Kampeni Watunguluka uwa Trakiti wa Imbila ya Bufumu

“MULANDU NSHI mu Bumi Mubelele Impika Shafulishe Fi?—Bushe Kuti Kwabako Paradise Uwabulwamo Impika?” Uyu wali e mutwe wa trakiti wa Imbila ya Bufumu Na. 34, uwa mabula yane uwaananishiwe mu kusaalala kwa calo mu ndimi 139 mu kati ka April na May umwaka wapwa. BaNte abena Jamaica bamo balondolwele uyu kampeni wa mulimo nga “cimo ica fyapulilemo mu kati ka mwaka.” Inte mu Belgium shainike uyu kampeni nge “ntulo ya buseko bukalamba kuli bamunyina.” Mu Ripabuliki ya Czechia, uyu wali e muku wa kubalilapo uo Inte sha kwa Yehova shakwete ishuko lya kwakana mu kwananya trakiti wa Imbila ya Bufumu. Umusambo washimika ukuti: “Kampeni yaleteleko umupashi wa kupimpa kabili uwa kucincimusha.” Ukuyumfwa kwapalako kwalishimikwe mu fyalo ifingi.

Trakiti wa Imbila ya Bufumu Na. 34 alikwete ubukombe bwaibela kuli abo abateta no kulila pa mulandu wa fya muselu ificitilwa mwi shina lya mipepele. (Esekiele 9:4) Yalikwetemo icisansamushi kuli abo bantu ubumi bwabo bucushiwa pa mulandu wa “nshita ishayafya” isho bashakwatilapo maka ya kulama. (2 Timote 3:1) Ukusonta kuli Baibolo, trakiti alangile ukuti amafya ya mu bumi yali no kupwa mu kwangufyanya. Paradise uwabulwamo amafya akabako mu cine cine. (Luka 23:43) Abengi ababelengele trakiti wa Imbila ya Bufumu balinashanashiwe ku bukombe bwa iko. Umwaume umo mu Togo aebele Nte ati: “Ico mwalondolola te ca kukansaninapo.”

Ukwabulo kutwishika, ukwananishiwa kwa trakiti wa Imbila ya Bufumu kwacebwishe abantu mu nshila yaibela. Mu Denmark mwine ŋanda ayankwile ku Nte uwamutambike trakiti ati: “E lyo fye mbwelele ukufuma ku United States. Ilyo nali nshilaima, umuntu umo antambike trakiti wenu. Nomba elyo nacifika fye, kabili mu kwangufyanya fye trakiti umo wine aletambikwa mu ciDanish!”

Ukwafwilisha Kwacincimuka Ukwa Kampeni

Inte sha kwa Yehova ukushinguluke calo mu kucincimuka baakene mu mulimo wa kwananya trakiti. Austria, El Salvador, Haiti, Hungary, Italy, New Caledonia, e fimo ifya fyalo fyacitile lipoti icipimo ca pa muulu icipya ica bakasabankanya mu kati ka myeshi lintu trakiti wa Imbila ya Bufumu aleananishiwa.

Mu Zambia kangalila wa muputule umo alisambilisha umwana mwanakashi wakwe uwa myaka itatu, Deborah, ukutambika impapulo ukufuma ku ŋanda ne ŋanda. Mu kati ka uyu kampeni wa trakiti wa Imbila ya Bufumu Na. 34, Deborah ashalike ukucila pa matrakiti 45. Banyina balitendeke amasambililo ya Baibolo na bamo abapokelele trakiti wa Imbila ya Bufumu ukufuma kuli Deborah.

Mu South Africa umupungwe atambike trakiti ku munankwe wa pa sukulu uwe shina lya Cashia. Cashia alibelengele trakiti no kusoso kuti: “Ici cawamisha—ukwikala kuli pe na pe muli paradise pe sonde! Mulandu nshi bashanjebele pa lwa cene kale?” Isambililo lya Baibolo lyalitendekwe. Mu kati ka mulungu wine Cashia apokelele trakiti na umbi. Uyu uwa cibili afumine kuli cibusa wakwe uwali Roma Katolika uo balelembeshanya nankwe, uwikala ku Cyprus. Cibusa wakwe alondolwelele Cashia umulandu ifisambilisho fye Calici lya Roma Katolika fyabela ifya bufi no kumweba ukuti alepanga ukusambilila Baibolo ne Nte sha kwa Yehova. Kwena, ico cakoseshe umupampamina wa kwa Cashia uwa kutwalilila ne sambililo lyakwe.

Kalume wa myaka ya bukulu 10 mu Switzerland abombele na nyina mu kwananya trakiti. Apeele trakiti umo ku mukashana no kumukoselesha ukuti aibelenge mu kusakamanishisha. Umukashana aipwishe kalume nga ca kuti mu cine cine alisumina mu cikope calangililwe pa nkupo—ubumi bwabule mpela pe sonde. Cinshi ico kalume ayaswike? “Mu cine cine, ndi uwashininkisha.” Umwanakashi lyene asokolwele ukuti alesapika ukupepa kwa cine apantu kwaliko ukukansana ukwingi uko bapepa. Pa cipempu ca kubwelelamo, isambililo lya Baibolo lyalitendekwe.

Ukwankulako kwa mu Kampampa

Inshita shimo shimo trakiti wa Imbila ya Bufumu alelenga ukwankulako kwa mu kampampa kuli abo bamubelengele. Pa numa ya kubelenga trakiti, umukashana wa myaka 11 mu Belgium ayebelele kuli umo uwa Nte sha kwa Yehova ukuti aleiba. Nyina kwa mukashana alefwaya ukufisa pa lwa cene, lelo kampingu wa mukashana aliseshiwe ku cintu abelengele, kabili apampamine pa kuya kuli maneja wa matuuka. Mu kupelako nyina alisumine ukuleka umwana wakwe umwanakashi ukuya na Nte ku matuuka. Maneja alisungwike ku kuyebelela kwakwe. Lintu aishileishiba ukuti ni trakiti wa Imbila ya Bufumu e wamuseseshe ukuilumbulwila muli iyi nshila, apokeleko trakiti ku kuimwena ifyalimo ifyakwete amaka ya musango yo. Pali nomba umukashana alelunduluka mwi sambililo lya Baibolo.

Nte umo mu Cameroon uwashilile umwaume trakiti wa Imbila ya Bufumu ashimika ukuti: “Lintu twabweleleko, twasangile ukuti kale kale alishilile trakiti onse kabili akwete ifipusho ifyafulilako. Pa numa ya kupokelela ifyasuko fisuma, asosele ukuti: ‘Ca cine nga nshi ukuti imipepele yalisangwilako ku kubulwe nsansa ukwa mutundu wa muntu. Trakiti wenu nangafwilisha ukumfwikisha ifingi, lelo kuti nafwaya ukwishiba ifyafulilako.’” Pali nomba alasambilila Baibolo lyonse.

Nte uwaleshimikila ukufuma ku ŋanda ne ŋanda mu Uruguay ashilile umwaume trakiti. Nte atwalilile umulimo wakwe uwa kushimikila ukufuma ku ŋanda ne ŋanda no kushinguluka icikuulwa ca munkulinkuli ukubwelulukila ku mwinshi wa ku numa ya ŋanda umwikala umwaume. Alisungwike ukusanga umwaume alemupembelela na trakiti mu minwe. Kale kale aali naubelenga kabili alefwaya ifyebo fyafulilako. Isambililo lyalitendekwe ilyo line fye.

Aba ku Nse Baafwa mu Kwananya

Mu Japan Nte wacaice atununwike umwaume uwa muli ba 50 no kumulondolwela pa lwa trakiti. Umwaume aipwishe ukuti: “Cinshi mucita na ko kapepala nga mwasanga abantu abashimona?” Nte atile taishibe ica kucita. Umwaume amwebele ukupembelela panono lintu abwelele mu ŋanda. Abwelele mu kuba na trakiti wa Imbila ya Bufumu no kusoso kuti: “Kale kale nalipokelela ako kapepala. Natontonkenye ifyo kalikwetemo ifyebo fya buseko kabili ifyacindama, e co nalembulwile kene mu Filembo fya Mpofu. Napaapaata bomfyeni ifi ku mpofu.” Umwaume apoosele amaawala ayengi alelembulula trakiti wa Imbila ya Bufumu mu Filembo fya Mpofu pa kuti impofu tashipushilwe ifilembelwemo.

Umwaume umo mu Slovakia alitemenwe trakiti nga nshi ica kuti apangile amakope 20, kabili umwine ayanenye aya makope ya kupanga. Kasabankanya mu Switzerland ashalike trakiti wa Imbila ya Bufumu ku lupwa kabili atwalilile ukubombela pa ntunti ya pa muulu wa cikuulwa apaleikala ulu lupwa. Lintu aletentemuka na kabili, akumene na kalumendo ukufuma muli ulu lupwa, akafwaile amatrakiti 19 na yambi. Pe sukulu apo uyu mulumendo asambilila, abasambi bapeelwe umulimo wa kulemba pa lwa mafya no kufwailisha ifyasuko. Alefwaya trakiti wa Imbila ya Bufumu uwa kupeela abanankwe ba pa sukulu bonse.

Takuli Nangu Umo Uwapushilwe

Abo abaakene muli kampeni baeseshe na maka ukumona ukuti nangu umo tapushilwe. Mu New Caledonia Inte shibili baleya ku cifulo ca kubombelamo ku kwananya trakiti wa Imbila ya Bufumu ku lupwa lwikalila ukutali. Ilyo baleya, bamwene akashila akamoneke akasapa, nangu ni fyo bafwaile ukwishiba nga ca kuti kwali abaleikalako. Bashile motoka, no kukonka fye ako kashila, ukukubula mu tumana ukufikila basangile iŋanda. Kwaleikala abaupana babili abashatalile abomfwa pa lwa Nte sha kwa Yehova, kabili balipokele trakiti wa Imbila ya Bufumu. Pa numa Inte shacitile icipempu ca kubwelelamo kabili balipapile lintu basangile ukuti aba abaupana baliwemye umusebo no tumalalo utwafulilako pa kuti baNte bengensha motoka wabo ukuyafika pa ŋanda. Isambililo lya Baibolo ilya lyonse lyalitendekwe.

Mu Poland Nte alepita pa cifulo ca makuule pa kuti engayatambika trakiti wa Imbila ya Bufumu kuli mwine ŋanda. Ababomfi balemutamba lintu alebweluluka ukwisapita pa cikuulwa. Mu kupelako, umubomfi umo alimwitile, no kumweba ukukanabalaba. Lintu abatununwike, balikutike mu kusakamanishisha lintu aleshimikila pa lwa trakiti. Bapokelele amatrakiti ya Imbila ya Bufumu pamo pene na bamagazini kabili pa numa, pa cipempu ca kubwelelamo, bapokele ifitabo.

Imyanda ya mamilioni ya trakiti wa Imbila ya Bufumu Na. 34 yalyananishiwe mu ndimi ishingi. Ubukombe bwa iko kale kale bwalikwata ifya kufumamo fisuma. Abengi balisambilila ukuti paradise wabulwamo impika kuti abako. Tulepepa ukuti abantu ba mitima yalungama bakatwalilila ukwankulako na mu kupelako bakabe pa kati ka “balanda” abo “bakapyaninine calo, no kuilemeno bwingi bwa mutende.”—Ilumbo 37:11.

[Akabokoshi pe bula 31]

Twalilileni Ukwananya Bamagazini!

Kampeni wa kwananya trakiti wa Imbila ya Bufumu Na. 34 alitungulwike nga nshi mu kati ka April na May 1995. Muli iyo myeshi ibili, na kabili ukwananya kwa magazini wa Ulupungu lwa kwa Kalinda na Loleni! kwalipulilemo. Ku ca kumwenako, munyina mu Ripabuliki ya Czechia, ashimika ukuti mu April ashalike amatrakiti ya Imbila ya Bufumu 250 na bamagazini 750. Ubushiku bwaibela ubwa magazini mu Guadeloupe, bwali pa Cibelushi, April 15. Mupepi na kasabankanya uuli onse mu calo alyakeneko mu butumikishi ako kasuba! Slovakia akwete icipimo cipya ica pa muulu mu kwananya bamagazini mu April. Amalipoti yapalako yalishimikwe mu fyalo fimbi ifingi.

E co mulandu nshi te kuti mupange April na May 1996 imyeshi yapulamo mu kwananya bamagazini? Ifilonganino kuti fyateyanya inshiku shaibela isha magazini. Abantu umo umo kuti baakana mu mulimo wa bupainiya bwa kwafwilisha. Muli ishi nshila ne nshila shimbi, ukwananya kwa bamagazini kuti kwakoseleshiwa, no bukombe bwacindama ubwabilishiwe muli trakiti wa Imbila ya Bufumu Na. 34 bukatwalilila ukwananishiwa. Lyene, nge fyo cali umwaka wapwa, Yehova mu kushininkisha akapaala umupashi wapimpa uo tulanga.—2 Timote 4:22.