Ukucitilo Bunte mu Bukwebo Umusango wa Cina Japan

UKUKAMBISHA kwa kwa Yesu Kristu ukutwala pa ntanshi umulimo wa kucitilo bunte ukufika “ku mpela ya pano nse” kufwile ukusanshamo incende sha bukwebo. (Imilimo 1:8) Mu Japan, ukupeela ubunte bwa Bufumu ku bantu ababomba mu fibombelo fya cintubwingi na maofesi ya makampani yakalamba kupeela ukusonsomba kwa cine cine. Bakasabankanya ba Bufumu mu cilonganino cimo bapokele ulusa ku kucitilo bunte bwa bamagazini mu cikuulwa ca maofesi ya mu musumba mu kati ka kutusha ku ca kulya ca kasuba. Bakasabankanya tabapepele fye kuli Yehova ukubapeelo ukushipa lelo bapeeleko ukusakamana kukalamba ku mifwalile yabo ne myendele kabili bapekenye fye na mabaji ukulangisha amashina yabo no kubeshibisha pamo nge Nte sha kwa Yehova.

Nte ali no kutununuka umubomfi, ukusosa ukuti: “Njeleleniko, nalipeelwa ulusa ulwa kulanda ku bantu muno. Bushe kuti mwakutikako kuli ine ilintu mulelya?” Nte ali no kulanga ubupingushi busuma no kubomfya amashiwi “yalungwamo umucele.” (Abena Kolose 4:6) Pa kutandala kwabo ukwa kubalilapo, bashalike bamagazini 39, lelo casendele ukufika ku kutandala kune pa kufimba icikulwa conse ica ntunti cinekonsekonse umo abantu 1,500 babomba. Bashalike ubwingi bonse ukucila pali bamagazini umwanda umo kabili bali na maka ya kutendeka impito sha magazini no kucita ifipempu fya kubwelelamo.

Umo uwa bakasabankanya acitile icipempu ca kubwelelamo kuli maneja. Lintu aumfwile ilembo ukubelengwa ukufuma muli New World Translation, asosele ukuti: “Iyi Baibolo yalyanguka ukumfwa. Imo iyo nabelengele intanshi yali mu ciJapanese ca kale kabili yali iyakosa ukubelenga.” Kope wa New World Translation alitwelwe kuli wene umulungu wakonkelepo.

Bushe kuti wacita ifyafulilako mu cifulo ca cilonganino cenu ku kushimikila imbila nsuma ku “bantu bonse,” ukusanshako abo ababa mu fitungu fya bukwebo?—Linganyeniko 1 Timote 2:4.