Ukushimikila pa Maliketi
ILYO umutumwa Paulo ali mu musumba wa Atena, cila bushiku aleya pa maliketi mu kushimikila imbila nsuma pali Yesu. (Imil. 17:17) Ico Paulo atemenwe ukushimikila pa maliketi ni co e po abena Atena balepoosa inshita iikalamba.
Pa numa ya myaka mupepi na 2,000, abantu ba kwa Yehova bacili balaya ku maliketi mu kusabankanya ubukombe bwa Bufumu bwa kwa Lesa. Mulandu nshi? Pantu kulya e kusangwa abantu abengi. Muno nshiku kwaliba ama maliketi e lyo ne fifulo ukwaba fye amashitolo nelyo amatuuka ayengi. BaNte bamo balapoka ulusa ku mukalamba we shitolo e lyo bafwaya itebulo no kubikapo impapulo shesu ishilanda pa fya mu Baibolo.
Ku ca kumwenako, bakasabankanya baile ku matuuka mu New Jersey, ku United States of America no kufwaya apa kubika impapulo shalelanda pa mutwe wa kuti “Finshi Fingatwafwa Ukuba ne Mibele Isuma mu Lupwa?” Cinshi cafuminemo? Mu bushiku fye bumo, balishalike amabuuku 153 mu ndimi 6.
Umwanakashi umo aishile apo babikile amabuuku no kukutikisha ilyo Nte alelondolola fimo. Uyu mwanakashi alisumine ukuti calicindama ukubika Lesa mu fyo tucita mu bumi bwesu na mu fyo tucita ngo lupwa. Apokele ishi mpapulo: Sambilila Kuli Kasambilisha Mukalamba, Icaba Inkaama ku Nsansa sha Lupwa, na Ifipusho Abacaice Bepusha—Ifyasuko Fibomba.
Akasuba umwaume umo alepita ukwabelele amabuuku ilyo aleya mwi shitolo lyali pa ntanshi. Alolekeshe icitabo ca Ifipusho Abacaice Bepusha. Nkashi alimwene ifyo uyo mwaume alolekeshe ici citabo. Alimwipwishe ukuti, “Bushe pali icitabo mwatemwapo pali ifi?” Alisumine no kusonta icitabo citila Abacaice Bepusha. Nkashi alimupeele ici citabo, ninshi natambika na kale ukuboko ukuti abuule. Uyu mwaume atile, alikwata abana batatu. Mu kulanshanya asukile alanda no kuti alabafunda umuku umo cila mulungu. Abana bakwe babili abakalamba, bapungwe. Ilyo alemona ifyaba mu citabo, atile kuti alecibomfya pa kulanshanya na bana bakwe. Kasabankanya amulangile ne citabo citila Icaba Inkaama ku Nsansa sha Lupwa, e lyo amweba ukuti mwaliba ukufunda ukusuma ukwingabafwa mu fyo bacita mu lupwa lwabo. Uyu mwaume alitemenwe sana ifyo kasabankanya asosele, kabili alipeele no musangulo, no kusumina ukuti kasabankanya akayemutandalila pamo no lupwa lwakwe.
Bushe baNte baumfwile shani pa mulimo wa kushimikila uo babombele pa matuuka? Nkashi umo atile: “Nacumfwa bwino sana ukushimikila muli iyi nshila. Caciwama sana!” Nkashi umbi atile: “Yehova alisosa ukuti imbila nsuma ikashimikilwa ukufika ku mpela ya pano isonde. Buno bushiku, pa matuuka ya mu Paramus, New Jersey, iyi mbila nsuma naifika ku bantu abalanda indimi shalekanalekana. Nintemwa sana pa kuba pa bacilashimikila pali aya mashitolo. Bonse ababombeleko uyu mulimo nabatemwa. Tapali nangu umo pali ifwe uwacilafwaya ukufumapo.”
Bushe te kuti muleshimikilako imbila nsuma ukubomfya inshila shimbi? Inshila ikalamba tushimikililamo, kuya ku ng’anda ne ng’anda. (Imil. 20:20) Lelo bushe te kuti mutemwe ukushimikilako pa maliketi nangu pa cifulo apaba amashitolo ayengi?