Ibungano lya Citungu Ilya “Bakalumbanya ba Buseko” Ilya 1995 Ilya Nte sha kwa Yehova
1 Fintu cali buseko ukuba pa kati ka basangilwe ku mabungano ya Citungu aya “Akatiina ka Bukapepa” abali 327,856 mu cifulo ca musambo wa Zambia ulusuba lwa mwaka wapwile! Ubwingi bonse pamo ubwa 1,555 balumbulwile akatiina kalinga aka bukapepa pa kubatishiwa. Fintu cikaba ica kukoselesha ukulongana uno mwaka ku Mabungano ya Citungu aya “Bakalumbanya ba Buseko” aya nshiku shitatu aya mu 1995! Uyo mutwe wa kucincimusha ulingile mu cituntulu ukutukunta ukucito kubombesha ukuli konse ukwa kusangwako na basambi besu aba Baibolo. Programu akashininkisho kuba ni ntulo ine ine iya kupembesula kwa ku mupashi kuli ifwe bonse ilyo tuletwalilila mu busumino ukubombela Yehova muli ino nshita ya mpela.
2 Shininkisheni ukucita amapekanyo yenu aye bungano mu kubangilila kwalinga pa kuti mukabe kulya ku kuipakisha inshiku shonse shitatu isha programu wa ku mupashi uwabamo kubekwa, ukufuma pa lwimbo lwa kwiswila ukufika na kwi pepo lya kwisalila. Mu kubamo kutemwa mu mapekanyo yenu sanshenimo abo abengakabila ukwafwilisha, maka maka abapya abalesekelela, pa kuti na bo bene bakabepo pa kulongana konse. Kuti cabe ca kwaafwa ukulanguluka ifyebo muli ici ca mu kati na basambi ba Baibolo abali bonse abo pambi balepanga ukusangwako. (Gal. 6:6, 10) Programu akatendeka ne nyimbo pa 9:20 hrs. pa bushiku bwa kubalilapo no kupwa mupepi na 17:00 hrs. Pa bushiku bwa cibili programu akatendeka pa 9:00 hrs. no kusondwelela no lwimbo ne pepo mupepi na 16:30 hrs. Iciputulwa ca kulongana kwa lucelo ica pa bushiku bwa citatu cikatendeka pa 9:30 hrs., kabili programu wa kalya kasuba akasondwelela mupepi na 16:15 hrs. mu cungulo kasuba. Ifyebo fyakonkapo fikamwaafwa mu mapekanyo yenu aya kutendekelako.
3 Ukutantika kwa Mayanda: Ilingi line bamunyina bapanga amapekanyo yabo abene ukwikala na bantu babo nelyo ifibusa mu misumba umukabela amabungano. Mu ncende sha mu mishi, bamunyina bakuula imisakuta nelyo balaala mu fiyanda fikalamba ifipekanishiwa na bakabomba ba kuitemenwa abe bungano. Amabungano yanono yabomfya amayanda ya kulaalamo abana ba masukulu pa kuti bengapayanishisha umwa kusendama bonse abalesangwako. Lintu bapayanishiwilwa umwa kusendama na bamunyina nelyo abantu babo, tacili icalinga ku makombe ukushukila mu kukanalangulukilako icileela ca bamunyinefwe pa kwenekela ukupayanishiwilwa umwa kusendama inshiku shalundwako pa kuti bengatuusha pa numa ye bungano. Iyi miputule ya ciputulwa ca nshita ice bungano epela. Abo abapokelela umwa kusendama mwa musango yo balingile ukumona ukuti bene na bana babo baikala mu mucinshi mu ŋanda ya kwa shibweni wabo no kukanaonaula icili conse nelyo ukusakawila mu fipe nelyo incende sha pa mbali isha mu ŋanda. Nga ca kuti abene mayanda bakumanya ubwafya ubuli bonse ukulola kuli ifi fyatubululwa, ifi filingile ukuletwa ku kusakamana kwa Dipartimenti wa Mayanda mu kwangufyanya pe bungano, kabili bamunyina kulya bakaba aba nsansa ukwaafwa.
4 Ukukabila Kwaibela: Uku kupayanya kwa kuli bakasabankanya ba ca kumwenako cisuma epela, ukusanshako na bana babo aba mibele isuma, abasuminishiwa na Komiti wa Mulimo uwa Cilonganino. Imitantikile ku kusakamana abantu abakwata ukukabila kwaibela ilingile ukucitwa ne cilonganino uko basangwa, ukucila ukuti uku kukakililwako kubikwe pa kuteyanya kwe bungano. Baeluda na bambi abali abaibukila pa lwa mibele ya muntu umo umo kuti mu kubamo kutemwa batambulula ukwaafwa. Ici ilingi line cifwaya ukuti bakasabankanya balanguluke ukukabila kwa abo baba mu mulimo wa nshita yonse, abakoloci, abalwalilila, kabili nakalimo na bambi. Bakasabankanya kuti pambi batambulula ukwaafwa pa kusendako aba musango yo nelyo ukusakamana ukukabila kwabo mu nshila shimbi.—Yako. 2:15-17; 1 Yoh. 3:17, 18.
5 Abo abakwata ukukabila kwaibela TABALINGILE ukuya kwi bungano no kwipusha umwa kusendama lintu bafika, pantu Dipartimenti wa Mayanda afwile ukwebekeshiwa ukufuma kuli Komiti wa Mulimo uwa Cilonganino.
6 Amakombe Ayasangwako Ukufuma ku Nse ya Ncende Yapeelwa: Mupepi na lyonse, icifulo icipeelwa kuli imwe ukusangwako ciba ni cimo icipalamishe ku cilonganino cenu. Imitantikile ya kukwata apa kwikala pakumanina, impapulo, umwa kusendama, na fimbipo, ishintilila pa kutunga kwa kuti icinabwingi ca bakasabankanya bakasangwa kwi bungano uko icilonganino cabo capeelwa. Nangu cibe fyo, nga ca kuti pa mulandu usuma mukasangwa kwi bungano pa mbali ya ilyo mwapeelwa kabili mulekabila umwa kusendama, kalemba wa cilonganino kuti pambi aorda ukufuma ku Sosaite formu wa Kulomba Umuputule wa Kukabila Kwaibela, untu mulingile ukwisusha no kusainisha. Lyene mukautume ku maofesi ye bungano uko mukasangwa.
7 Ukubombela Pamo Kwenu Kulakabilwa: Ukutunguluka kwa uku kutantika kwa mayanda kushintilila pa kubombela pamo ukwa bonse ababimbilwemo. (Heb. 13:17) Ukutelela no kutunguluka uko ukutantika kwa mayanda ne mibombele ya fya kulya fibombelamo kushintilila pa kubombela pamo ukwa uli onse uubimbilwemo.
8 Pa kubimbwamo mu mabungano ya bantu ba kwa Yehova, tulakoshiwa ukucita ukufwaya kwa kwa Yehova kabili tulacingililwa ku kusonga kwa ku calo ukwa ku nse uko ukwinganyanyantila icitetekelo cesu ica Bwina Kristu. Bonse kuti twaba aba kutasha ukuti Yehova alipayanya ifi fiputulwa fya nshita ifya kupembesula kwa ku mupashi ku bantu bakwe abaipeela muli ino nshita ya mpela.
9 Ukucilikila Umulilo na Masanso Yambi: Ukwabulo kutwishika, icikalamba icilenga umulilo pa mabungano, tacaba kwipikila ifya kulya mupepi ne misakuta, lelo bana abashangalilwa bwino abangasha umulilo nelyo abekala ku mulilo. E ico, ku kucingililwa kwenu no kwa bamunyinenwe, mwilaleka abana benu ukwendauka ukwabula ukusakamanwa; mwilashiila abana banono ukusakamana amenshi yalebilauka, nelyo mu nshila imbi ukusakamana umulilo wa kwipikila. Kuti pambi bakwata amaka ya kucite fi fintu bwino ku ŋanda, lelo icifulo ce bungano cintu capusanako kabili ukusakamana kwaibela kulingile ukubuulwa pa kusengauka amasanso ukucitika. Abantu abengi bekala capamo mu kupalamisha, kabili abana batemwa ukwangala ifyangalo lintu bali na baice banabo. Balapumbulwa mu kwanguka kabili tabamwena libela ubusanso, kabili pali iyi milandu tatulingile ukubapeela kandulo, macisa nelyo inyali. Impika na imbi ilemako lintu abafyashi baya ku kulongana mu kasuba no kusha abana banono mu misakuta ukwabulo kusakamanwa. Abana balingile ukwikala na bafyashi babo mu kati ka programu. Lintu bakapyunga bamona abana baleendauka mu cifulo ce bungano ukwabulo kusakamanwa, kuti batungulula abo bana ukubwelela ku bafyashi babo. Mwe bafyashi! twapaapaata bombeleni pamo na bakabomba ba pe bungano kabili muli iyi nshila langilileni “[ukutemwa] aba bwananyina.”—1 Pet. 2:17.
10 Ukuteyanya kwa kwa Yehova mu kubamo kutemwa kulapayanya ifya kucinkulako ifyalingana ne nshita mu kulundana na mabungano. Ca bulanda ukusoso kuti pa mabungano yafulilako imyaka yafumako, abalesangwa kwi bungano bamo balilufishe ifipe fyabo ukupitila mu mulilo uyo wali no kusengaukwa. Abo bamunyina abashingamwa pa mabungano, kabili ukucilisha abafyashi, baleipushiwa ukupeelako ukusakamana kwaibela kuli ifi fishinka fyacindama pa kuti amabungano yesu yakafumemo ukubishanya kwa kukuulilila kabili ukusuma, kabili tayakendele pamo no bulanda ne nkumbabulili pa mulandu wa mulekelesha uuletako amasanso.
Icishibisho kwi Bumba lya Baeluda: Baeluda TABALI na kutantika Ukulongana kwa Mulimo mu mulungu we bungano. Takulingile kubako ukulongana muli uyu mulungu. Uko cingacitika, kalemba wa cilonganino alingile ukubomba pa fyebo no kubilisha ifikumine kwi bungano pa Kulongana kwa Mulimo ukwa nshita ya ku ntanshi kano fye nga calangililwa mu kupusanako nelyo nga wene tali na maka ya kucite co.