Sangwa kwi Bungano lya Citungu Ilya “Bakatemwa ba Buntungwa”!

INSHIKU shitatu isha kulambula isha kufunda kwa Baibolo shilekulolela. Sangwapo pa 10:20 pali Cisano ulucelo lintu ibungano likatendeka mu kuba ne nyimbo. Ipakishe ilyashi lya kwiswila, “Mulandu Nshi Ukulolesha mu Malango Yapwililika aya Buntungwa?,” no lubali lwa kusondwelela ulwa ciputulwa ca kulongana kwa lucelo, ilyashi likalamba: “Imifwaile no Kubomfiwa kwa Buntungwa Bwesu Ubwapeelwa na Lesa.”

Pali Cisano icungulo, ukukonkomesha kukapayanishiwilwa Abena Kristu ku kwisushisha ukutumwa kwabo nga batumikishi ba kwa Lesa. “Abapamfiwa—Mu Milimo Yafwa Nelyo mu Mulimo wa kwa Yehova?” na “Abantu Balubuka Lelo Abali no Kulubulula” iyi e ibili iya mitwe iikalundululwa. Ukukoselesha ku kubomfya ubuntungwa bwa umo ku kubombela Yehova kukapayanishiwa mu cilangililo ca mingila. Cikafuma ku fya kukumanya fya kwa Esra na bakubishanya nankwe ababwelele ukufuma ku Babiloni ukuya ku Yerusalemu mu 468 B.C.E. ku kuyemfya itempele lya kwa Lesa.

Iciputulwa ca kulongana ica pa Cibelushi ulucelo cikakwata ukukonkana kwa malyashi ya mbali shitatu, “Ubuntungwa mu Kuba ne Cishingamo mu Cinshingwa-Ŋanda ca Lupwa.” Ukukonka pa lyashi lya kufwailisha umweo “Isunge we Mwine Umuntungwa ku Kubombela Yehova” likaba lyashi pa kuipeela kwa Bwina Kristu no lubatisho. Mu cungulo abengi bakalolela mu kuba no kwenekela ulubali “Bushe Icupo e Lufungulo ku Nsansa?” Iciputulwa ca kulongana cikasondwelela mu kuba no kwebekesha uko mu kukanatwishika kukaleta ubuseko bukalamba kuli bonse bakatemwa ba buntungwa.

Ukafwaya ukubapo pa Mulungu ulucelo ku kumfwa ukukonkana kwa malyashi ya mbali shitatu “Ukubomba nga Balondo ba Bantu.” Uku kukalanda pa cilangililo ca kwa Yesu ice sumbu ne sabi kabili kukalanguluka ulubali twingakwata mu kufikilishiwa kwa ciko. Iciputulwa ca kulongana kwa lucelo cikasondwelela na malyashi yakatama “Ukutwalilila Abalola mu ‘Nshita ya ku Mpela’” na “Nani Akapusuka ‘Inshita ya Kumanama’?” Lyene, mu cungulo kasuba, tawakafwaye ukupusa ilyashi lya Baibolo, “Ukwawila Icalo Cipya ica Kwa Lesa ica Buntungwa.” Pa ntanshi ya lyashi lya kusondwelela ilya kukumbamo, kukabako ukulanshanya kwa cipande ce sambililo lya Ulupungu lwa kwa Kalinda ilya uyo mulungu. Leteni kope wenu uwa magazini wa kusabililamo uyo mulungu.

Mu kati ka August na September, ukucila pa mabungano 46 yalitantikwa ukupulinkana Zambia yeka, e co kukabako limo te kutali sana ukufuma ku mwenu. Bebeta ne Nte sha kwa Yehova pa mwenu ku nshita ne cifulo ica lili mupepi na iwe.