Nga ca Kuti Mwalilwala Ubulwele Ubukalamba

“Ilyo dokota anjebele ukuti nalilwala kansa ya kuli pwapwa ne ya mu mala, natontonkenye ukuti nshakapusuke. Lelo ilyo nabwelele ku ng’anda, natile mu mutima, ‘Nangu ca kuti nshaleenekela ukulwala ubu bulwele, ningile ukwishiba ifya kucita pa kuti nshipikishe.’”—E fyalandile ba Linda abali ne myaka 71.

“Nalilwala ubulwele ubulenga umutwe ulekalipa sana ku kuso. Inshita shimo, ndomfwa sana ubukali ica kuti ndalwala na masakamika. Ilingi line nalemona kwati tapali uwalefwaya ukungafwa kabili nalefwaya fye no kuipaya.” —E fyalandile ba Elise abali ne myaka 49.

Bashikulubantu abalemana bali pamo na balupwa ne fibusa

NGA CA KUTI balimusanga no bulwele ubwingamwipaya nelyo nga ca kuti uo mwatemwa balimusanga no bulwele bwa musango uyu, mufwile mwalishiba ifyo aya amalwele yabipa. Uwalwala ubulwele bwa musango uyu nelyo abalemutensha kuti balafulwa bwangu nelyo ukusakamikwa sana. Na kabili kuti baleumfwa umwenso nelyo ukusakamikwa pa mulandu wa kulaya mu kumona badokota libili libili na pa mulandu wa kuti ukwa kusanga umuti nelyo indalama sha kulipila pa kundapa umulwele kwashupa. Cimbi icingalenga balasakamikwa mafya yambi ayesako pa mulandu no muti umulwele alenwa. Kanshi umulwele na balemutensha kuti balaumfwa sana ububi.

Finshi fingamwafwa? Abengi basanga ukuti ukupepa kuli Lesa no kulabelenga Baibolo kulabasansamusha. Balupwa ne fibusa nabo kuti bamusansamusha nga ca kuti balelanga ukutila balimutemwa kabili balemwafwa.

IFYAYAFWA BAMO UKUSHIPIKISHA

Ba Robert abali ne myaka 58 batile: “Nga mwacetekela Lesa kuti amwafwa ukushipikisha ubulwele. Mulepepa kuli Yehova no kumweba ifyo muleumfwa. Mulelomba ukuti alemupeela umupashi wa mushilo no kumwafwa ukukanalenga balupwa lwenu ukulasakamikwa sana. Na kabili mulepepa kuli Lesa ukuti alemwafwa ukuba abatekanya no kutwalilila ukushipikisha.”

Ba Robert balandile no kuti: “Kulaba ukumfwako bwino nga ca kuti balupwa balekwafwa. Cila bushiku balupwa lwandi balantumina foni no kwipusha ifyo ndi. Ifibusa fyandi na fyo filankoselesha, kabili ifi bacita filangafwa ukutwalilila ukushipikisha.”

Nga ca kuti mwaya mu kupempula cibusa wenu uwalwala, mulingile ukutontonkanya pa fyo ba Linda balandile. Batile: “Umulwele alafwaya ukuba fye nga bantu bambi kabili nalimo te kuti atemwe mwalalanda fye pa bulwele alwala. Kanshi mulelanda pa fintu fimbi ifyo mulandapo na bantu bambi.”

Nga ca kuti Lesa alemwafwa, nga mulebelenga amalembo ayengamusansamusha, kabili balupwa ne fibusa balelanga ukuti balimutemwa kabili balemwafwa, kuti mwatwalilila ukushipikisha nangu ca kuti mwalilwala ubulwele ubukalamba.

Amalembo ya mu Baibolo Ayengamwafwa Ukulaumfwako Bwino

Muleshintilila pali Lesa.

“Naipwishe Yehova, na o alinjaswike, kabili ampokolwele kuli fyonse ifya kuntiinya. Uwacula alikuutile, na Yehova alyumfwile.”—Amalumbo 34:4, 6.

Ba Linda abo tulandilepo, batile: “Nshipepa kuli Lesa ukuti amposhe mu cisungusho, lelo mpepa ukuti angafwe ukuba uwashipa no kutwalilila ukushipikisha ubulwele.”

Mulebelenga Baibolo pa kuti muleba abashipa.

“Takuli umwikashi uukatila: ‘Nindwala.’”—Esaya 33:24.

Muletontonkanya pa fyo Lesa alaya ukuti akatucitila. Ukutontonkanya pali ifi kuti kwalenga mwaba abashipa no kutwalilila ukushipikisha.

Muleeba balupwa ne fibusa ukumwafwa.

“Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.”—Amapinda 17:17.

Ba Elise batile: “Mwilaba fye mweka, kabili muleleka ifibusa fyenu filemwafwa. Inshita shimo kuti mwalaumfwa kwati nabamulekelesha kabili kuti mwalamona kwati na Lesa talekutika kuli imwe, lelo tamufwile ukulaitalusha ku bantu.”