Ubwafya bwa Konaula Ifintu Kuti Bwafumishiwapo
BAKALEMBA Jane Norman na Myron W. Harris balondolola ukuti: “Ubonaushi bwa bapungwe lyonse bumonwa nge cishibilo ca kukanacindika abakalamba no kubapata pamo ne fishinte fyabo.” Bakalemba bashimika ukuti nangu cingati abacaice abengi batontonkanya ukuti tapali ifingacitwa ku kwalula iyi mibele, “uwacaice umo pali batatu abali bonse atontonkanya ukuti ubonaushi bwa bapungwe kuti bwapwa nga ca kuti abafyashi balepoosako sana amano ku bana, kabili abapungwe nga tabalekwata sana icitendwe.” Nangu cingati ukulenga abacaice ukukwata ifya kucita na bafyashi ukufunda abana babo kuti kwacefyako ubonaushi, bushe kuti kwapwisha ifileta ubu bwafya?
Lintu bali beka, abacaice abengi tabaleta amafya, lelo lintu bali mwi bumba nelyo lintu bali babili kuti bafwaya ukupooswako amano ukupitila mu kucita ifintu fya buwelewele ne fya muselu. Ico e cacitike kuli Nelson, uwaleti nga akolwa imiti ikola nelyo ubwalwa alekalipa no kuilishanya ukupitila mu konaula ifintu. José, uyo wacincishiwe ku malyashi mwi Calici lya ciKatolika pa lwa nshila ubuteko bwalepeelelamo impanga ne nsambu sha babomfi, apingwilepo ukuilishanya ukupitila mu kuitumpa mu mabumba yalefwita incito na mabumba ayaleonaula ifintu. Lelo Nelson na José basangile icintu cacila pa mpasase nelyo ukonaula ifintu.
Fimo Ifikalamba Ifilenga Abantu Ukonaula Ifintu
Natubebete sana umulandu abacaice bamo bonawila ifintu. Abacaice abengi balipelenganishiwa kabili “batila icalo cifulo ca cimfulumfulu, icafulungana, icaisulamo abantu abafulungana.” Nangu cibe fyo, kabili ukupusana na ku fyo abengi basumina, lipoti imo yatile: “Abacaice balasakamikwa pa lwa kuntu ubumi bwabo buleya. Balasakamikwa ukucila ifyo abakalamba batontonkanya.” Ukwabula ukwishiba atemwa ukucite ci mu kwishiba, uwacaice uwaibimba mu konaula ifintu kuti muli iyi nshila alelangilila ubukali bwakwe, amafya akwata, nelyo ifintu akabila ifyo ashakwata. Ukulingana no kusapika kulandilwepo pa kutendeka, “tapali nangu umo pa baipushiwe uwasuminishe ukonaula kwa fintu nangu fye ni balya abaibimbilemo.”
Napamo uwacaice te lingi bamutasha nelyo ukumukoselesha. Apantu amasomo yaleya yalecindaminako ne milimo iingi ilekabila abasoma sana, wene kuti atiinishiwa. Na kabili, abafyashi, bakafundisha, nelyo ifibusa kuti pambi balelengulula sana no kufwaya alecita ifyo balefwaya, ukukomaila pa fyo uwacaice acita ku sukulu mu cifulo ca fyo aba ngo muntu. Abengi balapondoka nelyo ukutendeka ukonaula ifintu pa mulandu wa kuti nabalengwa insoni. Bushe icitemwiko no kwangwako kwa bafyashi tafingacefyako apakalamba uku kumanama?
Pambi mwalimona ukuti nangu cingati aba mu buteko bamoneka kwati balileka ukwesha ukulesha ukulembaula nelyo bucintomfwa bwa misango na misango, abekashi bayangwako mu cinkumbawile balolesha kuli bakafundisha na ba ku sukulu ku kucefyako ubwafya bwa konaula ifintu. Pa lwa kukosha amafunde, icitabo ca The World Book Encyclopedia cisosa ukuti: “Umo nga aleonaula ifintu kuti alipilishiwa indalama nelyo ukukakwa. Amabuteko ya cikaya yamo yakwata amafunde yapeela abafyashi umulandu pa boni abana babo bacita. Lelo abengi abonaula ifintu tabakandwa. Mu milandu ya musango yu ukukosha amafunde kulafya, kabili ifyonaulwa tafiba fya mutengo wa kulenga abalashi ukubombelapo.” Lipoti imo yalangilile ukuti amapesenti yatatu pali aba bampula mafunde e bekatwa.
Kuti mwasuminisha ukuti ukukusha bwino abana ku bafyashi kuti kwaba e nshila yawamisha ku kupwishishamo icilenga bucintomfwa. Lelo lintu ubumi bwa lupwa bwaonaika, ubwikashi bulacula. Profesa Ana Luisa Vieira de Mattos, uwa ku São Paulo University, ku Brazil, asosa ukuti fimo ifilenga abacaice ukuba mu bwafya fyaba “bafyashi ukukanafunda bwino abana, ukubulwa amafunde, ukukanalanshanya, ukulekeleshiwa, ukukanasakamana icili conse.”
Mu nshita yesu ukwabulo kutwishika twalimona ukufishiwapo kwa mashiwi ya kwa Yesu aya kuti: “Ukutemwa kwa bengi kukashibantukila pa mulandu wa kufulisha kwa bupulumushi.” (Mateo 24:12) Kabili nani engakaana ukuti amashiwi yalembwa pali 2 Timote 3:1-4 tayalefishiwapo? Umutumwa Paulo alembele ukuti: “Lelo ishibe ci, ukuti mu nshiku sha kulekelesha mukesaba inshita ishayafya. Pantu abantu bakaba abaitemwa, abatemwe ndalama, aba mataki, aba miiya, aba miponto, aba bucintomfwa ku bafyashi, abashitootela, abashashila, abaumalala, abatalama, aba lwambo, ababulo kuiteka, abankalwe; bakaba abashatemwa busuma, bashikamfutu, bacintalika, abatuumikwa, abatemwo kwangala ukucisho kutemwa Lesa.” Icishinka ca kuti cimo icilenga bucintomfwa caba kwikala fye na bantu ba mibele ya musango yu. Lelo tatulekabila ukutompoka. Ubwikashi bwalifilwa ukupwisha ubwafya bwa konaula ifintu, lelo kuti twasanga abantu abaalula imikalile yabo, abaleka bucintomfwa nelyo umulekelesha. Kuli bena ukonaula ifintu kwalipwa.
Ubutungulushi Busuma ku Bacaice
Cinshi calenga aba boni na bambi ukwalula imibele yabo? Nangu cingati kuli bakafundisha bamo na bafyashi kuti camoneka icakosa ukusumina, Baibolo yakwata ubutungulushi bushaiwamina kabili ubwingabomba mu nshita shesu. Ukupitila mu kubukonka, abantu abaleonaula ifintu kale balilengwa ukumfwila ifunde lya kwa Lesa ilya mu kulungatika ilitila: “Wilakonka cinabwingi ku fibi.” (Ukufuma 23:2) Abengi balyongolwa ne cine ukufuma mu Cebo ca kwa Lesa pa lwa fisumino ne mfundo ifyo bashaishibe kale, kabili ifyo basambilila fyabalenga ukuwaminako. Tontonkanyeni pa lwa cacitikile José, uwacaice wa mu São Paulo. Akulile ne cisumino ca kubomfya ifimpashanya pa kupepa. Lintu asambilile ukuti Lesa alikwata ishina, Yehova, no kuti tasuminisha ukupepa ifimpashanya, José aalwile ubumi bwakwe ku kuleka acite ifitemuna Lesa.—Ukufuma 20:4, 5; Amalumbo 83:18; 1 Yohane 5:21; Ukusokolola 4:11.
Nelson, mu cifulo ca kukalifiwa fye lyonse mu mabumba ya lukaakala no kufwita incito, asangile isubilo line line ilya ku ntanshi, kabili ico calimupembesula apakalamba. Atila: “Mu cifulo ca kulekeleshiwa ku lupwa lwandi pa mulandu wa fibusa fyabipa no bumi bwa kukunkuma ku miti ikola, nomba nine bacindikisha pa ng’anda. Ilingi batata balanjeba ukufunda abakalamba bandi abaume. Ukutula apo natendekela ukusambilila Baibolo ne Nte sha kwa Yehova, nalisanga ubuseko pa mulandu wa kuti nalikwata imifwaile mu bumi.” Kabili kuli Marco uwacaice wa mu tauni, uwabelesha ukwikala ku ncende ya lukaakala, ukwishiba ukuti Ubufumu bwa kwa Lesa bukalenga isonde ukuba paradise cintu ca kusansamusha.—Ukusokolola 21:3, 4.
Kabili tontonkanyeni pa lwa muntu uwali kale mwi bumba lya bamukukulu, uwalepanga ifyongo mu misebo, kabili uwali wa boni. Apo mwana wa nshiwa uushakushiwa bwino, Valter alisansamwike lintu asangile ukuti Lesa alikwata abantu pa kati ka bwikashi bwabipa. Batukusha ukubomfya ifishinte fya Baibolo mu bumi bwabo, ukuba ne nkumbu kuli bambi, ukubalangulukilako no kubalanga icikuuku. Valter alondolola ukuti: “Nga fintu Yesu alaile, nomba nalikwata ulupwa lushaikulila, ‘bamunyina na bankashi, bamayo na batata.’ Pa lwa ku ntanshi, ndafuluka inshita lintu abantu bakekala mu nsansa kabili mu kwikatana ilyo bakalatekwa no buteko bwa bulungami ubwa kwa Lesa.”—Marko 10:29, 30; Amalumbo 37:10, 11, 29.
Icawama Ukucila pa Kuilishanya
Ukulunda pa kulangulukilako no kutemwa abantu banabo, aba bantu baleonaula ifintu kale basambilila ‘ukupata ububi.’ (Amalumbo 97:10; Mateo 7:12) Ni shani pa lwa imwe? Nangu cingati mulacula pa mulandu wa bwafya bwa konaula ifintu ubufulile fi, ukusambilila Icebo ca kwa Lesa kukalenga Yehova ukuba uwa cine cine kuli imwe nga Shifwe uwa mu muulu uwa kutemwa uulefwaya ukumusakamana. (1 Petro 5:6, 7) Lesa kuti amwafwa ukukula lwa ku mupashi, te mulandu no bunake bwenu nelyo ubupiina. Ico, cintu cishaiwamina!
Yehova no Mwana wakwe, Yesu Kristu bafwaya abantu ba misango yonse ukusambilila icine ca mu Baibolo. Icebo ca kwa Lesa kuti cacita ifingi ukucila pa kwafwa fye abantu ukuleka ukonaula ifintu nomba. Kuti cabalenga ukutwalilila ukubomfya ifishinte fya bulesa. Icifumamo ca kuti besa mu kuba ulubali lwa bumunyina bwa pa kati ka fyalo ubwaishibikilwa pa busaka ne mibele isuma, icilonganino ca mwi sonde lyonse ica Nte sha kwa Yehova. Mu kumfwana na Abena Efese 4:24, aba Bena Kristu ba bufumacumi ‘bafwala ubuntu bupya ubwalengelwe mu cipasho ca kwa Lesa mu kulungama no kushila kwa cine.’ Nomba line icalo cikesulamo abantu ba musango yu pantu aba e bakapusuka fye beka no kwikala kuli pe na pe.—Linganyeniko Luka 23:43.
Kukabako Icalo Cipya umo Abantu Bashakaleonaula Ifintu
Bushe mulasumina ukuti ubwafya bwa konaula ifintu kuti bwafumishiwapo? Nga ni fyo, bushe ukwaluka kwacindame fyo kukabako shani? Nomba line Ubufumu bwa kwa Lesa buli no kufumyapo ubwikashi buno ubwabipa. Abakaba pe sonde bakalubulula pa kutoba ku mufulo amafunde ya kwa Lesa aya bulungami. (Linganyeniko Esaya 24:5, 6.) Ilyo “abapulumushi bakafitilwa pamo,” abatemwa ubulungami bakapusuka. ‘Yehova akabaafwa, no kubalengo kupusuka; akabalengo kupusuka ku babifi, no kubapususha, pantu booba muli wene.’—Amalumbo 37:38-40.
Cine cine ifilenga abantu ukonaula ifintu fikafumishiwapo umupwilapo. Pamo na bumpulamafunde, ukutitikisha, ukucula, no bubifi. Mu cifulo ca ico, ubumi bwa mu calo cipya bukaba bwa mutende, ubulungami bwa cine, umutalalila, no mutelelwe. Esaya 32:18 ilondolola ifikacitika ukuti: “Abantu bandi bakekala mu bwikalo bwa mutende, mu mekalo ya mutelelwe, mu fya kutushamo fya cibote.” Abantu abakekala muli paradise wa mwi sonde lyonse uwayemba ni balya abakwata ukutemwa kabili abalangulukilako bambi.
Pamo ne mintapendwa imbi, abo kale baleonaula ifintu baba fibusa fyapalamisha na Yehova Lesa. Tabonaulako ifintu nomba. Bushe na imwe mwalasuminisha Icebo ca kwa Lesa ukumutungulula ku bumi mu calo cakwe icipya? Mulandu nshi mushingapashanishisha kemba wa malumbo uwa ku kale uwalembele ifyo Yehova abilishe ukuti: “Ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.”—Amalumbo 32:8.
[Icikope pe bula 7]
Ukwangwako kwa bafyashi no kutemwa filacingilila abacaice