Nga ca Kuti Mwaponenwa no Busanso

“Ilyo imfula iikalamba ne fimatipa fyaonawile fyonse ifyo twakwete, twalyumfwile sana ububi.”—E fyalandile ba Andrew aba ku Sierra Leone.

“Ilyo icikuuku ca mwela icikalamba ico beta ukuti hurricane capwile, twalibweleele ku ng’anda kabili twasangile ing’anda yesu na fyonse ifyo twakwete nafyonaika. Twalyumfwile sana ububi ica kuti umwana wandi umukashana alifukeme no kutendeka ukulila.”—E fyalandile ba David aba ku Virgin Islands.

NGA CA KUTI mwalipusukapo ilyo kwali ubusanso, nalimo kuti mwaishiba ifyo abapusuka ku masanso bomfwa. Balomfwa sana ububi, balafilwa ukushininkisha ificitike, balapelenganishiwa, balasakamikwa sana kabili balaloota ifyabacitikiile. Abengi balafuupulwa kabili tabafwaya no kucita ifingalenga baumfwako bwino.

Nga ca kuti mwalilufya fyonse ifyo mwakwete pa mulandu no busanso ubwacitiike, nalimo na imwe mumfwa kwati te kuti mutwalilile ukushipikisha. Limo kuti mwalaumfwa kwati no kufwa kwawama. Na lyo line, Baibolo ilondolola ukutila kuti mwatwalilila ukushipikisha, kabili yalilanda na pa fingalenga mwacetekela ukutila ifintu fikawama ku ntanshi.

UKUSAMBILILA IFYABA MU BAIBOLO KULALENGA TWABA NE SUBILO

Baibolo pali Lukala Milandu 7:8 itila: “Impela ya mulandu yawama ukucila ukutendeka kwa uko.” Ilyo mwaponenwa fye no busanso, kuti mwalamona kwati mukatwalilila fye ukumfwa ububi. Lelo nga mwabombesha kuti mwatendeka ukumfwako bwino.

Baibolo ilanda ukuti kukaba inshita ilyo mu calo “tamwakomfwike . . . ukuloosha nelyo ukulila ubulanda.” (Esaya 65:19) Ifi fikacitika ilyo Ubufumu bwa kwa Lesa bukalateka kabili ilyo isonde likaba paradaise. (Amalumbo 37:11, 29) Takwakatale akuba amasanso. Takwakabe no kutontonkanya nelyo ukumfwa ububi pa mulandu na masanso ayatuponena, pantu Lesa wa Maka Yonse atulaya ukuti: “Ifya kale fikalabwa, kabili tafyakese na mu mutima.”—Esaya 65:17.

Tontonkanyeni pali ici: Kabumba wesu alipekanya “ukumupeela inshita ya ku ntanshi iisuma ne subilo.” Ifi fikacitika ilyo Ubufumu bwakwe bukalateka. (Yeremia 29:11) Bushe ukwishiba ukutila Lesa alafwaya ukutucitila ifisuma kuti kwamwafwa ukushipikisha? Ba Sally abo tulandilepo mu cipande ca kubalilapo, batile: “Ukulatontonkanya pa fisuma ifyo Ubufumu bwa kwa Lesa bukatucitila ilyo bukalateka, kuti kwatwafwa ukuleka ukutontonkanya sana pa fyabipa ifyatucitikiile kabili kuti kwalenga twalashipikisha.”

Kuti cawama nga mwasambilila na fimbi pa fyo Ubufumu bwa kwa Lesa bukacitila abantu nomba line. Ukwishiba ifyo Ubufumu bwa kwa Lesa bukatucitila kuti kwalenga mwatwalilila ukushipikisha ilyo mulelolela icalo cipya umushakabe amasanso. Lelo, na pali ino ine nshita mu Baibolo mwaliba ifingamwafwa ukushipikisha amafya mwingakwata nga mwaponenwa no busanso. Lekeni tulande pali fimo.

Amalembo ya mu Baibolo Ayengamwafwa Ukulaumfwako Bwino

Mulelaala amaawala ayengi.

“Ukutuusha panono kwawama ukucila ukucishamo ukubombesha no kuuma fye umwela.”—Lukala Milandu 4:6.

Abafwailisha pa fintu basanga ukuti, ifyabipa nga fyacitikila umuntu e lyo “alelaala fye amaawala ayanono . . . kuti alaumfwa sana ububi kabili kuti papita sana inshita pa kuti akatendeke ukumfwako bwino.” Kanshi calicindama sana ukulalaala amaawala ayengi.

Muleebako balupwa ne fibusa ifyo muleumfwa.

“Amasakamika yalenga umutima wa muntu ukufinininwa, lelo amashiwi ayasuma yalenga umutima ukusekelela.”—Amapinda 12:25.

Kuti mwaebako lupwa wenu nelyo cibusa uo mwacetekela. Balupwa wenu ne fibusa kuti bakutikisha ilyo mulelanda kabili kuti bamukoselesha no kumupandako amano.a

Muletontonkanya pa fyo ifintu fikawama ku ntanshi.

“Tulelolela imyulu ipya ne sonde lipya ifyo Lesa alaya, umukaba ubulungami.”—2 Petro 3:13.

a Umuntu nga aba sana na masakamika pa nshita iikalamba alingile ukuya ku cipatala pa kuti bamundape.