Ukulinga Inshita no Kuyakanya Bwino

NANGU ca kuti icacindamisha sana misambilishishe yenu, inshita ya kulandamo ilyashi na yo yalinga ukwangwako. Inshita ya kutampilapo no kupwilapo ukulongana kwesu yalipimwa. Pa kuti iyi nshita ikonkwe kano kwaba ukubombela pamo kuli bonse abali na malyashi pa kulongana.

Mu nshita sha mu Baibolo, imikalile ya bantu tayali nge fi yaba mu fyalo ifingi lelo. Tabalelungatika pa kulumbula inshita, baleti fye “ulucelo,” “akasuba pa kati ka mutwe,” na “icungulo.” (Ukute. 24:11; 43:16; 1 Isha. 18:26) Ilingi takwaleba ukusakamana sana pa lwa kupime nshita mu fyo balecita cila bushiku. Mu fyalo fimo, na ndakai line e fyo caba.

Lelo, nangu ca kuti abantu teti balepoosa amano ku kusunge nshita pa mulandu wa myata yabo nelyo ku kutemwa fye abene, ifwe kuti twanonkelamo nga twapoosako amano ku nshita. Nga ca kuti bengi bakwete amalyashi pa kulongana, inshita ipeelwa ku lyashi limo na limo ilingile ukulangulukwapo. Icishinte cingabomba bwino ku kusunga inshita mu malyashi ya pa kulongana ni cilya citila “lelo fyonse ficitwe busaka busaka kabili mu kukonkana.”—1 Kor. 14:40.

Ifya Kusunga Inshita. Ukupekanya e muti. Ilingi line bakalanda abafilwa ukusunge nshita ninshi tabapekenye sana. Napamo kuti bacishamo ukuicetekela. Nelyo kuti balaalikisha ukupekanya mpaka inshita yapwa. Ukulinga inshita kutendeka no kukatamika ilyashi lyenu no kufwaya ukupekanya bwino.

Bushe ilyashi lyenu lya kubelenga? Intanshi pitulukeni mu Masambililo 4 ukufika ku 7, ayalanda pa kulongoloka, ukupemwina, ukushimpa amashiwi, no kukomaila pa fyebo fipulilemo. Lyene bomfyeni uko kufunda ilyo mulebelenga mu kupongomoka ifyebo mupeelwe. Pimeni inshita. Bushe mulekabila ukwangufyanyako ukubelenga pa kuti mupwishe mu nshita mupeelwe? Angufyanyeniko pa fyebo fishicindeme sana, lelo twalilileni ukupemwina no kucefyako umusenselo ku kukomaila pa fyebo fyacindama. Pitulukenimo imiku ne miku. Ilyo muleya mulelongoloka, cikamwangukila ukupime nshita.

Bushe mukalanda fye ukubomfya ifyo mulembele? Pa kuti mulinge nshita, tacalinga ukufushe fyebo mulembele kwati lyashi lya kubelenga. Ilyo mwalebombela pe Sambililo 25, mwalisambilile nshila isuma. Ibukisheni ifi fishinka fisano: (1) Pekanyeni ifyebo fisuma, lelo fiifulisha. (2) Ishibeni bwino bwino ifishinka fipulilemo, lelo mwisungila ku mutwe amasentensi. (3) Lembeni pali autulaini inshita mulepanga ukubomfya pa ciputulwa cimo na cimo ica lyashi lyenu nelyo ukwishiba inshita ifwile ukupitapo ilyo mwafika pa fishinka fimo. (4) Pa kupekanya, moneni ifishinka ifyo mwingafumyamo nga mwasanga ukuti inshita yamucepela. (5) Landenimo ilyashi lyenu mu kupongomoka.

Ukupituluka mu lyashi mu kupongomoka kwalicindama. Ilyo mulecite fyo, pimeni inshita mulingile ku ciputulwa cimo na cimo ica lyashi lyenu. Pitulukenimo imiku ne miku mpaka lilingane ne nshita mupeelwe. Te kwesha ukupakinkishamo ifishinka ifingi. Ilyo mulepitamo, mwileka ilyashi likumane fye mu nshita yonse mupeelwe, lelo sheniko akashita pantu ukulanda ilyashi ku cintubwingi kulasenda inshita yakulilako ukucila ilyo mulepekanya.

Ukwakanya Ifiputulwa. Ukwishiba ukulinga inshita kwalyampana sana no kwakanya bwino ifiputulwa fya lyashi. Inshita ikalamba ilingile ukupooswa mu kati ka lyashi. Umu e mwaba ifishinka fikalamba. Intendekelo ilingile ukuba fye iya butali bwalinga pa kuti ifike pa buyo butatu ubwalandwapo mwi Sambililo 38. Tamulingile ukucishamo ukulefya ilyashi mu kati ica kuti mwabulwa ne nshita ya kusondwelela bwino, ukulingana ne Sambililo 39.

Nga mwabombesha ukulinga inshita, ilyashi lyenu likawama kabili mukalanga ukuti mwalicindika abakwete amalyashi pa kulongana kabili mwalicindika ne cilonganino conse.