Tambika Bamagazini Bawamisha mu Calo
1 Imifwaile yalondololwa iya Ulupungu lwa kwa Kalinda yaba “kusumbula Yehova Lesa pamo nga Shikulu Mulopwe wa kubumbwa konse.” Loleni! abelako “ku kubuutusha ulupwa lonse. . . . Uyu magazini akuula ukucetekela mu malayo ya kwa Kabumba aya calo cipya ica mutende no mutelelwe.” Uku kwambula kufumine muli bamagazini abene. Ukusupila aya mabuyo kwalipanga bene ukuba intulo ya cisansamushi ku mamilioni ya bakabelenga.
2 Tukalatambika aba bamagazini mu butumikishi bwesu mu April na May. Pa kuba abafumamo cimo, tulekabila ukuba ababeleshanya bwino ne fili muli bene. Belenga uwafuma umo na umo, ukumona ifishinka ifyo pambi wingabomfya lintu ulebatambika. Tontonkanya pa lwa cikumine abantu. Milandu nshi iya fya kwangalila capamo, iya lupwa, nelyo iya mu nkuntu iyo abena mupalamano bobe abengi bandatilwe na yo mu mintontonkanya? Esha ukutontonkanya pa lwa cintu wingasosa ico cikambukila imitima yabo no kucincimusha ukufwaisha kwabo ukwa kusambilila ifyafulilako.
3 Ukutonta pa Ulupungu lwa kwa Kalinda ulwa April 1: Abantu abengi bafuluka icalo cawaminako, icabulamo impika ishingi isho ilingi line nga nshi shibapokolola ubuseko bwabo.
Pa numa ya kuilondolola we mwine, kuti pambi watila:
◼ “Kuti natemwa ukumulangako ukulandapo kwa kulengo buseko ukwacitwa muli ici cipande cikwete umutwe wa kuti ‘Icalo Cawaminako—Bushe Ciloto Fye?’ Patila: ‘Cino calo, icalo cesu, mu kushininkisha tacaba cifulo calinga. . . . Umutande wa tulanda twa pali nomba umoneka uushipwa.’ Iyi mibele icilenga ukuba icayafya ukwenekela ifisuma pa lwa nshita ya ku ntanshi, bushe te ifyo? Shi lekeni mulange, nangu cibe fyo, cintu Ilumbo 37:11 lisosa pa lwa nshita ya ku ntanshi.” Pa numa ya kubelenga ici cikomo, ipusha mwine ŋanda fintu aleyumfwa pa lwa ubu bulayo. Pa numa ya kulandapo kwakwe, kuti pambi lyene wayalukila ku cipande “Icalo Cawaminako—Nacipalama!,” ibula 4, no kusoso kuti: “Amalembo ayengi nayaloshiwako, ukusanshako ili twacibelenga nomba line ukufuma mwi Ilumbo 37:11. Ninjishibo kuti mwaipakisha ukubelenga ifi fipande no kufwaya ifya kuloshako muli Baibolo yenu. Kuti naba uwasekelela ukusha yene kuli imwe.” Lyene lumbula umusangulo wa lyonse.
4 Ukutonta pa Ulupungu lwa kwa Kalinda ulwa April 15: Icipande pe bula 4 cipusho kuti: “Ni Kwi Wingasanga Ubutungulushi Bwacetekelwa?”
Pa numa ya kuilondolola we mwine, kuti pambi watila:
◼ “Kwalibako impika ishingi nga nshi mu calo ilelo, pamo nga [lumbulako icintu cimo ico pali ndakai cilesakamika ubwikashi nelyo umutwe wa mu nyunshipepala]. Citulenga ukupapa nga ca kuti uuli onse kuti asanga inshila ya kufuma muli ubu bwafya. Ku ca nsansa, pali 2 Timote 3:16, 17 patwebekesha ukuti Baibolo yaba butungulushi ku nshila ya bumi iya nsansa kabili iya mutelelwe.” Pa numa ya kubelenga ifi fikomo, langa fintu Ulupungu lwa kwa Kalinda lutwaafwa ukumfwikisha umulandu Baibolo yabela ubutungulushi bwacetekelwa.
5 Nga ca kuti wasalapo ukutambika Loleni!, kuti pambi wabomfya uwafuma uwa May 8 kabili icipande “Isubilo lya Cine Cine Ilya Bana.” Mu kupalishako ukasanga ukuti abafyashi bayambukilwa ku kukabila kwa bana kabili balefwaya ukwishiba icingacitwa ku kubaafwa.
6 Nga ca kuti tuli abacincimuka pa lwa bamagazini besu, abawamisha mu calo, tukaba abaswatuka ukutambika ukulembelesha kuli bambi pa kuti na bo bene bengafukatila isubilo lya Bufumu no kwakana mu kusumbula Yehova pamo nga Shikulu Mulopwe wa mu kubumbwa konse.—Amalu. 83:18.