Ukwangushako Amabungano

¹ Tulolesha kuli Yehova kwi paalo lyakwe ilyo tuselela ku ntanshi mu kulundulukilako. Twaliba aba nsansa ukumono kuti alipeela abantu bakwe umupashi wa mano uukabilwa no mucetekanya. Tufwile ukusumino kuti ukupitila mwi bumba lya musha wa cishinka, Yesu Kristu alitungulula imilandu mu kutunguluka ku kufishiwapo kwa mifwaile ya kwa Yehova mu nshila ya kusungusha. (Mat. 24:45-47; Kol. 1:9, 10) Kalata wesu uwa pa bushiku bwa CO May 10, 1994, alondolwele ukuti: “Ukutendeka ne Bungano lya Citungu ilya ‘Akatiina ka Bukapepa’ ilya uno mwaka, ukuteulula kukatendeka. Takwakabe na kabili amakafeteria ayali yonse.” Ifi fyebo ficili ifyo fine. Ifya kulya fikapekanishiwilwa fye abo abakenda ukufuma ukutali ku kusangwa ku mabungano. Nangu cibe fyo, ifya kunwa fyatalala pa mabungano ya mu misumba ikalamba fikabako. Amabotolo yafwile ukubweshiwa ku fifulo fya fya kunwa fyatalala pa numa ya kubomfiwa.

² Nge ca kufumamo ca kwangushako imibombele ya kupayanye fya kulya bamunyina abengi na bankashi abalebombesha mu kati ka fiputulwa fya nshita ifya kulongana ku kutupayanishisha ifya kulya baali na maka ya kukutika kuli programu. Mwandi uku kwali kuteuluka kusuma, ukulenga umulimo ukwangukilako no kuleka ukusakamana kwakulilako ukupeelwa ku mbali sha ku mupashi ishe bungano, mu kuba na bakabomba ukuba na maka ya kukutika no kuipakisha programu mu kucililako. (Amala. 31:12) Ukufumyako Umulimo wa fya Kulya kukacilenga ukucitikako ku bafulilako na bambi ukumwenamo ukufuma kuli programu wa ku mupashi.

³ Mu kati ka myaka lintu ifya kulya fyaleipikwa no kwananishiwa, impendwa ikalamba nga nshi iya ba kuitemenwa yalekabilwa ku kuteyanya no kutungilila imitantikile.

⁴ Ukubomba kwa kuitemenwa ukwa abo ababombele nga aba kuitemenwa muli ulu lubali kwaliba ukwa mutengo nga nshi kabili kwalitashiwa apakalamba. Nangu cibe fyo, mu kuba no ku kwangushako, ayo makana ayalebombela mu kushita, ukupekanya, ukutuma, no kwananye fya kulya bakaba na maka ya kubomfya inshita yabo mu fikonkelelo fimbi ifyafwaikwa ifya Bufumu, ukusanshako ukuipakisha ukubishanya pa mabungano mu kukumanina kwacilapo. Abo aba kuitemenwa abalebombela mu Mulimo wa fya Kulya bakaba nomba na maka ya kwafwilisha mu madipartimenti yambi, pamo nga aya Bakapyunga no Busaka. Ici cikangushako icisendo ku uli onse kabili tacakafwaye ukuti abengi bakalebomba ukufiko bushiku, ukucelela, nelyo mu kati ka fiputulwa fya kulongana, nga fintu cali ku bengi abali mu Mulimo wa fya Kulya.

⁵ Ukwafwilisha uku Kutantika: Sosaite ilatasha apakalamba ukwafwilisha kushaiwamina uko imwe bamunyina na bankashi mwapeela “ne mitima ya cishinka” pa myaka iingi ku kutantika kwa mabungano, ukusanshako na ku mulimo wa fya kulya. (1 Imila. 29:9) Ici calyafwilisha mu nshila ishingi. Calilenga abo abalesangwako ukutwalilila ukuba pa cifulo ce bungano mu kati ka kutuusha ukwipi ukwa kasuba pa kati pa kuti bengapoke ca kulya bwino bwino, ukupembesulwa, kabili lyene ukubapo kuli programu wa ku mupashi. Kabili ukwabulo kutwishika bukapekape no kwafwilisha ifyalangwa na bamunyina na bankashi mu kusangwila kuli uku kupayanya fikatwalilila. Kwaliba kulumbulula kwa kutesekesha kwabo mu nshila ibomba.—Amapi. 11:25; Luka 16:9.

⁶ Ukusakamana Ukukabila Kwenu Ukwa fya Kulya: Mu kuba no ku kuteulula, nangu cibe fyo, cikalafwaikwa ku bantu umo umo na mabumba ya ndupwa ukulaipayanishisha abene icilekabilwa mu musango wa ca kulya ca ku mubili mu kati ka kutuusha kwesu ukwa kasuba. Tulacindikisha apakalamba ukumwenamo kushaiwamina ukwa muli programu wa ku mupashi. Ukuleka ifya kulya fya ku mubili fibuule ukucindama kushalinga tacingabamo amano. Calikatama ukuti umo na umo “[asuminishe] ifyacilamo” muli kuno kuloshako. (Fil. 1:9, 10a) Amabungano yakalamba aya nomba line aya bantu ba kwa Yehova mu Poland, Russia, na Ukraine, pamo pene na mu ncende shimbi, yalicitwa no kutunguluka kushaiwamina ukwabula ukutantika kwa mulimo wa fya kulya. Kuli kumo na kumo amakombe baliisendele ifya kulya fyabo abene ifya pa nshita ya kasuba. Tukasanga ukuti nga twasenda fye ica kulya caanguka ica kasuba, cikalenga umuntontonkanya wesu ukuba uwalola, ukutulenga ukumwenamo mu kukumanina muli programu wa cungulo kasuba. Mu kumfwana ne ci, uuli onse alingile ukwisa ne ca kulya icaanguka kabili icabamo mulyo. Ku ca kumwenako, lintu Yesu aliishishe amabumba, apayenye fye ifintu fibili, umukate ne sabi. (Mat. 14:16-20; mona kabili Luka 10:42a.) Uku kutantika kumo kwine kukakonkwa pa kulongana kwa muputule ne nshiku sha kulongana kwaibela. Mu kumfwana ne ci, tuli aba nsansa ukupeelako imitubululo imo ukukuma ku cingaba icalinga ne cingabomba mu cilolwa ca kutuusha kwaipifiwa no musango wa fikuulwa tubomfya.

⁷ Apantu takwakabe na kabili ukutantika kwa mulimo wa fya kulya pe bungano, mu kuba no kupekanya kusuma abo abakasangwako bakaba na maka ya kuipakisha umwikulo ne ndupwa shabo atemwa ku ŋanda nelyo pa cifulo ca kuliilapo ica mu ncende bekala. Pa kutuusha mu kukumanina ubushiku bubangilileko, mulingile ukuba na maka ya kubuuka mu kubangilila kwalinga ku kuyakwata ifya kulya fyalinga ku kulya kwa lucelo no kufika pe bungano ilyo kucili inshita ikalamba iya kuipakisha ukubishanya na makombe yambi. Nga fintu cali ku numa, takwakabeko ukukabila ku uli onse ukubilingana ukuya ku cifulo ce bungano ukufwaya ifipuna, pa mulandu wa kuti kwalibako apa kwikala pakumanina kwi bumba ilyapimwa.

⁸ Ukutuusha kwa kasuba mu nshila imo kukaba ukwaipipako ukucila pa mabungano ya ku numa. Nangu cibe fyo, nalyo line kukapayanya ishuko lya mu nshita ilya kulya ifya kulya fyayanguka, pamo pene ne nshita ya kubishanya kumo na bambi. Bamunyinefwe na bankashi abekala mu musumba umukabele bungano nelyo lwa mupepi kabili abakalabwelela cila bushiku ku mayanda mu fyungulo mu kwanguka bakalaba na maka ya kupekanishisha icilundwa cimo na cimo ica lupwa ifya kulya finono ifya kusenda ku kubomfya pa kutuusha kwa kasuba. Ici cikaba cimo cine nge ca kulya ca kasuba cintu imisepela isenda ku sukulu, nakalimo isangwechi ne citwalo, bisiketi, ne fya kunwa fyatalala. Abantu abengi balasenda ifya kulya fya kasuba pa kati ifyapalako ku ncito shabo isha ku mubili. Kuti twatemwa bamunyina ukukanalaya ku ŋanda lelo ukutwalilila ukuba pa cifulo ce bungano mu kati ka kutuusha kwa kasuba pa kati.

⁹ Apantu icifulo ce bungano mu cituntulu cisanguka Iŋanda ya Bufumu ikalamba mu kati ke bungano, cilaba na kabili ica mano ukusengauka ukulundulula imibele ya pa lwendo lwa kukokoloka mu kati ka kutuusha kwa kasuba. Kabili pamo fye nga fintu tushilya mu kati ka kulongana pa Ŋanda ya Bufumu, e fintu tushingalaliila nelyo ukunwa mu kati ka ciputulwa ca kulongana pe bungano. Ifya kutalalika ifikalamba ifya pa lwendo lwa kukokoloka tafyakasuminishiwe mu cikuulwa umo ibungano likacitilwa apantu kuti fyalenga amasanso. Nga cafwaikwa, ica kutalalika cinono icingabikwa mwi samba lya cipuna, te pa cipuna, kuti pambi cabomfiwa.

¹⁰ Ukucenjela na kabili kulekabila ukubomfiwa ukukuma ku misango ya fya kusendelamo ifya kunwa fintu tusala ukuleta ku cifulo ce bungano. Ifya kunwa fyakaba kuti pambi fyasendelwa muli bafulasiki. Ifya kusendelamo fyapangwa na mabotolo ifya musango uuli onse kuti fyaba fya busanso. Tulelomba, kanshi, ukuti TAKULI ICA KUSENDELAMO CE BOTOLO icikaletwa pa cifulo.

¹¹ Ukumwenamo Kwalundwapo: Mu cine cine kuti twamona amano mu kutantika kwateululwa ukwa musango yo. Bonse bakaba na maka ya kupeela ukusakamana kwakumanina ku kupokelela ukumwenamo kwa ku mupashi—iili e mifwaile ine ine iya kubunganina kwesu. Uku kumwenamo kupayanishiwa mu kubishanya tuipakisha pamo pene na muli programu wine. E co mu cifulo ca kufuma pa ncende ye bungano pa kutuusha kwa kasuba pa kati ku kufwaya ifya kulya, fintu cikashininkisha ukuba ica bunonshi ukuisendela ifya kulya fwe bene. Ici cikacilenga ukucitikako ukuipakisha ukubishanya na bamunyinefwe na bankashi kabili cikatucilikila ku kukanapuswa kuli programu wa cungulo kasuba.

¹² Pa kuba abapembesulwa lwa ku mupashi pa numa ya programu wa cungulo kasuba, bamo kuti pambi baipakisha ukutwalilila ukubishanya no kulanshanya pa lwa fintu fisuma ifyacisambililwa ilintu balelya ica kulya cikalamba pamo no lupwa ne fibusa mu mayanda ya kuliilamo aya mu ncende yabo. Bambi kuti pambi bashitako fye fimo umo bashita ifya kulya nelyo umo bashitishe mpao. Abo ababa na maka ya kubwelela ku mwabo pambi e kuntu bengasalapo ukukwatila ica kulya cabo ica cungulo, ukupala fintu bacita inshiku shimbi isho baya ku ncito yabo iya ku mubili nelyo mu mulimo wa mwi bala.

¹³ Mu cine cine tulaipakisha umutebeto wa ku mupashi pali uku kulongana kukalamba na mabungano, uko tupokelela impapulo shipya, ukusambilisha kushaiwamina, no kufunda kubomba. Aya mapaalo yaba e fintu uuli onse ebukisha, capamo no buseko bwa kuba pamo na bantu ba kwa Lesa abalongene. Amapinda 10:22 yatila: “Ipaalo lya kwa Yehova lyene lilacindamika, kabili talundako ukulungulula.” Ici caba ni pa mulandu wa kuti pamo nga abantu ba kwa Yehova, tatusangwa ku mabungano mu kuba ne cilolwa ca kufwaya ifintu fya ku mubili no kucibondola. Tulongana mu kuba no kufwaisha kwashininkishiwa ukwa kunonka ukumwenamo kwakulisha ukwingabako mu nshila ya ku mupashi, kabili Yehova alatulambula mu kufumba pa mupashi untu tulangisha.—1 Tim. 6:6-8; Heb. 11:6.

¹⁴ Utu tushita twa kukoselesha na kabili tutucinkulako ulwa kulunduluka kwa kulobolola kwa ku mupashi. (Yoh. 4:35, 36) Amashiwi ya kwiswila aya kwa Esaya icipandwa 54 yapinda ukuteyanya kwa kwa Yehova ukwapalo mukashi ukuipekanishisha ku kwingilishiwako kwabamo buseko. Ukukula kwatwalilila, ukutanunuka, no bukose bwabukululwa fili mupepi nga fintu Esaya aseseme ati: “Tangula apa kwikale hema lyobe, ansa ne fipembe fya bwikalo bobe, wishako; lefye myando yobe, ikasha ne mambo shobe. Tangula apa kwikale hema lyobe, pantu ukapongokela ku kwa kulyo na ku kwa kuso.” Ukufikilishiwa kwa ubu busesemo bwa kucincimusha kwafumamo ukutanunuka kwa kupapusha ukwa kupepa kwa cine kuntu nomba tulemona.—Esaya 54:1-4.

¹⁵ Mu cituntulu cilemoneka ukuba ni nshila ya bupingushi busuma ukubomfya uku kutantika kwayangushiwako ukwa mabungano pa kuti mu kuba no kupumbulwa kwacepako bonse bakabe na maka ya kuipakisha programu wa ku mupashi uupekanishiwe. Tulecetekela ukuti ici na kabili cikakwata ipaalo lya kwa Yehova, apantu cikapekanishisha ukwisabomba mu kutunguluka kwacilapo pa kukula kwalundwapo. Pa kutontomesha pa cilekabilwa, tukaba na maka ya kuipakisha inshiku shesu ishiteyanishiwe isha kubishanya kwa nsansa ne fintu fisuma ifya ku mupashi. Cili kupepa kwesu ukwafumaluka ukuti Yehova akapaala ukubombesha kwesu konse ilyo tuletwalilila ukubungana no kuliishiwa pe tebulo lyakwe.—Linganyako Amalango 16:14, 15.

[Akabokoshi pe bula 6]

Ukumwenamo kwa Kukanakwata Aba Kwipika Ifya Kulya

◼ Umulimo wacepelako pa ntanshi, mu kati, na pa numa ya programu, ukusuminisha ukubishanya kwakulikako

◼ Takuli ifibombelo fya mulimo wa fya kulya ifya kulasakamana

◼ Abantu bafulilako ukuba na maka ya kupeela ukusakamana kwakumanina kuli programu wa ku mupashi

◼ Aba kuitemenwa bafulilako bakabako ku kwafwilisha amadipartimenti yambi

◼ Kulabako inshita yakulilako ku fikonkelelo fimbi ifya teokrasi

Ifiletubululwa Ukusendwa ku Kulya pa Kutuusha kwa Kasuba

◼ Ifya kulya fya kasuba ifyayanguka, ifishayafya ukupekanya, kabili ifyabamo mulyo

◼ Imbalala, ifyafumbikwa, ifitwalo

◼ Ica kutalalikilamo icinono nga cingafwaikwa

◼ Ifya kunwa fyatalala, amenshi yafumishiwa mu fitwalo, nelyo amenshi yalongelwa libela mu fya kusendelamo fishingatobeka

MWIKALETA ifi mu Cifulo ce Bungano

◼ Ifya kunwa fikola

◼ Ifya kusendelamo fyapangwa na mabotolo

◼ Ifya kutalalikilamo fikalamba ifyo ulupwa lusenda pa lwendo lwa kukokoloka