Ilyashi lya Bakabilisha ba Bufumu
“Mwi Sokoni Akasuba na Kasuba”
UMUTUMWA Paulo abomfeshe ishuko ilili lyonse ku kusalanganya ubukombe bwa Bufumu. Pa kusokota abayana, apelulushenye “na baYuda . . . mwi sunagoge, kabili mwi sokoni akasuba na kasuba na balipo cintunkuma.”—Imilimo 17:17.
Ukupimpa kwa musango yo kwaliba cishibilo ca bakapepa ba cine aba kwa Yehova ukutula mu mwanda wa myaka uwa kubalilapo C.E. (Mateo 28:19, 20) Ilelo, Inte sha kwa Yehova mu kupalako babomfya inshila shalekanalekana ilintu mu kupimpa baleafwilisha aba mitima ya bufumacumi ukufika ku kwishiba kwalungikwa ukwa cine. (1 Timote 2:3, 4) Ica kukumanya icakonkapo ukufuma ku Australia cilelangilila ici.
Inshiku shisano cila mulungu, Sid na Harold balakomboshanya mu kusakamana akantamba ka mpapulo sha Baibolo pa citesheni ce shitima mu Sidney. Balishimikila imbila nsuma ya Bufumu bwa kwa Lesa muli iyi nshila mupepi ne myaka isano nomba. Sid, uuli ne myaka 95, alondolola ati: “Lintu nafikile pa mushinku wa myaka 87, amaka ya kwensha motoka yalipwile. Ico calinkalifye umutima pantu nalitemenwe umulimo wa kushimikila pa cintubwingi. Bushiku bumo ilyo nali mupepi na ku ncende ukufikilila sana abatandashi ukwitwa Echo Point mu Katoomba, namwene kalenga aleshitisha ifikope ifya mimonekele ya mpanga. Ilyo nalolekeshe filya fikope, mu mutima natile, ‘Mu cola candi ica bunte ninkwata ifikope ifisuma ukucila ifi—kabili ifya mutengo uunono!’ E co napingwilepo ukupanga akantamba, ku ncende ukufikilila sana abatandashi, no kutambika ku bapita nshila impapulo sha Baibolo isha fikope fyayemba ishananishiwa ne Nte sha kwa Yehova.
“Imyaka ine iyapitapo, nakuushishe akantamba ku Sydney, kabili Harold alinkonkele. Tulakomboshanya mu kusakamana akantamba kabili tubombela pamo ne filonganino ifyapalaminako.” Harold, uuli ne myaka 83, atila: “Ukufuma pali Cimo ukufika pali Cisano abantu abasangwa pa mayanda banono fye. E co ukushimikilo bukombe bwa Bufumu muli iyi nshila kulenga tulebombela ku cifulo ukusangwa abantu. Ilingi line, tulalobolola ifisuma. Muli cino calo tulashalika impapulo ishafulilako eyefilya.”
Sid asoso kuti: “Nangu cingati pa myaka iyapitapo twakuukile ku fifulo fyalekanalekana imiku ine nelyo isano, tacalepoose nshita ukwishibikwa ku bantu. Abantu bamo besa mu kufwaya impapulo kuli ifwe. Bambi bafwaya ifipusho fyabo ukwasukwa. Kabili bamo bafwaya fye ukulanda na ifwe pa maminiti ayanono.” Sid asekako akacene ati: “Iyi e nshita fye ifipempu fyandi ifya kubwelelamo fisa kuli ine.”
Harold alundapo ati: “Abantu abengi mu cine cine balitemwa Baibolo. Mu mweshi umo abantu bane batendeke ukusambilila Baibolo ne Nte pa mulandu wa mpapulo bapokele kuli ifwe na pa mulandu wa fipusho ifyo twaleasuka ukufuma mu Baibolo. Ifya kukumanya fya musango yo filatukoselesha apakalamba.”
Ukupala Sid na Harold—kabili ukupala umutumwa Paulo—konse kuntu Inte sha kwa Yehova baba babomfya inshila ishili shonse ishabako ku kusalanganyo bukombe ubwacindama. Muli fyo, “imbila nsuma” iletwalilila ukubilwa “ku fyalo fyonse.”—Mateo 24:14.