Ifyo Abakwete Amalyashi mu Kulongana kwa Mulimo Balingile Ukulacita

Ukutendeka no Ubutumikishi Bwesu Ubwa Bufumu ubwa uno mweshi, amashiwi yamo tubomfya mu kutantika kwa Kulongana kwa Mulimo nomba nayalukako. Ifya kucita pa kulongana e lyo ne fya kutucinkulako ifyo twalalandapo nomba, e fikapyana ifyalembelwe mu cipande caletila “Ifya Kupekanya Ukulongana kwa Mulimo,” icali mu Ubutumikishi Bwesu Ubwa Bufumu ubwa May 2009.

◼ Ilyashi: Nga batila Ilyashi, ninshi munyinefwe uupelwe ilyo lyashi alekabila ukulanda ku cilonganino ukubomfya ifyebo bamupeele ukwabula ukuti abali mwi bumba baleasukapo. Uulelanda ilyashi alingile ukubika sana amano ku fingaafwa sana aba mu cilonganino.

◼ Ifipusho ne Fyasuko: Nga filya fine ciba pe Sambililo lya Ulupungu lwa kwa Kalinda, uulelanda ili lyashi alingile ukulanda amashiwi ayanono pa kutendeka e lyo na pa kusondolwela, e lyo alingile ukwipusha amepusho mu maparagrafu yonse. Uuletungulula talingile ukulalandapo sana. Amalembo umuli ifishinka yalingile ukubelengwa nga ca kuti inshita eko icili. Amaparagrafu tayalingile ukubelengwa kano fye nga nabalanda ukuti mubelenge.

◼ Ukulanshanya: Nga batila ukulanshanya, ninshi abali mwi bumba balingile ukulandapo mu nshita mu nshita. Uulelanda ilyashi tafwile ukulalanda fye eka, e lyo kabili tafwile ukulaipusha fye ifipusho e lyo abali mwi bumba baleasuka ukupulinkana fye ilyashi lyonse.

◼ Ifilangililo no Kwipusha: Nga batila citeni icilangililo ninshi balelosha mu kuti munyinefwe uulelanda ilyashi e ulingile ukupekanya icilangililo; lelo kwena umwine talingile ukubamo muli ico cilangililo. Abo asala ukuti bamwafwe ukucita icilangililo balingile ukuba abafikapo, abengalangilila bwino bwino kabili abaishibikwa ukuti balikwata imibele isuma, kabili alingile ukupekanya na bena ilyo kucili inshita nga kuti akwanisha. Te kuti ciwame ukubomfya bakasabankanya abapya kabili abashilaishibisha ukushimikila ukuti bacite icilangililo pa fyo tulingile ukubomba umulimo pa mulandu fye wa kuti mulefwaya ukutila nabo banineko pa cisebele. Lelo kwena bamo kuti mwababomfya ukuba abene ba ng’anda. Bakasabankanya abalelangilila ifya kushalika ulupapulo tabalingile ukufutatila ibumba. Mu lyashi nga muli no kwipusha, abo muleipusha tabalingile ukwikala mwi bumba mu fipuna iyo, lelo balingile ukulalondolola nelyo ukwasuka ifipusho ilyo bali pa cisebele. Mu lyashi lyenu nga muli ifilangililo no kwipusha, ninshi mulingile ukupitulukamo muli fyonse. Nga ca kuti munyinefwe uukwete ilyashi nabamuliila inshita, ninshi alingile ukwipifya ilyashi lyakwe, pa kuti efumyamo ifilangililo nelyo ukwipusha. Ababomfi batumikila balingile ukwipusha kampanya we bumba lya baeluda nelyo eluda umbi nga balefwaya abengabafwako ukucita ifilangililo nelyo aba kwipusha.

Nga ca kuti mu lyashi muli fimo ifya kucita ifyaibela, uulelanda ilyo lyashi alingile ukukonka bwino bwino ifya kucita. Nga ca kuti bamunyinefwe balekonka ifi twalandapo ilyo bapeelwa amalyashi mu Kulongana kwa Mulimo, bakalenga Ukulongana kwa Mulimo ukulaenda ‘bwino bwino kabili ukwabula icimfulunganya.’—1 Kor. 14:40.