Ukulongana kwa Mulimo Kulatupangasha ku Kubombo Mulimo Onse Usuma

¹ Imifwaile ya Kulongana kwa Mulimo yaba kutukunta no kutupangasha ku kwakana mu kukumanina mu mulimo wa kushimikila no kupanga abasambi. (2 Tim. 3:17) Nangu cibe fyo, nga ca kuti tatupekanishishe uku kulongana bwino nelyo nga twafilwa ukubomfya ifyo tusambilila, ukunonkelamo kukaba ukunono.

² Ukupekanishisha kabela kukakwaafwa ukwingisha ukufunda ukufika ku mwisulo. Pituluka mu fitabo fili no kubomfiwa, kabili isa na fyo ku kulongana pa kuti wingalakonkamo no kuba na maka ya kwakanamo. Ba kakutika wasakamanisha, kabili lemba ifyebo fya kubomfya pa numa.

³ Kangalila wa kutangilila alapituluka mu mbali shatantikwa isha kulongana mu kusakamanisha. Baeluda bafikapo na babomfi batumikila, abashintililwapo balapeelwa ukupekanya imbali. (om-CW ibu. 70) Ifilonganino ifyakwata baeluda abanono na babomfi batumikila kuti pambi fyabomfya bamunyina bafikapo bambi ku kubaafwa. (km-CW 12/76, Umukululo wa Cipusho) Kalanda umo na umo alingile ukupekanya bwino nga nshi, ukukakatila mu kupalamisha ku kutungulula kupayanishiwe, no kushininkisha ukuti taliile nshita.

⁴ Ukulongana ilingi line kutendekela ne fya kubilisha. Munyina uupeelwe ukubomba pa fya kubilisha alingile ukukumana na kangalila wa kutangilila mu kubangilila ku kumona milandu nshi ilekabila ukulumbulwa. Iyi kuti yasanshamo amakalata ukufuma ku Sosaite nelyo ifya kucinkulako pa lwa kutantika kwa mulimo nelyo amalipoti ya cila mweshi. Kuti pambi twaishibo kuti kuli abalwele abalekabila ukupempulwa nelyo ukumfwa ifishinka fya kulonsha ifya mibombele ya cilonganino itantikwe iya nshita ya ku ntanshi. Peepekako pa kuti wishibe kabili ukabe uwaipekanya ku kubomba ulubali lobe.

⁵ Lintu ulubali lwa kulongana lulefwaya ukwakanamo kwe bumba lyonse, pekanya ukupitila mu kubelenga ifyebo na malembo. Tontonkanya pa lwa fintu ulepanga ukubomfya imitubululo no musango wa fyasuko ifingakoselesha bambi. Kuti pambi walangilila ubucindami bubomba ubwa kufunda pa kushimika ica kukumanya icipi.

⁶ Lintu kuli icilangililo, esha ukuibika we mwine mu mibele yapalako, kabili tontonkanya pa lwa fintu wingasosa. Kutika ku milandu ya kushinina ilebomfiwa ne mipelulwile. Esha ukwibukisha fintu wasosele umuku wa kulekelesha waisangile mu mibele ya musango umo wine, kabili languluka ifyo ifishinka mu cilangililo fingakwaafwa ukukwata ifya kufumamo fyawaminako ku nshita ya ku ntanshi.

⁷ Abaleyakana mu filangililo no kwipusha balingile ukupitulukilamo libela bwino. Umo na umo alingile ukwishiba ico ali no kusosa na cintu ali no kucita pa cisebele. Imbali shabula ukupitulukamo te lingi shikunta nelyo ukukoselesha ibumba. Bamo besa abaipekanya ku kupituluka mu lubali lwabo pa mpela ye Sambililo lya Ulupungu lwa kwa Kalinda pa kuti bengabelesesha pa cisebele no kuleka bamunyina abalebomba ku fisoselo beshibe icili no kukabilwa.

⁸ Programu inshita shimo shimo akasanshamo ilyashi lilebomba no kukabila kwa kulungatika ukwa cilonganino nelyo icipande ca mu Ulupungu lwa kwa Kalinda ica pa nshita yalinga. Kutika mu kupalamisha, umfwila ukufunda, no kwesha ukukubomfya.

⁹ Tulefwaya ukuba ‘abapekanishiwa ku kubombo mulimo onse uusuma.’ (2 Tim. 2:21) Ukulongana kwa Mulimo ni kumo ukwa kupayanya uko Yehova acita ku kutwaafwa mu kucite fyo. Ukusangwako kwa lyonse no kubombesha kwafumaluka ku kubomfya ifyo tusambilila mu kushininkisha fikatwaafwa pa kuti ‘twingafishapo bukapyunga bwesu.’—2 Tim. 4:5.