Ukutekwo Busha ku Kutiine Mipashi
MWAKUMANA no muntu ilyo mulefuma pa mwenu. Mwaipununa ku libwe. Icuni cimo calila ubushiku. Mwaloota icilooto cimo cine imiku iingi. Abengi kuti bamona ifi fintu nge fili fye bwino, tafingaleta ubwafya. Lelo, ku bantu bamo aba ku Masamba ya Afrika, ifi fimonwa nge fishibilo, amashamo, nelyo ubukombe ukufuma ku mipashi. Batila icisuma nelyo icibi kuti cacitika ukulingana ne cishibilo e lyo ne fyo bacilondolola.
Kwena na mu fyalo fimbi ifishaba mu Afrika, abantu balatiine mipashi. Te mulandu no kwikala imyaka iingi mu bwikashi umo bumukanalesa bwasuminishiwa, abantu abengi mu China na mu fyalo fimbi ifyali kale ulubali lwa Soviet Union bacili balatiine mipashi. Mu fyalo fya ku Bulaya na ku North America, abengi balalengula intanda, balatiina ubushiku bwa pali Cisano nga bwaba pa 13, kabili balataluka tupushi twafiita. Bamo abekala ku ncende ya Kapinda ka ku kuso bamona ulubuuto lwa ku kapinda ka kuso nge cishibilo ca kuti kwalaba inkondo ne cikuko. Banamutekenya ba fimbayambaya mu India abasumina ukuti bafwile ukulaala no mwanakashi pa kutalalika imibili yabo nga nakukaba, baletandanya ubulwele bwa AIDS. Mu Japan, ababomba mu munyangala batila lishamo umwanakashi ukwingilamo ilyo ushilapwa. Ukutiine mipashi kwaliseeka na mu fyangalo fyateyanishiwa. Umo uuteya icangalo ca volleyball atile icalengele ukukonkanya ukucimfya ni co alefwala insokoshi shafita ukucila ishabuuta. Fingi twingalandapo.
Ni shani pa lwa imwe? Bushe na imwe napamo mwalisunga inkaama, ukutiina ico mushaishiba? Bushe mwalikumwako ku “cisumino, icumfwikamo icishinka panono, nelyo umwata ushingalondololwa bwino bwino”? Icasuko cenu kuti casokolola fimo, pantu ifyo fine e fyalondololwa ukutiine mipashi.
Umuntu uuleka ukutiine mipashi kwakuma ifyo apingulapo na fintu acita cila bushiku ailenga ukutekwo busha ku co ashaumfwikisha. Bushe ici ca mano? Bushe tulingile ukutekwo busha ku cintu cishaishibikwa bwino napamo ica bubifi? Bushe ukutiine mipashi cilubo fye icishingaleta bwafya nelyo cintiinya cingaleta ubwafya?