Benjamin ni umo fye pa bantu 20,000 abepaiwa nelyo ukulemanikwa cila mwaka ku tupata.

MU Angola mwalishikwa utupata utwingi sana ukufika ku mamilioni 15, e kutila mwaba akapata ukucila pali kamo akengonaula umwaume onse, umwanakashi onse, no mwana onse muli ici calo. Nomba mu Angola mwaba abantu 70,000 abaputuka ifilundwa. Mu Cambodia umwashikwa utupata amamilioni 8 ukufika kuli 10, e mwaba abengi abaputuka ifilundwa mwi sonde, e kutila umuntu umo pa bantu 236 abali bonse aliputuka ifilundwa. Cishimikwo kuti mu Bosnia na Herzegovina mwaba utupata amamilioni yatatu, e kutila pa mpanga imo na imo iya bukulu bwa masikweya kilomita 59 palishikwapo utupata.

Lelo abantu abaputuka ifilundwa tabasangwa fye mu fyalo umwaba inkondo. Ku ca kumwenako, mu United States mwaba abantu mupepi na 400,000 abaputuka ifilundwa. Icinabwingi ca bakalamba pali iyi mpendwa, baliputuka ifilundwa pa mulandu wa bulwele bwa mutatakuya ubo beta mu manshoko ati “peripheral vascular disease,” nelyo PVD. Ili lishiwi lya cinkumbawile ilisanshamo amalwele ayengi. Dikishonari wa Taber’s Cyclopedic Medical Dictionary alondolola ukuti PVD lishiwi lya manshoko ilisanshamo “amalwele ayasansa imishipa iyaba mu filundwa, maka maka amalwele ayapumfyanya ukwenda kwa mulopa mu filundwa.” Maka maka ubulwele bwa shuga e bulenga PVD. Ukulingana na lipoti wa World Health Report 1998, “ubulwele bwa shuga mu bakalamba bukalundwako imiku ibili mwi sonde lyonse ukufuma pa mamilioni 143 mu 1997 ukufika ku mamilioni 300 mu 2025.”

Mu United States, ukucenwa mu masanso ya bamotoka, bamashini, ifibombelo fya malaiti, na ku mfuti e ca bubili icilenga abantu ukuputuka ifilundwa, icileimininako amapesenti 20 ukufika 30 aya bantu bonse abaputuka ifilundwa. Fimbi ifilenga ifilundwa ukuputuka fisanshamo ukulwale cuulu (mupepi na mapesenti 6) no kufyalwa uwalemana (mupepi na mapesenti yane).

Ukuputuka icilundwa kwalibipa icine cine. Bushe kwalibako inshila iili yonse iya kucefyako ubusanso bwa musango yo? Kabili nga ca kuti ni kale mwaputuka icilundwa, ni shani mwingekala bwino? Ifipande fikonkelepo fyalalandapo pali ifi fipusho ukusanshako na fimbi.