Ifya Kupekanya Ukulongana kwa Mulimo
1. Cinshi Ukulongana kwa Mulimo kwabelako, kabili kuti twacita shani pa kuti tulenonkelamo?
1 Ico Ukulongana kwa Mulimo kwabelako, kwa kutwafwa ukulabomba bwino umulimo. Kulanda sana pa kubila imbila nsuma iya Bufumu, ukupanga abasambi, no kubila ubupingushi bwa kwa Lesa ubuli mupepi. (Mat. 28:20; Marko 13:10; 2 Pet. 3:7) Nga natupekanya bwino, natuipekanya no kwasukapo, kuti tulenonkelamo sana muli uku kulongana kwacindama.
2. Kuti twaipekanya shani ukukutika ku lyashi?
2 Ilyashi: Ilingi line mu fyebo fya kukonka pa kulanda ilyashi balalangilila no mufumine ilyashi. Kuti mwabelenga ifyebo umufumine ilyashi, na malembo ayalimo, kabili mufwile no kutontonkanya pa fyo mwingakonka ifyo fyebo pa kushimikila abantu.
3. Finshi twingacita pa kupekanya ilyashi lya kulanshanya kwa fipusho ne fyasuko?
3 Ilyashi lya Kulanshanya Ifipusho ne Fyasuko: Ili lyashi lilingile ukulaba kwati lisambililo lya Ulupungu lwa kwa Kalinda, takuba kulandapo sana pa ntendekelo na pa nsondwelelo. Mulingile ukushila pa fishinka ifili muli paragrafu imo na imo, no kuipekanya ukuya-asukapo bwino mu mashiwi fye ayanono.
4. Kuti twapekanya shani ilyashi lya kulanshanya na bali mwi bumba?
4 Ilyashi lya Kulanshanya na Bali mwi Bumba: Ili liba fye lyashi, lelo kalanda aleba ne cilonganino ukulandapo. Nga namushila ifishinka, namubelenga na malembo ayalimo, kuti mwa-asukapo ilyo kalanda aipusha icipusho. Munyinefwe uulelanda ili lyashi nga afika apali ifishinka ifikalamba, afwile ukushininkisha ukuti abali mwi bumba balandapo.
5. Finshi fyakulatwafwa pa kuti tulenonkelamo sana mu filangililo?
5 Ifilangililo: Mu malyashi yamo mulaba ne filangililo, ukulangilila ifyo mwingakonka ifyebo mulesambilila ilyo muleshimikila mu cifulo cenu. Baeluda nelyo bakasabankanya abaishiba sana ukushimikila nelyo bapainiya kuti babeba ukucita icilangililo. Pa kupekanya ilyashi umuli ne filangililo kuti muletontonkanya na pa fyo ifilangililo fili no kuba. Nga nabalemba ifya kukonka pa fya kucita icilangililo, kuti mwatontonkanya na pa fyo mwingalanda ne fyo mwingaalula ilyashi ukulingana na bantu mulelandako. Ilyo muleya mu kulongana, mwilalaba ukusenda ulupapulo nelyo magazini iyo bali no kubomfya mu cilangililo. Pa bushiku bwa Mapepo ya Lupwa, kuti cawama sana nga mwapituluka mu filangililo.
6. Cinshi ico tufwile ukulapekanishisha Ukulongana kwa Mulimo?
6 Nga natuipekanya ilyo tuleya mu Kulongana kwa Mulimo, natwishiba ne fyo twalayasambilila, kuti twanonkelamo nga nshi. Nga tulepekanya lyonse kuti tulekoseleshanya sana. (Rom. 1:11, 12) E lyo kabili nga tulepekanya Ukulongana kwa Mulimo, tukaba abaipangasha ukubomba bwino umulimo wesu.—2 Tim. 3:17.