Ukulingana na Baibolo
Bushe Lesa Akashipikisha Ukufika Lilali?
“LESA, PA KUFWAYO KULANGO BUKALI NO KUSOKOLOLA AMAKA YAKWE, ASHIPIKISHA NO KUTEKANYA UKWINGI KU FIPE FYA BUKALI IFYAPEKANIWA KU KULOLA KU BONI.”—ABENA ROMA 9:22.
UKUTULA ku kale Lesa alishipikisha ububi ubwingi no bubifi bwakapela makufi. Imyaka ukucila pali 3,000 iyapitapo, Yobo ailishenye ati: “Nga kanshi cinshi ico ababifi bengabela no mweo, bakotela kabili babela abapika ku bulamba? Ubufyashi bwabo bwapampamikwa kuli bene, ne mumbwa shabo shili pa menso yabo. Amayanda yabo yabo mutende yabulwamo umwenso; ne nkonto ya kwa Lesa tayaba pali bene.” (Yobo 21:7-9) Bambi abatemwa ubupingushi, pamo nga kasesema Yeremia, na bo balisakamene pa kumona kwati Lesa aletekelesha ababifi.—Yeremia 12:1, 2.
Nga imwe muletipo shani? Bushe mwalipeshiwa amano pa kuti Lesa alisuminisha ububifi? Bushe limo limo mufwaya ukuti Lesa angufyanye ukonaula ababifi nomba line? Kwena Baibolo isosa ukuti ukushipikisha kwa kwa Lesa kwalikwata umwa kupelela, kabili kwaba no mulandu acitile fyo.
Mulandu Nshi Lesa Ashipikishisha?
Intanshi, tufwile ukwipusha, atuti: Mulandu nshi Lesa, uwakwata ubulungami ubwapulamo, asuminishisha ububifi? (Amalango 32:4; Habakuki 1:13) Bushe ici calola mu kutila alatekelesha ububi? Awe iyo! Moneni icilangililo cakonkapo: Tutile kuli dokota uushilekonka amafunde ya busaka pa kulepula abalwele, na kabili uulenga abalwele ukucululuka apakalamba. Nga alebomba mu cipatala, bushe te kuti bamutamfye incito mu kwangufyanya? Lelo inshita shimo ukusuminisha imibele imo iyaibela kuti kwakabilwa. Ku ca kumwenako, ifintu nga fyakakala, pamo nga ku cifulo uko balelwila inkondo, bushe te kuti basuminishe badokota ukubomfya inshila sha kale kabili isha busanso, nalimo no kubomfya fye ifibombelo fya cabecabe?
Ifyo fine na Lesa pali lelo alitekanya no kushipikisha ku fintu ifingi ifyo ashatemwa nangu panono. Nangu ca kutila alipata ububifi, alibusuminisha ukutwalilila pa nshita fye iinono. Kwaba imilandu isuma iyo asuminishisha ububifi. Pa kucite fi, alenga kwaba inshita ya kukalulula limo na limo imilandu yakakala iyo ukupondoka kwa kwa Satana kwabalamwine mwi bala lya Edene. Iyi milandu yalyampana no bulungami ne nsambu ifya mitekele ya kwa Lesa. Kabili, ukutekanya kwakwe no kushipikisha ku bubifi kwalilenga ukuti abacita ububifi babe ne nshita ya kwaluka.
Lesa uwa Luse, Kabili Uwatekanya
Abafyashi besu aba ntanshi, Adamu na Efa, bailundile kuli Satana mu kupondokela Lesa. Lesa afwaya nga alibonawile lilya line fye. Lelo, wene ababelele uluse no kutekanya, pa kubasuminisha ukufyala abana. Lelo aba bana, na bantunse fye bonse abatuntwike kuli bene, bafyalilwe mu lubembu.—Abena Roma 5:12; 8:20-22.
Lesa afwaile ukupususha abantunse ku mikalile ya macushi. (Ukutendeka 3:15) Apo, alomfwikisha ifyo ukukanapwililika, uko twapyene kuli Adamu kutwambukila, alatubelela uluse no kututekanishisha apakalamba. (Amalumbo 51:5; 103:13) ‘Alifulo luse’ kabili aba uwaiteyanya kabili uwaitemenwa ‘ukutulekelela apakalamba.’—Amalumbo 86:5, 15; Esaya 55:6, 7.
Umwapelela Ukushipikisha kwa kwa Lesa
Lelo, te kuti cibe kutemwa kabili ica mano kuli Lesa ukusuminisha ububifi ukutwalilila pe na pe. Wishi watemwa abana te kuti atwalilile ukusuminisha umwana umo uwatwalilila ukucululusha ku mufulo abana bambi aba mu ng’anda. E ico, Lesa, pa kutekanya no kushipikisha ku lubembu, lyonse akulalangisha imibele imbi pamo nga ukutemwa, amano, no bupingushi. (Ukufuma 34:6, 7) Ilyo bukafishiwapo ubufwayo bwakwe ubwa kutekanya, ukushipikisha kwakwe ku bubifi kukapwa.—Abena Roma 9:22.
Umutumwa Paulo alondolwele ici bwino bwino. Pa nshita imo alandile ukuti: “Mu nkulo ishapita, [Lesa] alekele inko shonse ukuya mu mibele ya shiko.” (Imilimo 14:16) Pa nshita imbi Paulo alandile kuti “inshita sha kukanaishiba shena Lesa alishisuulile” ku bantu abashaleumfwila amafunde yakwe ne fishinte. Paulo atwalilila ukusosa ati, “Nomba [Lesa] akonkomesha abantu bonse konse konse ukulapila.” Mulandu nshi? “Pa kuti alingile ubushiku umo akapingwila aba pano isonde mu bulungami ku muntu uyo asontele.”—Imilimo 17:30, 31.
Nonkelenimo Nomba mu Kushipikisha kwa kwa Lesa
E ico, kanshi, umuntu tafwile ukumona kwati kuti asuula amafunde ya kwa Lesa, no kulomba fye ukulekelelwa kuli Lesa pa kufwaya ukuipokolola ku bubi bwingafuma mu micitile yakwe. (Yoshua 24:19) Abengi mu Israele wa pa kale e fyo bacitile. Balikeene ukwaluka. Bapokelele ibusha ukushipikisha kwa kwa Lesa no kutekanya kwakwe. Lesa tasuminishe ububi bwabo ukutwalilila pe na pe.—Esaya 1:16-20.
Baibolo ilangilila ukuti umuntu afwile ‘ukulapila’ nga alefwaya akapusuke ubupingushi bwa kulekelesha ubwa kwa Lesa—e kutila, afwile ukuyebelela ku cinso ca kwa Lesa ukuti mubembu uushapwililika kabili afwile ukutaluka ku bubi. (Imilimo 3:19-21) Lyene, ukupitila mwi lambo lya cilubula ilya kwa Kristu, Yehova Lesa akamulekelela. (Imilimo 2:38; Abena Efese 1:6, 7) Mu nshita yakwe iyalinga, Lesa akafumyapo ububi bonse ubo ulubembu lwa kwa Adamu lwaleta. Kukaba “umuulu upya ne calo cipya” umo takasuminishe ukuba “ifipe fya bukali ifyapekaniwa ku kulola ku boni.” (Ukusokolola 21:1-5; Abena Roma 9:22) Mwandini ici cikaba cintu icishaiwamina icikafuma mu kushipikisha kwa kwa Lesa ukwaibela, lelo ukwakwata umwa kupelela!
[Icikope pe bula 29]
Lesa alekele Adamu na Efa ukufyala abana