Ukuba Abafyashi Bwaice Bwaice

“Cibusa wandi umulumendo ali umusume cata. Alikwete ndalama, kabili twaletandala ku fifulo ifyalekanalekana no kwangala icine cine. Ilyo nshaile ku mweshi uyo mweshi, naishibe ukuti ninjimita. Nshaishibe ifya kweba bamayo. Nshasumine ukuti ici calincitikile kabili nalisakamene. Nali fye ne myaka 16, kabili nshaishibe ifya kucita.”—Nicole.

INO nshita Nicole,a alicila imyaka 30, mufyashi uwa bana batatu uwaicetekela kabili uwacincila. Ibeli lyakwe lili ne myaka 20. Imyaka iyapita Nicole ali pa bakashana abengi ababa na mafumo. Filya fine fye caba ku bakwata abana bwaice bwaice, e fyo cali na kuli wena. Alipelenganishiwe pa mulandu wa ubu bwafya kabili taishibe ifyo ali no kucita nangu ifyali no kucitika ku ntanshi.

Nicole te lingi ashimika ifyamucitikile. Tasumine icacitike. Ilyo akulileko panono icacitike calemutiinya, alikalipe, kabili alipelelelwe. Abanankwe abashaimite bwaice bwaice bena balesakamana pa fyo bali no kufwala ne fyo balebomba ku sukulu. Na lyo line Nicole isubilo talyapwile. Abafyashi bakwe balimutemenwe kabili baleesha na maka ukumusambilisha imibele isuma. Nangu ca kuti pa nshita inono asuulile ifishinte bamusambilishe, no kucula pa mulandu wa kusuula ifyo fishinte—ku ntanshi ifishinte fine asuulile fyalimwafwile ukwikala bwino. Icalemukosha kwishiba ukuti ifintu fikawama na kabili.

Kwena, te bakashana bonse abakwata abana bwaice bwaice ababa na bafyashi abasakamana nga filya cali kuli Nicole—nelyo ukukwata abafyashi abakwata icitetekelo. Abakashana abengi bwangu bwangu balacula ica kuti tabeshiba ne fya kufuma mu bucushi. Bambi nabo baculila fye mu mutima pa mulandu wa kucendwa nelyo pa mulandu wa lukaakala.

Ubwafya ubo abakashana bapitamo bulalenga na bana babo ukuculilamo. Icitabo ca kuti Teen Moms—The Pain and the Promise, cilanda pa bakwata abana bwaice bwaice ukuti: “Ilyo abana babapima tabafina sana, baba abalwalilila, abengi balafwa, kabili tababasakamana bwino mu miti. Abengi balacula ku nsala; kabili balasansalikwa ku lukakala ulwingi no kumonako uko lulecitika kabili balatuusa ukucila abana abafyalwa ku bafyashi abakalamba.” Ilingi line abana abanakashi abafyalwa ku bakashana abafyala bwaice bwaice na bo balapula amafumo bwaice bwaice ukucila abana abafyalwa ku bafyashi aba kuti bali abakalamba.

Ukwimita bwaice bwaice kusekele shani? Abakashana ababa abafyashi bwaice bwaice kuti bacita shani pali ubu bwafya pa kukuusha bwino abana babo? Bushe pali ico twingacita pa kuti twafwe abakashana ukukanaba no bwafya bwa musango uyo? Ifipande fyakonkapo fyalalanda bwino pali aya mepusho.

[Amafutunoti]