Bushe Baibolo Ilasambilisha Icisumino mu Kulingila Kabela?

UKONAULE SHINA! UBUKWAKWA! Lintu umo uwacindikwa mu bwikashi ayumfwe fyo ishina lyakwe no kushimikwa fyaonaulwa ku lyashi lya bufi, alakuntwa ukulungike milandu. Kuti aya fye na ku cilye pa kuti abamonawilile shina bakalubulule.

Icisumino ca kuti ifintu fyonse fyalilingilwa kabela konaula ishina lya kwa Lesa Wa maka yonse. Iyi mfundo itila Lesa umwine e washingamwa no tuyofi tonse na masanso ifyo fyapama umutundu wa muntu. Nga ca kuti mwalicetekela mu kuti ifintu fyonse fyalilingilwa kabela, kuti napamo mwaelenganye fyo Mulopwe wa mu Kubumbwa konse alilemba umutande wa fintu uwapala uyu: ‘Ilelo, Katebe alacenwa mu busanso bwa pa musebo, Chomba alalwala ubulwele bwa mpepo, iŋanda ya baSiame ili no kuwa kuli kankungwe!’ Bushe mu cine cine kuti mwakuntwa ukubombela Lesa wa musango yo?

Abasumina mu kulingilwa kabela bepusha ukuti, ‘Kanshi nga Lesa te washingamwa ku mashamo yesu, ninshi nani?’ Umulumendo ulumbwilwe mu cipande cifumineko, Ousmane, alepapa na o pa lwa ici. Lelo tali no kwelenganya fye nelyo ukutunganya pa kuti asange cine. Aishileishiba ukuti Lesa aliwamya ishina lyakwe ukupitila mu fisambilisho fyakwe ifisangwa mu Cebo Cakwe icapuutwamo, Baibolo. (2 Timote 3:16) Lekeni tulanguluke, kanshi, cintu Baibolo isosa pa lwa ici.

Nani Ulenga?

Bamulamba, inkuuka, ifinkukuma—utuyofi twa musango yu ilingi line twitwa imilimo ya kwa Lesa. Lelo Baibolo tailangililapo ukuti Lesa e ulenga utuyofi twa musango yu. Langulukeni akayofi kacitike imyanda ya myaka iyapitapo mu Middle East. Baibolo itwebo kuti uwapuswike fye eka muli aka kayofi ashimike ati: “Umulilo wa kwa Lesa [inumbwilo ya mu ciHebere ilingi line iipilibula inkuba] uponene mu muulu, wocele no kupwisho mukuni na bakalume.”—Yobo 1:16.

Ilintu uyu muntu wali no mwenso pambi atontonkenye fyo Lesa e waponeshe umulilo, Baibolo ilangililo kuti te Lesa. Ibelengeleni Yobo 1:7-12, kabili mwalasambilila ukuti inkuba tayaletelwe na Lesa, lelo ku Mulwani wakwe—Satana Kaseebanya! Tatuleti amasanso yonse ni Satana uyaleta mu kulungatika. Lelo cili icamonekesha ukuti, tapali umulandu wa kutila Lesa e ulenga.

Abantu mu cine cine, ilingi line e ba kupeelo mulandu lintu ifintu fyalubana. Ukupona ku sukulu, ukufilwa incito, nelyo ukukansana kuti pambi fyafuma mu kukanabombesha no kuikansha kusuma nelyo pa mulandu wa kukanalangulukilako bambi. Cimo cine na malwele, amasanso, ne mfwa kuti pambi fyaba pa mulandu wa mulekelesha. Ukuikaka fye umushipi wa mu motoka ilyo muleensha kuti napamo wamupususha lintu kwaba ubusanso bwa pa musebo. Umushipi wa muli motoka te kuti ubombe cili conse nga ca kuti fyonse “fyalilingilwa kabela.” Ukusakamana ubumi no busaka na fyo filacefyako sana imfwa. Nangu fye tuyofi uto twitwa “imilimo ya kwa Lesa” mu cishinka, twaba milimo ya bantu—ica kufumamo ca bulanda mu konaule sonde ukwa muntu.—Linganyeniko Ukusokolola 11:18.

“Inshita ne ca Mankumanya”

Ca cine, kwalibako utuyofi utwingi uto ifilenga fishishibikwa bwino bwino. Moneni, nangu ni fyo, cintu Baibolo yalanda pali Lukala Milandu 9:11: “Nabwekeshepo no kumona: mwi samba lya kasuba, ukucishamo mu kubutuka te kwa mpalalubilo, kabili ukucishamo mu bulwi te kwa mpalume, na kabili ukupeelwe cilyo te kwa ba mano, nangu bucindami ku ba mucetekanya, nangu bubile ku baishiba; pantu inshita ne ca mankumanya fiponena kuli bonse bene.” Kanshi takwaba umulandu wa kucetekele fyo Kabumba e ulenga amasanso nelyo ukuti ifinakabupalu fya masanso ninshi filekandilwa pa fyo fyacitile.

Yesu Kristu umwine wine alipaashishe ukulwisha ukupelulula kwa kusumina mu kulingilwa kabela. Ilyo alelosha ku kayofi kaishibikwe bwino kuli bakakutika bakwe, Yesu aipwishe ati: “Balya abe kumi na cinekonsekonse [18] abo ulupungu lwa mu Siloamu lwawililepo, no kubepaya; bushe muletila bali aba milandu abapulamo mu bantu bonse abaikala mu Yerusalemu? Ndetila kuli imwe, Iyo.” (Luka 13:4, 5) Yesu mu kushininkisha tatile Lesa e washingemwe kalya kayofi, lelo, cali ni “nshita ne ca mankumanya.”

Ukupumpunta kwa Kukanapwililika

Nangu ni fyo, ni shani pa lwa mfwa tushingalondolola na malwele? Baibolo ipeela ubu bulondoloshi bwabula ukulamba ubwa mibele ya buntunse: “Muli Adamu e mo bonse bafwila.” (1 Abena Korinti 15:22) Imfwa yalingilila umutundu wa muntu ukutula apo icikolwe cesu Adamu aingile mu nshila ya kukanaumfwila. Nga fintu fye Lesa asokele, ubupyani Adamu ashilile ubufyashi bwakwe ni mfwa. (Ukutendeka 2:17; Abena Roma 5:12) Kwi pele pele, kanshi, amalwele yonse kuti yalonshiwa ukuti yatuntuka ku cikolwe cesu bonse Adamu. Amabunake yesu ayo twapyana na yo e yalenga sana ukulengwe nsoni no kufilwa kwesu mu bumi.—Ilumbo 51:5.

Langulukeni ubwafya bwa bupiina. Icisumino ca kuti ifintu fyonse fyalilingilwa kabela calikoselesha abalecula ukusumina ukulaikala fye mu mibele yabo iyayafya. Basumino kuti ‘Ifwe twafyalilwa ukucula.’ Nangu cibe fyo, Baibolo ilangisha ukuti ukukanapwililika kwa buntunse, e kwashingamwa, te kulingilwa kabela iyo. Bamo basanguka abapiina lintu ‘balobolola ico babyele’ ukupitila mu bunaŋani nelyo ukubomfya bubi bubi ubukumu. (Abena Galatia 6:7; Amapinda 6:10, 11) Imintapendwa ya mamilioni ya bantu bekala mu bupiina pantu balaliilwa pa mutwe ku bantu bafunuka ababateka. (Linganyeniko Yakobo 2:6.) “Abantu bacito lukambo ku bantu ku kubabifya,” e fisosa Baibolo. (Lukala Milandu 8:9) Takwaba ubushininkisho bwa kuti Lesa e washingamwa ku bupiina nelyo ukuti icilenga kulingilwa kabela.

Icisumino ca Kulingilwa Kabela—Ifyo Conaula

Ukupaasha na kumbi ukwa kunashanasha ku kulwisha icisumino ca mu kulingila kabela caba fintu ici cisumino cingambukila abasuminamo. Yesu Kristu atile: “Umuti onse uusuma utwale fisabo fisuma, lelo umuti uwa fye utwale fisabo ifyabipa.” (Mateo 7:17) Lekeni tulanguluke ‘icisabo’ cimo ica kusumina mu kulingila kabela—fintu cambukila ukuyumfwa kwa bantu ukukuma ku kushingamwa.

Ukuyumfwa kusuma ukwa kushingamwa kwa muntu pa lwakwe kwalicindama. E cintu cimo icikunta abafyashi ukupayanishisha indupwa, ababomfi ukubomba mu kusakamanisha, bakapanga ukupanga ifintu ifyafikapo. Ukusumina mu kulingilwa kabela kuti kwaonaula uko kushingamwa. Ku ca kumwenako, elenganyeni ukuti motoka wa muntu umo nakwata ubwafya ku ca kupindulwilako. Nga ca kuti alikatamika ukushingamwa, alalungisha ubwafya pa mulandu wa kwangwa ubumi bwakwe no bwa bantu asendako muli motoka. Lubali lumbi, uwasumina mu kulingilwa kabela kuti pambi asuulako fye ku busanso, ukupelulula ukuti kukaba fye ubusanso nga ca kuti ‘kufwaya kwa kwa Lesa’!

Ee, ukusumina mu kulingilwa kabela kuti kwasumbula umulekelesha, ubunaŋani, ukufilwa ukusumina ukushingamwa pa lwa ncitilo sha muntu, ne fintu fimbi ifyabipa ifingi.

Icipindami ku Kwampana Kwesu na Lesa

Icacilanapo ukuba ica busanso ca kuti, ukusumina mu kulingilwa kabela kulashimaisha ukushingamwa kwa umo, nelyo ukukakililwako, kuli Lesa. (Lukala Milandu 12:13) Kemba wa malumbo acincisha umutundu wa muntu onse “[ukusonda] no kumono kuti aliwama Yehova.” (Ilumbo 34:8) Lesa alimika ififwaikwa fimo fimo kuli abo abengaipakisha ubusuma bwakwe.—Ilumbo 15:1-5.

Icifwaikwa cimo ica musango yo caba kulapila. (Imilimo 3:19; 17:30) Ico cisanshamo ukusumina ifilubo fyesu no kwaluka nga fintu cingakabilwa. Apo tuli bantunse bashapwililika, ifwe bonse twalipanga ifilubo ifyo tukabila ukulapilako. Lelo nga ca kuti umuntu asumino kuti aba cinakabupalu ca kulingilwa kabela uwapelelwa, calyafya ukumfwa ukukabila kwa kulapila no kusumina ukushingamwa pa filubo fyakwe.

Kemba wa malumbo asosele pa lwa kwa Lesa ati: “Uluse lwenu lwawamo kucilo mweo.” (Ilumbo 63:3) Nalyo line, ukusumina mu kulingilwa kabela kwalishinina amamilioni ya bantu ukuti Lesa e ulenga utulanda twabo. Mu cifyalilwa fye, abengi balifulilwa Lesa pa lwa ici, ukukaaninina fye ndai ukukwata ukwampana kwapalamisha na Kabumba. Na kuba, kuti watemwa shani umuntu uyo umona ukuti e ulenga amafya yobe yonse ne fya kwesha? Ubusumino mu kulingilwa kabela muli fyo bwimika icipindami pa kati ka kwa Lesa no muntu.

Ukulubulwa ku Kutitikisha kwa Kulingilwa Kabela

Ousmane wacaice, uulumbwilwe pa kwiswila, inshita imo ali umusha wa cisumino ca kulingilwa kabela. Nangu cibe fyo, lintu Inte sha kwa Yehova shamwafwile ukupimununa ukutontonkanya kwakwe ukupitila muli Baibolo, Ousmane alikuntilwe ukusha icisumino cakwe mu kulingila kabela. Ifyafuminemo fyamuletele ukwilulukwa, no kukwata imimwene ipya, iisuma pa bumi. Icacilanapo ukucindama, alisaishiba Yehova ukuti ni Lesa “wa nkumbu kabili uusenamina, uukokolo kukalipa, kabili uwafulisho luse ne cishinka.”—Ukufuma 34:6.

Ousmane na kabili alisailuka ukuti nangu ca kuti Lesa tapimina libela ifintu fyonse mu bumi bwesu, alikwata imifwaile ya nshita ya ku ntanshi.a 2 Petro 3:13 atila: “Imyulu ipya ne calo cipya e fyo tulolela, umwaikalo bulungami, umwabele cilayo cakwe.” Inte sha kwa Yehova shalyafwa amamilioni ukulundulula isubilo lya kwikala kuli pe na pe ukuba ulubali lwa “calo cipya” icalaiwa. Kuti shatemwa ukwaafwa na imwe bene.

Ilyo mulelundulukilako mu kwishiba kwalungikwa ukwa Baibolo, mukesatesekesha ukuti inshita yenu iya ku ntanshi tayashintilila pa kulingilwa kabela uko mushingalama. Amashiwi ya kwa Mose ku bena Israele ba pa kale kuti yabomba bwino pano aya kuti: “Nimbika ku cinso cenu umweo ne mfwa, ipaalo ne citiipu: e ico saleni umweo, ku kuleka mube no mweo, imwe no bufyashi bwenu, ku kutemwa Yehova Lesa wenu, ku kuumfwa kwi shiwi lyakwe, no kulambatila kuli wene.” (Amalango 30:19, 20) Ee, mwalikwatapo amaka pa lwa nshita yenu iya ku ntanshi. Tayalingilwa kabela.

[Futunoti]

[Icikope pe bula 6, 7]

Utu tuyofi tatwali ‘milimo ya kwa Lesa’

[Abatusuminishe]

Icikope ca U.S. Coast Guard

WHO

UN PHOTO 186208 /M. Grafman