Ulupungu lwa kwa Kalinda na Loleni!—Bamagazini Bakwate Cine
1 Ulupungu lwa kwa Kalinda ulwafumine ulwa January 1, 1994, ibula 22, lwatucinkwileko ukuti bamagazini besu basabankanya “ifipande fya pa nshita yalinga ifyo fyabomba no kukabila kwine kwine ukwa bantu.” Tulefwaya ukupeela aba bamagazini ukwananishiwa kwasaalala. Mu myeshi ya April na May, Ulupungu lwa kwa Kalinda na Loleni! e fikalatambikwa. Panga ubuyo bwa kupokelela ukulembesha maka maka ukwa Ulupungu lwa kwa Kalinda.
2 Umulimo wa ku ŋanda ne ŋanda utupeela ishuko lyesu ilya mu nshita ilyawamisha ilya kushalika aba bamagazini. Ukucitilo bunte bwa mu lyashi ukufumamo cimo ne fipempu fya kubwelelamo na fyo fine fifumamo ukushalika kwa lyonse. Ukubomba umulimo wa mu musebo no kutandalila ifyaimikwa fya makwebo mu cifulo cesu ica kubombelamo mu musango umo wine ni nshila sha kwingilishako ukwananya.
3 Imitwe ya Kulanshanyapo: Ulupungu lwa kwa Kalinda ulwafuma ulwa April 1 lulelanguluka imitwe “Icalo Cawaminako—Bushe Ciloto Fye?” na “Icalo Cawaminako—Nacipalama!” Ici mu kushininkisha cili mu kwendela pamo no buyo bwa magazini ubwa kubilisha Ubufumu bwa kwa Lesa. Icipande ca bubili cilesondwelela pa kulangisha ifyo paradise wa ciyayaya akaba uwa cine cine pe samba lya mitekele ya kwa Kristu Yesu.—Luka 23:43.
4 “Ni Kwi Wingasanga Ubutungulushi Bwacetekelwa?” e cipusho cilelanshanishiwapo mu lwafuma ulwa April 15. Ishafuma isha May shikapansa uyu mutwe mu kulundapo mu fipande “Bushe Ubutotelo Buleisushisho Kukabila Kobe?” na “Mulandu Nshi uwa Kubelengela Baibolo?” Tulingile ukuba na maka ya kutampa ukulanshanya mu kwanguka na bantu abaleyumfwa ukuti ubumi bwabo tabwakwata bupilibulo ne mifwaile.
5 Ukwingilishako Ukushalika: Ulupungu lwa kwa Kalinda ulwa January 1 lwatambike imitubululo ine iya fintu twingengilishako ukushalika. Twakoseleshiwe (1) ukuba uwaibukila pa lwa bamagazini. Lintu twababelenga, tulingile ukutontonkanya pa lwa fipande ifyo pambi ifingaba ifyacilapo ukucebusha ku bantu mu cifulo cesu ica kubombelamo. Na kabili, nga ca kuti lyonse twasenda amakope, kuti pambi twaba na maka ya kushalika bene ku babomfi banensu, abena mupalamano, bakafundisha, abanensu ba pa sukulu, nelyo abaleshita.
6 Twacinkwilweko (2) ukusungilila imipeelele yesu iyayanguka. Soobolamo icishinka cimo ica kulengo buseko, no kubika mu mashiwi ayanono. Nga wingalenga mwine ŋanda ukupokelela magazini, kuti “yalanda” ku muntu wakumenye na kuli bambi mu cinshingwa-ŋanda.
7 Ukukabila na kumbi kuli kwa (3) kuba uwakondenkana. Caliba icisuma ukukwata ifipande fyapusanapusana mu muntontonkanya ifya kulanshanyapo—cimo ku misepela, cimbi ku baume, na cimbi ku banakashi.
8 Mu kulekelesha, tulekabila (4) ukwimika ubuyo bwa pa lwesu ubwa sha kushalika. Ilintu icilonganino te kuti cimike icipimo, ngo muntu umo umo kuti twaimikila ubuyo pa lwesu. Ici kuti pambi catupeela ukukunta kwa kuba abacincimuka mu kutambika bamagazini. Nga ca kuti twalikwata orda ubelelela uwa bamagazini, kuti pambi twakuntwa ukucita ifyafulilako.
9 Tulefwaya bambi ukwishiba pa lwa Bufumu bwa kwa Lesa. Lekeni tushukile mu kukumanina ukwaafwa kushaiwamina uko bamagazini bapayanya mu kwananya ubukombe bwa Bufumu.—Mat. 10:7.