Yehova Alakosha
1 Pamo nga abantu ba kwa Yehova, twalipeelwa umulimo wa kushimikila imbila nsuma pa nshita imo ine ukutwalilila ukwenda “bwino mu Bena fyalo.” (1 Pet. 2:12; Mat. 24:14) Mu cilolwa ca shino inshita shakakala pamo pene na mabunake yesu yene no kupelebela, tatwingapwilikisha uyu mulimo pa lwesu fweka. (2 Tim. 3:1-5) Fintu twaba aba buseko ukuti twalikwata Yehova ngo wa kutwaafwa!
2 Umutumwa Paulo ashipikishe ifya kwesha ifingi. (2 Kor. 11:23-27) Ni kwi afumishe amaka ya kubomba ne fya kwesha ifi no kupwilikisha umulimo apeelwe? Yehova alimupeele “ukucishamo kwa maka.” (2 Kor. 4:7) Paulo alishibe ukuti Lesa alemwaafwa muli ilya nshila lintu alembele ukuti: “Ndi na ’maka aya kucite fintu fyonse mu ulenkoselesha.” (Fil. 4:13) Yehova ali no kutwaafwa mu nshila imo ine. Ni shani fintu twinganonka uku kwaafwa?
3 Ukupitila mu Kupepa no Kukanaleka: Yesu atucincishe ukutwalilila ‘ukulomba, ukufwaya, no kukunkunsha,’ kabili ukukanaleka. (Luka 11:5-10) Umukoosha wesu mu kupepa ulangilila Yehova ukuti tuli abayangwako mu kushika, tulecifwaisha apakalamba, no kuti inkuntu yesu ili ya cine cine. (Ilu. 55:17; 88:1, 13; Rom. 1:9-11) Paulo alishibe ubucindami bwa mukoosha mwi pepo lintu atucincishe ‘ukupepa no kukanaleka.’ (1 Tes. 5:17) Imo iya nshila shikalamba isho tunonkelamo ukwaafwa kwa kwa Yehova yaba kupitila mwi pepo.
4 Pa Kukonka Ubutungulushi bwa Teokrasi: “Teokrasi” cipilibula “ukutekwa na Lesa,” uwaba kutemwa. Tulanonkelamo muli uku kuteka pa kwishiba amaka yakwe no kukonka amakambisho yakwe mu kupingulapo ukukalamba no kunono. “Umusha wa cishinka kabili uwashilimuka” emininako imitekele ya teokrasi pano isonde. (Mat. 24:45-47) Ukubombela pamo no kuteyanya uko uyu “musha” abomfya kwalikatama nga tuli no kunonka ipaalo lya kwa Yehova. (Linganyako AbaHebere 13:17.) Yehova ali no kulambula bucishinka bwesu kuli wene no kuitemenwa kwesu ukwa kumfwila amafunde yakwe pa kutupeela amaka tukabila pa nshita yalinga.—Heb. 4:16.
5 Pa Kutwalilila Ukupalamina Kuli Bamunyinefwe: Ukutemwa e ca kwishibikilwako ica basambi ba kwa Yesu. (Yoh. 13:34, 35) Apo twakwata ubuntu bwalekanalekana nga nshi, ukushenkana kuti kwaimako pa kati kesu pa mulandu wa uku kupusana kwa buntu. Tulekabila ukuba aba nkumbu shabondoka, ababelelano luse. (Efes. 4:32) E lyo cingacitikako ukutwalilila ukuba abapalamisha kuli bamunyinefwe mu citetekelo no kukoseleshiwa ku kushipikisha kwabo ukwashangila pe samba lya ca kwesha. “Pa kwishibo kuti [bamunyinefwe] ba pano isonde batuulo mutuulo uyo wine wa kucula,” tulaba no bukose bupeelwa na Lesa ku kubomba no kutitikisha kwapalako.—1 Pet. 5:9.
6 Pa Kutwalilila Ukukwata Icibelesho Cisuma ice Sambililo lya pa Lwesu: Ukukosha imintontonkanya yesu ne mitima lwa ku mupashi kutulenga ukulwisha ukusansa kwa kwa Satana. (1 Pet. 5:8) Icibelesho cisuma ice sambililo lya pa lwesu cikakushako ubutala bwesu ubwa kwishiba kwa bukapepa. Kuti tulefumya ubukose pali uku kwishiba lintu tulelolenkana no kusonsomba kwa cila bushiku. Paulo alyebekeshe ukuti “ukwishiba” kwalikatama nga nshi pa kuti umuntu apusuke. (1 Tim. 2:3, 4) Cilakabilwa ukulya ica kulya ca ku mupashi cila nshita.
7 Ukupayanya konse ukukabilwa ku kutwaafwa ukuba abakosa e ko kwaba kale kale mu cilonganino ca Bwina Kristu. Ukutungilila kwa mutima onse ukwa mibombele ya cilonganino kukatwebekesha ukuti ‘twakulaenda no kukanapomponteka.’—Esa. 40:29-31.