Ifipusho Ukufuma ku Babelenga

Bushe kalemba wa Amapinda 30:19 mu cine cine ayumfwile ukuti fintu umwaume mu bucenjeshi abeleleka umukashana ‘cipesha amano’?

Ubo kuti bwaba bupilibulo bwa Amapinda 30:19, icishaba icikomo cayanguka ukumfwikisha kwena.

Mu kufwailisha ubupilibulo bwa ici cikomo, tatulingile ukusuulako amashiwi yashingulukako. Pa ntanshi fye ya ici cipande, kalemba wapuutwamo atantike fintu fine ifyo mu nshila shimo fyaba ifishingekushiwa. (Amapinda 30:15, 16) Lyene atantike uyu mutande: “Kwabe fintu fitatu ifyampesha amano, fine ifyo nshaishiba: imyendele ya kwa kapumpe mu lwelele, imyendele ya nsoka pa cilibwe icasansuka, imyendele ya ngalaba pa kati ka bemba, ne myendele ya mwaume ku mukashana.”—Amapinda 30:18, 19.

Cinshi cali ‘icipesha amano’ muli ifi fintu fine?

Nakalimo ukuyumfwa ukuti ‘icipesha amano’ cifwile ukutubulula icashininkishiwa nelyo icisuma, abasambilila bamo balondolola ukuti cimo cimo ica ifi fintu fine cilangisha amano ya bubumbo bwa kwa Lesa: icisungusho ca fintu icuni cikalamba cingapupuka, fintu insoka iyabula amolu ingasela ukulalanya icilibwe, fintu ingalaba yafina ingeleela pali bemba walulunkana, na fintu umusepela wa maka engaba mu cintemwa mu kubulwe subilo no kuupa umukashana wayemba, kabili bafyala umwana wa buntunse wayemba. Profesa umo asangile ukupalana na kumbi muli ifi fintu fine, ukuti cimo cimo ica fyene ciya mu nshila iipya cila nshita—ukuya kwa kwa kapumpe, insoka, ne ngalaba ukushili inshila no bupya bwa kutemwa kulelunduluka ukwa mulumendo no mukashana.

Nangu cibe fyo, ifi fintu fine tafilekabila ukuba ‘ifipesha amano’ mu mano ayasuma, kwati nalimo fintu fyakwata mu cinkumbawile fyaba fimo ifyashininkishiwa. Amapinda 6:16-19 yatantika “ifintu . . . ifyo Yehova apata.” Kabili nga fintu camonwa, pa ntanshi fye ya fikomo filelangulukwapo, Amapinda 30:15, 16 yatantika ifintu (Imbo, ifumo lishifyala, umushili wauma, no mulilo ulebilima) ifishitila, “Epela.” Mu kushininkisha tafyaba fisuma mu cipesha amano.

Ishiwi lya ciHebere ilyapilibulwa ‘cipesha amano’ pa Amapinda 30:18 lipilibula “ukupaatula, ukulekanya; ukupanga ukulekanya, icaibela, icipesha amano.” Icintu kuti caba icingalekanishiwa, icaibela, nelyo icingapesha amano ukwabula ukuti cibe icisuma. Daniele 8:23, 24 asobele imfumu yakalipisha iyali no kuleta ukonaula “kwa kupesha amano” kabili “ikonaula aba bulamba,” ukusanshako aba mushilo.—Linganyeniko Amalango 17:8; 28:59; Sekaria 8:6.

Icikomo cikonka pa Amapinda 30:18, 19 kuti pambi capayanya icasuko ku cintu kalemba asangile icayafya ukumfwikisha. Icikomo 20 cilumbula umwanakashi wa bucende uyo “[uwalya], afuuta na pa kanwa, ati, Nshicitile kabi.” Nakalimo mu bumfisolo kabili mu kufutika nabembuka, lelo apantu tapali icishibilo ca musoka wakwe, kuti atunga ukuba uwakaele.

Kwalibako ukupalana ku mutande ufumineko. Kapumpe alela mu mulu, insoka ilalanya icilibwe, ingalaba ipula mu matamba—tapali icili conse ica ifi icisha amakuba, kabili kuti caba icayafya ukulonsha inshila iya cili conse ica ifi fitatu. Nga ca kuti ici e caseeka kuli ifi fitatu, ni shani pa lwa calenga bune, “imyendele ya mwaume ku mukashana”?

Ici naco kuti caba icishingalonshiwa. Umulumendo kuti pambi abomfya inshila sha kufutika, ishatelela, kabili isha bucenjeshi ku kongola icintemwa ca kwa nacisungu wa kaele. Ukuba uushabelesha, pambi te kuti amone micenjelo ya mulumendo. Nelyo fye ni pa numa ya kubelelekwa, te kuti abe na maka ya kulondolola ifyo amongwele; aba kutambako nabo bene kuti pambi bacisanga icayafya ukulondolola. Nalyo line, abakashana abengi balilufya ubulumba bwabo ku ba kubeleleka incenjeshi. Caliba icakosa ukulonsha inshila ya balumendo ba musango uyo incenjeshi, nalyo line balikwata ubuyo, nge ficita kapumpe ulepupuka, insoka ileikula, nelyo ingalaba pali bemba. Ku bakubeleleka, ubuyo bwaba kuliila pa mutwe ukwa kwampana kwa bwamba.

Mu kulanguluka ici icishinka ica Amapinda 30:18, 19 tacaba pa lwa fintu fya busayansi nelyo ifiicitikilako mu bubumbo. Ukucila, ifikomo fitupeela ukusoka kwa mu mibele isuma, kwati fye fintu Amapinda 7:1-27 yasoka pa lwa kusengauka amasanso ya kwa cilende unashanasha. Inshila imo iyo ba nkashi ba Bwina Kristu bengomfwilamo ukusoka kwa Amapinda 30:18, 19 yaba kulosha ku baume abatunga ukukwata ubuseko mu kusambilila Baibolo. Nga ca kuti umwaume wa bucibusa, nelyo fye untu babomba nankwe, alemoneka ukulangisha ubuseko bwa musango uyo, nkashi alingile ukumutungulula kuli munyina mu cilonganino. Munyina kuti aikusha ubuseko ubuli bonse ubwine bwine ukwabula amasanso ya “mwaume ku mukashana.”