Umukululo Wa Fipusho

◼ Bushe kuti twacita shani pa kuti ukulongana kwa pa cilonganino kulepwa mu nshita?

Inshita ilenda bwangu nga ca kuti tulelanshanya ifisuma ne fibusa. E ico, kuti cayafya ukupwisha ukulanda ilyashi mu kulongana mu nshita tupeelwe. Cinshi cingatwafwa?

Tendekeni ilyo fye inshita yakumana. Abantu mu cilonganino nga balongana, kuti cawama ukweba ibumba ukwikala cilya kwashala miniti umo nelyo babili pa kuti ukulongana kutendeke pa nshita yapimwa kabili mu muyano. (Luk. Mil. 3:1) Tamufwile ukucelwa ukutendeka ukulongana kwa bantu abanono, pamo ngo kukumana kwa kuya mu mulimo wa mwi bala, pa mulandu wa kulolela abacelelwe.

Pekanyeni bwino. Inshila imo iya kupwishishamo ukulanda ilyashi mu nshita kupekanishisha kabela. Umfwikisheni ubufwayo bwa ilyo lyashi. Ishibeni ifishinka fikalamba ifili mu lyashi kabili e fyo mukomailepo. Mwilabikilwa ku kulanda pa fishinka finono. Ilyashi libe ilya-anguka. Nga ca kuti mu lyashi muli ifilangililo nelyo ukwipusha, pitulukilenimo kabela. Nga cingacitika, ilyo mulepituluka mu lyashi lyenu mu kupongomoka, pimeni inshita.

Akanyeni ifyebo fya mu lyashi. Nampo ilyashi lyenu lya kulanshanya ne bumba lyonse atemwa iyo, kuti camwafwa ukwakanya mu fiputulwa ifyebo fili muli ilyo lyashi. Moneni inshita muli no kupoosa pa ciputulwa cimo na cimo, kabili langilileni ici pali autulaini wenu. Lyene muleceba pa nshita ilyo mulelanda ilyashi. Mu lyashi lya kulanshanya ne bumba lyonse, mwileka abengi ukwasukapo ilyo mwatendeka fye ilyashi epali mwaisakwankwanya ifyebo ficililepo ukucindama ifili ku ntanshi. Abatungulula Isambililo lya Ulupungu lwa kwa Kalinda bafwile bashako inshita ya kupituluka mu mukululo wa kupitulukamo pa mpela ye sambililo. Bafwile ukumona ukuti tabengile mu nshita ya lwimbo lwa kusondwelela ne pepo.

Sondweleleni mu nshita. Nga ca kuti ukulongana kukwete imbali shalekanalekana, pamo ngo Kulongana kwa Mulimo, kalanda umo na umo afwile ukwishiba inshita ilyashi lyakwe lyalatendeka no kupwa. Cinshi cingacitwa nga ca kuti camoneka kwati mwalacelwa ukupwa ukulongana? Munyina nelyo bamunyina balakonkapo kuti balanda fye pa fishinka fikalamba no kukanalanda pa fyebo fimbi pa kuti bapwishe mu nshita. Ukucite ci cishibilo ca kwa kasambilisha walamuka.

Fwe bali mwi bumba kuti twaafwa munyina aletungulula pa kwasuka ifyasuko ifipi kabili ukulungatika pa cishinka. E ico, ifwe bonse kuti twaafwako mu kulenga ukulongana kwaenda “busaka busaka kabili mu kukonkana.”—1 Kor. 14:40.