Ilyashi lya Bakabilisha ba Bufumu

Abali Kale pa Bulwani Baikatana mu Kubombela Yehova

“UMUKU wa kubalilapo naumfwilepo pa lwa Nte sha kwa Yehova cali ilintu nalebomba ngo mushilika wa kulonda uwa mfuti mu Bosnia,” e filondolola Branko.a

Branko alelonda pa cipatala cimo uko abaleshala impondo baleundapilwa. Umo uwa badokota alesambilila Baibolo ne Nte, kabili ilyo alebomba ubushiku, alondolwelele Branko ifingi pa lwa fintu alesambilila muli Baibolo.

Cintu Branko aumfwile ilya nshita ya bushiku calimuseseshe nga nshi ica kuti ilyo line fye alilekele incito ya kubomba ne fyanso. Afwaile baNte, ukufwaisha ukusambilila ifyafulilako. Pati papite nshiku shinono, pa numa ya kukuukila ku calo ca ku Bulaya cimbi, Branko afwailishe ukwali Iŋanda ya Bufumu kabili asangilwe ku kulongana ku cilonganino ca Nte sha kwa Yehova icibomfya ululimi lwa ciYugoslavian. Uko e kuntu Branko akumenye Slobodan.

Slobodan na o afumine ku Bosnia kabili abombele ngo wa kuitemenwa mu nkondo imo ine iyo Branko alimo—lelo bali ku mabumba yalelwishanya. Slobodan aali ku lubali lwa bena Serbia ilyo balelwisha abena Croatia. Pa nshita bakumene, Slobodan aali ni umo uwa Nte sha kwa Yehova uwabatishiwa. Aliipeele ukuti alesambilila na Branko, uwali kale umulwani wakwe. Ilyo isambililo lyalelunduluka, Branko aishileishiba ifyafulilako pa lwa kwa Yehova, kabili ukutemwa kwakwe ukwa kuli Lesa kwalikulile. Ici caseseshe Branko ukupeela ubumi bwakwe kuli Kabumba. Mu October 1993 alangishe ukuipeela kwakwe ukupitila mu lubatisho lwa mu menshi.

Ni shani fintu Slobodan asangwike umo uwa Nte sha kwa Yehova? Afumine ku nkondo mu Bosnia mu kubangililako. Alibelengelepo impapulo sha Nte, lelo tacitilepo nangu cimo ukufikila Inte shibili shamutandalile pa mwakwe mu kutendeka kwa 1992 e lintu ubuseko bwakwe mu Cebo ca kwa Lesa bwakulile. Nga nani uwatandalile Slobodan, ukuipeela ukusambilila na wene? Aali ni Mujo, na o wine uwafumine ku Bosnia lelo uwakushiwe ngo Mushilamu. Ilyo isambililo lya Baibolo lyalelunduluka, Mujo na Slobodan, abali pa nshita imo pa bulwani, balepoosako inshita capamo cila bushiku ku kukosha icitetekelo ca umo no munankwe.

Inkondo ya mu cali kale Yugoslavia yalisenda imyeo ya myanda ya makana iya bantu. Lelo Branko, Slobodan, na Mujo nomba balebomba bukashimikila bwa nshita yonse ubwa mbila nsuma mu cilonganino cimo cine ica Nte sha kwa Yehova. Balicimfya ukukangana kwa mabumba ya mikowa ne mishobo, kabili nomba bafwaya umutende ilintu balenakila kuli Kabumba, Yehova.

Lelo cinshi caleteleko ukwaluka kwa musango yu? Cali pa mulandu wa kuti balitemenwe Yehova, ukucindika Baibolo, no kufwaisha ukubomfya icine ca mu Baibolo mu myeo yabo. Kwati fye fintu Amalembo ya Mushilo yasosa, “Icebo ca kwa Lesa ca mweo, kabili caliluma . . . [kabili] cilingulula amatontonkanyo na ’mapange ya mutima.”—AbaHebere 4:12.

[Futunoti]