“Wa Maka Kabili Alashinina”

UMO uwa Nte sha kwa Yehova ku France alembele ukuti: “Ukutendeka mailo nkalamubomfya mu kushimikila, pantu cine cine wa maka kabili alashinina.” Nte wa ku United States alembele ati: “Nalimubelengele bwangu bwangu fye kabili ndefwaisha ukumubomfya mu butumikishi bwa mwi bala, pantu tulakumanya abantu abengi sana abashangwako kabili abashacetekela Baibolo.” Cinshi baalelandapo? Broshuwa wa mabula 32 uwa mutwe wa kuti A Book for All People (Icitabo ca Bantu Bonse), uo Watch Tower Society yafumishe pa Mabungano ya Citungu aya “Ukutetekela Icebo ca kwa Lesa” aya mu 1997/98.

Ulu lupapulo lwalembelwa ibumba lya bantu mu kulungatika—abo pambi abasoma sana lelo abashaishiba ifingi pa lwa Baibolo. Aba musango yo abengi balalanda amashiwi yaluma pa lwa Baibolo, nangu cingati abene tabatala abaibelengapo. Imifwaile ya broshuwa ya kulanga uulebelenga ukuti Baibolo yena ifwaikwa ukuibebeta. Broshuwa tapatikisha uulebelenga ukusumina ukuti Baibolo yalipuutwamo na Lesa. Mu cifulo ca ico, ifishinka ifine e fiilandila. Talembwa mu nshila yapikana lelo mu kumfwika kabili mu kulungatika.

Nga fintu amashiwi yambwilwe pa muulu yalelanga, abasangilwe ku mabungano balefwaisha ukubomfya uyu broshuwa mu butumikishi bwabo ubwa mwi bala. Ku ca kumwenako, mu France kampeni wa kushimikila uwaibela aliteyanishiwe pa August 23 na 24 ilyo amakana imyanda ne myanda iya bacaice ukufuma mwi sonde lyonse babungene mu Paris ku kusefya Inshiku Nkulu ya Bana Imisepela. Inte mupepi na 2,500 (maka maka aba myaka 16 ukufika ku 30) bashalike babroshuwa 18,000 mu ciNgeleshi, iciFrench, iciGerman, iciItalian, iciPolish, ne ciSpanish.

Natubombeshe ukubomfya uyu broshuwa aleti, A Book for All People, mu butumikishi bwesu. Shi ulu lupapulo nalube ulwakatama mu kushinina abantu bapelulula ukuti bafwile ukuibebetela Baibolo.