Fwaya Abo Abasontelwa ku Bulungami
1 Imifwaile imo iya mulimo wa kushimikila yaba ya kusanga abo “basontelwe ku kuya mu mweo wa muyayaya.” (Imil. 13:48) Ukwananya bamagazini ba Ulupungu lwa kwa Kalinda na Loleni! kwalishininkisha ukuba ni nshila yawamisha iya kupwishishishamo ici, apantu bamagazini besu balalenga abantu ukwishiba isubilo lya Bufumu. Tukalashalika bamagazini mu April. Tulesubila ukuti, uko tukasanga balesekelela, kuti twatendeka amasambililo ya Baibolo ayapya mu citabo Ukwishiba Uko Kutungulula ku Mweo wa Muyayaya. Pano palipo imitubululo iyo napamo ingabomba kuli iwe:
2 Lintu ulebomfya “Ulupungu lwa kwa Kalinda” ulwa April 1, kuti walangisha icipande icileti “Lumbanyeni Imfumu ya Muyayaya!,” icilelanda pa lyashi lya pa cintubwingi ilya pe bungano lya citungu ilya mwaka wapwile, no kusosa auti:
◼ “Abantu abengi abo tulandako balikwata icitetekelo muli Lesa. Bambi balacisanga icakosa ukusumina muli wene. Mutontonkanyapo shani? [Leka asuke.] Ubushinino bwine bwine ubwa kuti kwaliba Lesa bwashinguluka fye mpanga yonse. [Belenga Ilumbo 104:24.] Lintu twamona kamera nelyo wailesi, mu kwangufyanya tulasumina ukuti afwile apangilwe na kapanga wa mucetekanya. Bushe kuti cabamo ukupelulula ukusosa ukuti ifintu fyacilapo ukupikana, pamo nga isonde na bantunse, fyaishileko fye kuli cela mushuke?” Bomfya paragrafu ukufuma mu cipande ku kulanga umulandu walungama uwa kucetekela muli Lesa. Tambika bamagazini no kulembesha Ulupungu lwa kwa Kalinda.
3 “Ulupungu lwa kwa Kalinda” ulwa April 15 lukwete icipande cileti “Umulandu Ukupepa kwa Cine Kupokelela Ipaalo lya kwa Lesa.” Ilyo taulalanda pali ici cipande, kuti waipusha auti:
◼ “Mu kuba ne myanda ya mipepele iliko mu calo, bushe muletontonkanya ukuti yonse kuti yapokelelwa kuli Lesa? [Leka alandepo.] Yesu asobele ukuti te mulandu no kuitunga kwa bantu bapepa abengi, abashicita icifwaya Lesa bakakaanwa. [Belenga Mateo 7:21-23.] Cili icacindama ukuti twishibe ukupepa kwa cine ukwasambilishiwe na Yesu.” Alukila ku mutwe uuleti “Fisabo Nshi Ifyo Imipepele ya Cine Ilingile Ukutwala?” ukutendeka pe bula 16, kabili landa pa ca kumwenako cimo ku kulangilila ici cishinka.
4 Lintu uletambika umutwe ukalamba uwa “Awake!,” wa April 22, “When Wars Will Be No More,” (Lintu Kushakabeko Inkondo na Kabili) napamo kuti watontonkanya pa kusoso kuti:
◼ “Muli uno mwanda wa myaka mwaliba inkondo ishingi, ukusanshako ne nkondo sha calo shibili. Nalyo line mupepi ne ntungulushi sha calo shonse shilanda ukuti shilefwaya umutende. Uuli onse uo naishiba asosa fye cimo cine. Nga ca kuti uuli onse alafwaya umutende, mulandu nshi bashingaukwatila? [Leka asuke.] Cinshi muletontonkanya cilekabilwa kuli ifwe pa kuti twingamona umutende wine wine pe sonde?” Pa numa ya kwankulako kwa kwa mwine ŋanda, alukila ku mabula 8 na 9 kabili belenga amalembo pamo nga Ilumbo 46:8, 9. Ukubomfya ifikope na malembo yambwilwe, langa ifyo Ubufumu bwa kwa Lesa bukaleta umutende mwi sonde lyonse uyo ukabelelela. Tambika magazini nelyo ukulembesha, kabili tantika ukubwelelako.
5 Nga ca kuti wasanga abengi abaletila bali ne ncito, nakalimo kuti waesha iyi nshila:
◼ “Tuli abasekelela ukwaafwa abantu abali ne ncito kabili abakwata fye inshita inono iya kwibukishapo ifya ku mupashi mu mikalile yabo. Bamagazini besu, Ulupungu lwa kwa Kalinda na Loleni!, bapangilwa ukupayanya ifyebo ifipi pa lwa milandu yacindama iyo yambukila imwe no lupwa lwenu. Kuti natemwa ukumushila aba bamagazini pa kuti mwabelengamo.”
6 Ibukisha ukutambika bamagazini no kulembesha Ulupungu lwa kwa Kalinda pa kashita akali konse. Mu kushininkisha abantu bakanonkelamo mu kubelenga bamagazini ba Ulupungu lwa kwa Kalinda na Loleni!, abaleta ‘imbila nsuma iya mutende.’—Esa. 52:7.