Lanshanyeni Icine na Banenu
1 Limo ilya mafunde yabili ayakulisha ni li: “Uletemwo mubiyo nga we mwine.” (Mat. 22:39) Ukutemwa kwa musango yo kukatucincisha ukwakana icintu cawamisha ico twakwata na banensu—icine ico twasanga mu Cebo ca kwa Lesa. Apantu bamagazini ba Ulupungu lwa kwa Kalinda na Loleni! balengilishako ubukombe bwa Baibolo ubwa cine, ukwananya aba bamagazini mu kati ka mweshi wa May ni nshila imo iya ‘kulanshanishamo icine na banenu.’—Efes. 4:25.
2 “Loleni!” wa May 8 alingile ukutambikwa ukufikila apwa onse. Nakalimo kuti mwatendeka ukulanshanya pa kwipusha ukuti:
◼ “Mutontonkanya shani pa lwa calo cabulamo inkondo? [Lekeni asuke.] Bushe mwalishibe ukuti imipepele ya mu calo mu cine cine ilatwala pa ntanshi inkondo no kwipayana? [Lekeni asuke.] Mu kupusanyako apakalamba, moneni cintu Baibolo ilanda ukuti bakapepa ba cine aba kwa Lesa bakacita.” Belengeni Esaya 2:2-4 pa muulu pe bula 4 ilya magazini, kabili lyene pe bula 10 belengeni paragrafu wa kubalilapo pe samba lya kamutwe kanono akaleti “Ubwite ku Batemwa Umutende.” Mu kukonkapo, ipusheni amuti: “Bushe mwalishiba fintu Lesa akacita ico? Icasuko cisangwa muli uyu magazini, kabili uyu alaba ni magazini wenu uwa kubelenga.”
3 Lintu muletambika “Ulupungu lwa kwa Kalinda” ulwa May 15, esheni ukulosha ku ca kucitika ca ndakai ico calenga abantu ukuyumfwa abashacingililwa, kabili lyene ipusheni ukuti:
◼ “Cinshi muletontonkanya cilefwaikwa pa kuti tuleyumfwa abacingililwa bwino bwino muli iyi mikalile yesu? [Lekeni asuke.] Ukukanapita mu mbali, bushe calibamo amano ukucetekela bantunse ukupikulula amafya yalolenkene no mutundu wa muntu? [Lekeni asuke; lyene belengeni Ilumbo 146:3.] Kemba wa malumbo mu kukonkapo atupeela umulandu wa kwenekela inshita ya ku ntanshi iyawamisha. [Belengeni Ilumbo 146:5, 6.] Ici cipande, ‘Umutelelwe wa Cine, Nomba na Kuli Pe na Pe,’ cilelondolola umulandu twingacetekela Yehova Lesa ku kuleta imibele yawaminako pe sonde.” Tambikeni bamagazini bafulilako no kubwelelako ku kulanshanya fintu cingacitikako ukuipakisha ubumi bwacingililwa ino ine nshita.
4 Ilyashi lya pa nkupo muli “Loleni!” wa June 8 lilingile ukucebusha ubuseko bwa bantu mu cifulo ca kubombelamo ica ku ŋanda ne ŋanda ne ca bukwebo. Kuti mwalondolola lyene pa kusoso kuti:
◼ “Abanakashi abengi balikumanya ubwafya bwa kubacusha mu cifulo ca ncito. Imibele naibipisha ica kuti ifilye nafitendeka ukukanda abalecita ifi no kufuta ifinakabupalu. Pamo nga ukubombela abantu, twasabankanya ili lyashi, ilyo lilefumyapo bufi bwaseeka pa lwa uyu mulandu. Na kabili lilepayanya imfundo shibomba ku banakashi na baume pa lwa fintu bengaicingilila abene ukufuma ku kuba icinakabupalu ku kucushiwa nelyo ukupeelwa umulandu wa kucusha. Bushe kuti mwatemwa ukubelenga uyu magazini wa Loleni!? [Lekeni asuke.]
5 Nga ca kuti mwatemwa imipeelele iipi, nakalimo kuti mwaesha ici:
◼ “Abengi bayumfwa ukuti bamagazini abengi abalumbuka aba lelo bakwatamo ifyebo ifingi pa lwa bukwebo, ifya bwaume no bwanakashi, nelyo ulukaakala. [Balangisheni Ulupungu lwa kwa Kalinda na Loleni!] Tuleananya aba bamagazini basuma abashimpwa pali Baibolo. Mwaliba ifya kufunda kabili balatusambilisha ukupepa Lesa, ukutemwa abanensu, no kusungilila imyendele yatambalala. Nga ca kuti mwatemwa uyu musango wa fyebo fya kubelenga, ninjishiba ukuti mukaipakisha ukubelenga ifyo mukasanga muli aba bamagazini.”
6 Nga ca kuti tuli abapimpa mu kulanshanya icine na banenu, kuti twaba na maka ya kulenga abengi ukuba aba buseko nga nshi.—Imil. 8:4, 8.