Wipusa Ibungano lya Citungu ilya “Lulimi Lwine Lwine”!
INSHIKU shine isha kulambula isha kukambisha kwa mu Baibolo shilekupembelela. Sangwapo lintu programu atendeka pa 1:30 p.m. pali Cine. Ipakishe ilyashi lya kucincimusha umuntontonkanya ilya kuti “Bushe Ifibusa Fyobe, Fibusa fya kwa Yehova?” pamo pene ne lyashi likalamba, “Ululimi Lwine Lwine ku Nko Shonse.” Ilyashi lya kusondwelela mu cungulo, “Ukupususha Ubumi Bobe Mu Kuba No Mulopa—Shani?,” likasuka icipusho ca kuti: Bushe umulopa mu cine cine ulakabilwa ku kupususha ubumi?
Iciputulwa ca kulongana ica lucelo pali Cisano cikatendeka pa 9:30. Ba palya ku kumwenamo ukufuma ku lyashi lya kusonsomba “Kristu ‘Apatile Ukubulwe Funde’—Walikupata?” ne lyashi lya kukunta “Kaana Ukwelenganya kwa ku Calo, Supila ifya Cine Cine ifya Bufumu.” Mu kati ka cungulo, ukutubulula kubomba pa fya kwikalila mu malipilo yobe aya mu fya ndalama kukapayanishiwa. Abafyashi bakalangwa ifyo bengafikilisha mu kucilapo kufumamo cimo ukukakililwako kwabo, ne cilangililo ca muno nshiku cikapeela imisepela ubutungulushi bwawamisha ukukuma ku kuibimbamo mu mibombele ya pa numa ye sukulu.
Iciputulwa ca kulongana ica lucelo pa Cibelushi cikalangisha ilyashi pa kuipeela no lubatisho, pamo pene no kulanguluka ukukabila kwa kucita malambo pa kucita isambililo lya Baibolo ilya pa lobe. “Iceleta lya fya mu Mulu ilya kwa Yehova lili pa Kusela” lyashi lya kukumbamo pali programu wa cungulo. Na kabili, kukabako ifya kucinkulako fya maka ukukuma ku fishingamo fyesu ifya Bwina Kristu ku kwaafwa abo abapofushiwa ku butotelo bwa bufi, kabili ukwaafwa kubomba kukapeelwa ku kufikilisha ici cishingamo.
Ukafwaya ukubapo ulucelo pa Mulungu ku kukutika ku bukombe bwa maka ubo bukapeelwa ukulwisha Kristendomu na bashibutotelo bakwe. Ili likakonkwapo ne cilangililo ca mingila yakumanina ukushimpwa pa fya kuponako fibimbamo ubumi bwa kwa Yehu na Yonadabu. Lyene, mu cungulo, shininkisha ukukutika ku lyashi lya cintubwingi ilya kuti, “Ikataneni ku Lulimi Lwine Lwine.”
Mu kati ka August na September, amabungano yafulilako ukucila pali 30 nayatantikwa ukupulinkana Zambia yeka, e co kukabako limo te kutali sana ukufuma ku mwenu. Bebeteni ne Nte sha kwa Yehova isha mu mwenu ku nshita ne cifulo ifya limo ilipalamishe kuli iwe.