Mulenonkelamo mu Butungulushi bwa kwa Yehova

IFYO UMWINA POLAND ASALILEPO UKUCITA

“NABATISHIWE ninshi ndi ne myaka 15 kabili pa numa ya myeshi 6 natendeke bupainiya bwa kwafwilisha. Ilyo papitile umwaka umo, natampile bupainiya bwa nshita yonse. Ilyo napwishishe isukulu lya ku sekondari, nalilembele kalata ya kwipushishapo ukuya mu kubombela uko ababila imbila nsuma bacepa. Nalefwaya ukufuma mwi tauni umo nakuliile no kufuma pali bamama abo naleikala nabo abashali ni Nte ya kwa Yehova. Ala calinkalipe ilyo kangalila wa muputule anjebele ukuti nakulabombela muli ili line itauni! Nshalefwaya ukumulanga ukuti nalifulilwe. Nakonteme fye nafumanapo ukwabula ukulanda nangu cimo. Pa numa naebele uo nalebomba nankwe mu mulimo nati: ‘Ifyo ndecita cimo cine ne fyacitile Yona. Lelo Yona alisukile aya ku Ninebe. Kanshi na ine nakulabombela fye kuno kwine.’”

“Nomba nimomba bupainiya pa myaka ine kabili nalimona ukuti nalicitile fye bwino ukukonka ifyo banjebele. Ne wali no bwafya nine. Pali ino nshita naliba ne nsansa sana. Mu mweshi umo nalitungulwile amasambililo ya Baibolo 24. Ala ndatasha Yehova pantu nalitendeke no kutungulula bamama isambililo lya Baibolo abalenkaanya.”

IFISUMA IFYACITIKE MU FIJI

Umusambi wa Baibolo umo mu Fiji alingile ukusalapo ukuya ku kulongana kwa citungu nelyo ukuya no mwina mwakwe ku kusefya ubushiku bwa kufyalwa kwa kwa lupwa wa mwina mwakwe. Umwina mwakwe alimusuminishe ukuya ku kulongana. Uyu umusambi aebele umwina mwakwe ukuti nga abwela mu kulongana alaya uko balesefesha. Nomba ilyo abwelele, apingwilepo ukukanaya ku mutebeto pantu Yehova tafwaya abantu bakwe balesefya inshiku sha kufyalwa.

Ilyo balesefya, umwina mwakwe aebele balupwa lwakwe ukuti nga afuma mu kulongana alaisa. Balupwa bamwebele abati, “Taise pantu Inte sha kwa Yehova tabasefya inshiku sha kufyalwa!”a

Aya mashiwi yalengele uyu mwaume ukuba sana ne nsansa pa fyo umwina mwakwe asalilepo ukulakonka ifyo asuminamo ne fyalemweba kampingu yakwe. Pa numa, bucishinka bwakwe bwalengele ashimikilako umwina mwakwe na bantu bambi icine. Finshi fyafuminemo? Umwina mwakwe alitendeke ukusambilila Baibolo kabili alitampile no kulongana.