Umfweni no Kusambilila

ILYASHI limo mu nyunshipepala ya Toronto Star lyatile “ukufika ku mapesenti 85 aya fintu twaishiba, twafyumfwile fye.” Nangula tupoosa inshita yesu ikalamba ukuumfwa, tulapumfyanishiwa, ukulatontonkanya fimbi nelyo ukulaba amapesenti 75 aya fintu tuumfwa. Aya mapesenti twamona ayalelanga ifitupumbula yalekomaila pa cishinka ca kuti tufwile ukuwamyako imyumfwile yesu.

Ukulingana nelyo lyashi, “ukukanakutika bwino e kulenga sana amafya ayengi aya mu bwikashi.” Rebecca Shafir, uwasambilila sana ifya milandile ne myumfwanine, asumina ukuti ici e cilenga sana ukuipaya, ulukaakala pa sukulu, ukonaika kwa ndupwa, no kubomfya imiti ikola.

Abasambilila ifya mikalile ya bantunse batila abantu balipusana imyumfwile. Bamo bafwaya ukuumfwa pa lwa bantu kabili bafwaya ukuumfwa fye tonse utukumine ilyashi. Bambi bafwaya ukuumfwa pa fintu kabili bafwaya kashimika ukufika bwangu pa co alelanda. Lulya lupapulo lwa Star lutila, “e ico ilyo abafwaya ukuumfwa pa lwa bantu balelanshanya na bafwaya ukuumfwa pa fintu, balafilwa ukumfwana.”

Kanshi e mulandu wine Yesu akomaililepo ukuti tulekabila ‘ukucenjela ku fyo tuumfwa.’ (Luka 8:18) Ukuumfwa kusuma kulanga imisango isuma. Cintu cacindama sana mu kulanshanya kusuma. Imitubululo pa fya kucita pa kuumfwa ilyo mulelanshanya isanshamo ukusuulako ku fya kupumbula, ukukongaminako ku ntanshi panono, no kulanga ukuti muleumfwa ukupitila mu kuloleshanya no kusuminina ku mutwe. Apo ifyo tusambilila ifingi fifuma mu kukutika bwino, ukupoosako amano cintu tufwile ukutwalilila ukubombelapo.