Bushe Indalama E Shilenga Umuntu Ukuba ne Nsansa Shine Shine?
BA SONIA bafyalilwe mu Spain. Ilyo bali abaice, baleya na banyina ku kulongana kwa Nte sha kwa Yehova. Lelo ilyo bakulile, bakuukile ku London, ku England, kabili umuye nshiku batendeke ukubomba ku kampani akaleshitishishako amakampani yambi ifintu fyalekanalekana.
Ba Sonia balitemenwe sana incito balebomba. Balekwata indalama ishingi sana kabili e baleangalila ne ndalama ishingi isho balepokelela ukufuma ku makampani yalekanalekana. Baleumfwa bwino ukubomba iyi ncito kabili balebomba bwino. Ilingi line ba Sonia balebomba ama-awala 18 cila bushiku, kabili limo balelaala fye ama-awala yabili nelyo yatatu. Incito e yo babikileko sana amano ukucila icili conse. Lyena, ukwabula no kwenekela, ifintu fyalyalwike. Ba Sonia balilwele stroke iibi sana, nalimo icalengele ukuti balwale, kukanatuusha. Ilyo balwele bali fye ne myaka 30.
Ulubali lumo ulwa mubili lwalilekele ukubomba kabili tabalelanda no kulanda ica kuti badokota baletwishika nga ca kuti ba Sonia bakatala abalanda na kabili. Ilyo banyina baumfwile ukuti ba Sonia nabalwala, bwangu bwangu baile ku England ku kubatensha. Ilyo ba Sonia batendeke ukwenda, bushiku bumo banyina babebele ati, “Nalaya ku kulongana, kabili ndefwaya tuye nobe pantu teti nkushe weka.” Ba Sonia balikonkele. Finshi fyafuminemo?
Ba Sonia balebukisha ifyo cali, batila: “Fyonse ifyo balelanda fyaleumfwika ukuti e cine. Ala caliweme nga nshi. Nalisumine ukulasambilila Baibolo na nkashi uwali pa bantu abengi abamposeshe ilyo naile mu kulongana ku Ng’anda ya Bufumu umuku wa kubalilapo. Abo naleangala nabo kale bonse balilekele ukuntandalila, lelo abanandi abo nasangile bena balintemenwe kabili balensakamana.”
Panono panono, ba Sonia balisukile batendeka ukulanda kabili baleya baleishibilako ne fya mu Baibolo. No mwaka tawapwile, balibatishiwe. Abengi abo baleangala na bo balebomba umulimo wa kushimikila inshita yonse, kabili ba Sonia balemona ifyo aba bantu bali aba nsansa. Ba Sonia batile: ‘Na ine ndefwaya ukuba ne nsansa. Ndefwaya ukulabombela Yehova Lesa na maka yandi yonse!’ Ino nshita ba Sonia babomba umulimo wa kushimikila inshita yonse.
Finshi ba Sonia basambililako ku fyabacitikile? Batila: “Nangu ca kutila nalefola indalama ishingi sana, ukubomba ukwabula ukutuusha no kulatontonkanya ukuti limbi kuti bantamfya incito, fyalensakamika kabili nshaleba ne nsansa. Nomba naliluka ukuti icacindama sana mu bumi kuba na bucibusa busuma na Shifwe wa ku muulu, Yehova. Ino nshita naliba ne nsansa icine cine.”
Umutumwa Paulo alembele ukuti: “Ukutemwa indalama e ntulo ya bubi bwa misango yonse, kabili bamo pa kushitemwisha balilufya icitetekelo no kuilasaula abene amacushi ayengi.” (1 Timote 6:10) Ba Sonia nga batontonkanya pa cabacitikile, balasumina ukuti aya mashiwi ya cine.