Ifyo Mwingafwa no Kucingilila Abana
CILABIPA sana ilyo umukashana aimita bwaice bwaice ukwabula ukuupwa. Na lyo line mwi sonde fye lyonse e fyo caba kabili mu nshila imo bambi balaculilamo. Ubu bwafya bwa kwimita bwaice bwaice bushininkisho fye bumo ubulanga ukuti ifunde lya kwa Lesa lyalilungika ilitila: “Fulumuko bulalelale.”—1 Abena Korinti 6:18.
Lelo, limo limo umukashana uwasambilishiwa inshila sha kwa Lesa kuti asalapo ukusuula nelyo ukukana ifyo asambilila te mulandu no kwishiba ili funde. Kuti alacita ubulalelale na pa numa aimita. Abena Kristu ba cine bacita shani icintu ca musango uyo nga cacitika? Lintu umukashana uwasuulile icine alapila, abafyashi bakwe na bamunyina ne nkashi aba mu cilonganino ca Bwina kristu bafwile ukumwafwa mu kutemwa no kumutungilila.
Moneni na kabili ifyo cali kuli Nicole. Abafyashi bakwe balemusambilisha pa kuti abe Nte ya kwa Yehova. Cifwile calibipile sana lintu aimite ukwabula ukuupwa. Lelo Nicole alebukisha ifyo cali. Atila: “Abena Kristu banandi baleisa ku ng’anda no kwesha ukunkoselesha ukulasambilila Baibolo no kupalama kuli Yehova.”
Tatuletila Inte sha kwa Yehova balakoselesha ubulalelale. Lelo balishiba ukuti pa kukonka ifishinte fya Baibolo, abacitile ifyabipa kuti ‘basanguluka.’ (Abena Roma 12:2) Inte sha kwa Yehova balicetetekela nga nshi ukuti Lesa alalekelela abalapila. (Abena Efese 1:7) Cimbi ico baishiba ca kuti umwana uo banyina baimite ukwabula ukuupwa takwete mulandu. Aba mu cilonganino ca Bena Kristu tabasuula uyo mwana lelo balaba ne citemwishi, inkumbu, ne cikuuku filya fine fye baba na ku bana bambi ababa mu cilonganino.—Abena Kolose 3:12.
Nyina umo umushimbe atendeke ukusambilila Baibolo ne Nte sha kwa Yehova. Tapakokwele atendeke ukukonka ifyo Baibolo ilanda kabili alyalwike sana mu fingi. Alanda ifyo baNte balecita. Atila: “Bonse bali ne citemwiko ca cine cine kuli ine na ku bana bandi. Baletupeela ifya kulya ne fya kufwala lintu twalefikabila, ukubikapo ne ndalama. Lintu nafikilepo ukulaya mu mulimo wa mwi bala pamo ne Nte sha kwa Yehova, balendelela umwana. Balecita fyonse ifyo baishibe ukuti kuti fyangafwa ukutemwa Yehova icine cine.”
Ukucingilila Abana
Icisuma fye kucingilila abana ukukanaba no bu bwafya ubwa kukwata abana bwaice bwaice. Inte sha kwa Yehova kanshi e co batulukushisha ukuba no kutemwa ku bana babo. Tabatiinya abana babo pa kubeba ati kuti bakwata ubulwele bwa AIDS nelyo ukupula ifumo lelo Inte sha kwa Yehova baleesha kusambilisha abana ukutemwa Yehova Lesa icine cine na mafunde yakwe. (Amalumbo 119:97) Balishiba ukuti balakabila ukweba bwino abana pa bwaume no bwanakashi. Icacindamisha ca kuti balishiba ukuti balakabila ukusambilisha abana ifishinte fisuma ifyaba mu Baibolo ukufuma ku bunya. (2 Timote 3:15) Balasanga ukufunda na kumbi ku Mayanda ya Bufumu aya Nte sha kwa Yehova. Lelo abafyashi baNte balakoseleshiwa ukusambilila Baibolo na bana babo pa lwabo. Impapulo shilasabankanishiwa ku kukwafwa abafyashi pa fya kucingilila abana. Lumo pali ishi mpapulo lupapulo lwa, Ifipusho Abacaice Bepusha—Ifyasuko Fibomba.a
Ukukonka ifipimo fyalungama ifyaba mu Baibolo takwendelana ne imibele yabipa iyaisula mwi sonde. Lelo ukukonka ifipimo fya mu Baibolo e kwingacingilila abakashana abengi ku kwimita bwaice bwaice.
[Futunoti]
a Abasabankanya ni Nte sha kwa Yehova.
[Icikope pe bula 28]
Abena Kristu ba cine balasunga abakashana abashaupwa ababa na bana ne cikuuku no kubalangulukilako