Mulandu Nshi Abantu Bonawila Ifintu?

“TAPALI ico ningasosa.” Aya mashiwi yalembelwe mu filembo fikalamba pa cibumba bapentele nomba line mu ncende iisuma iya São Paulo. Kuti mwatila bonaushi fye. Kabili ukulembaula kwaba ni nshila imo iya konawilamo ifintu.

Elenganyeni ukuti aba boni baonaula motoka wenu umupya. Nelyo mwamona ifipe fya cintubwingi, ifyo babomfya nafyonaulwa ku bantu ba boni. Mulandu nshi? Bushe mwalibala amutontonkanyapo umulandu ubonaushi bufulile? Mu fifulo ifingi, aba boni batemwa sana ukulembaula nelyo ukonaula umwa kutumina foni. Ilingi line balacita cimo cine na kufimbayambaya fya cintubwingi, pamo nga mashitima nelyo amabasi. Cimoneka kwati aba boni tabasakamana icili conse. Lelo cinshi cilenga ubonaushi ubwingi ubo tumona nelyo ubutukuma?

Marco,a uwacaice uwa ku musumba wa Rio de Janeiro, calimukalipe lintu ibumba lyakwe iliteya umupila wa ku makasa lyacimfiwe mu cangalo, ica kuti atendeke ukupoosa amabwe kuli basi uwasendele abalelumba ibumba lyacimfishe. Nelyo tontonkanyeni pali Claus. Ilyo aponene amashindano, alikalipe ica kuti apoosele amabwe no kutoba amawindo. Lelo, ulya “musamwe” walipwile lintu wishi aebelwe ukulipila pa fyo aonawile. Uwacaice na umbi, Erwin, alesambilila ku sukulu kabili alebomba. Wene na banankwe balemonwa nga bacaice basuma. Lelo, pa kwangala baleonaula ifintu mu cifulo baleikalamo. Abafyashi ba kwa Erwin tabaishibepo icili conse pa lwa ici. Valter ali mwana wa nshiwa uwalelala mu misebo ya mu São Paulo. Ifibusa fyakwe ifyo atemenwe sana fyali libumba lya ba boni, na o alecita fintu balecita kabili alisambilile no kulwa kwa kupantana. Ifya kumwenako fya musango yu filangilila ukuti abantu e bonaula ifintu, kabili ifilenga ukuti balecite fi fyalipusanapusana.

Icitabo ca The World Book Encyclopedia cisosa ukuti: “Ukonaula ifintu kuti kwaba ni nshila ya kulandwilamo nelyo iya kulandilamo ifya mapolitiki. Inshita shimo abacaice na bakalamba balonaula ifintu pa mulandu fye wa ‘musamwe.’” Lelo mu cifulo ca kuba fye ngo musamwe wa bacaice, ukonaula ifintu kuti kwaba cintu cabipisha, nelyo fye icingepaya abantu. Abacaice bamo balefwaya “ukwangala fye,” kabili ilyo bamwene umwaume nalaala, bamwitile ifimafuta no kumwambusha umulilo. Uyo mwaume uwali mwina India ailefwila mu cipatala. Ukulingana ne fyo cashimikwe, “citunganishiwa ukuti cilumendo asosele ukuti taletontonkanya ifyo uuli onse kuti apoosako amano pantu bakalombalomba abengi balyocewa mu misebo kabili abalashi tabacitapo icili conse.” Nampo nga ca kuti pa konaula ifintu umuntu nacenwa nelyo iyo, ubonaushi bucitwa bukalamba kabili bengi baculilamo. E co, cinshi cingacefyako nelyo ukupwisha ubwafya bwa konaula ifintu?

Nani Engapwisha Ubwafya bwa Konaula Ifintu?

Bushe bakapokola na masukulu kuti balesha ubonaushi bwa fintu? Ubwafya bumo bwa kuti abalashi kuti baobelwa ne milandu imbi iikalamba, pamo ngo kushitisha imiti ikola nelyo ukwipaya, mu cifulo ca milandu umo umuntu “ashicenenwe.” Kapokola umo asosele ati, lintu uwacaice aba mu bwafya, abafyashi ilingi “bapeela umulandu ifibusa fyakwe, nelyo isukulu abapo, nelyo bakapokola pa mulandu wa kumwikata.” Amasukulu no kukosha amafunde kuti fyacefyako uboni bwa fintu; lelo ni shani nga ca kuti imibele ya bafyashi tailealuka? Umulashi umo uulolekesha pa bacaice asosa ukuti: “Icilenga citendwe ne shuko lya kucite co. [Abana] tababwela bwangu ku mayanda, kabili tabakwata fya kucita. Kabili bafwile tabakwata aba kubatungulula pantu nga balabwela bwangu.”

Nangu cingati ukonaula ifintu kwaba bwafya bukalamba mu fifulo ifingi, bebeteni pa fyo ifintu fingalulwa. Aba bacaice ba boni abalandilwepo pa kubala balyaluka; nomba balasengauka imibele ishawama mu bwikashi. Cinshi calengele aba abalipo bacintomfwa ukwalula imikalile yabo? Na kabili bushe kuti mwapapa nga ca kuti ubonaushi bwa fintu bwalicepeleko no kufumishiwapo fye? Shi belengeni icipande cikonkelepo.

[Futunoti]