Bomfya Inshita Yobe Bwino
1 Yehova alasunge nshita. Na ifwe bene afwaya ukuti tulesunge nshita. Ukupitila mu kuteyanya kwakwe alatwaafwa ukusunge nshita. Tucincishiwa “ukupikintika pe mu mulimo wa kwa Shikulu.” (1 Kor. 15:58) Muli iyi nshila, kuti twacilapo ukuba aba kufumamo cimo mu mulimo wa kwa Yehova.
2 Ifwe bonse tukwata ubwingi bwa nshita bumo bwine cila mulungu—amaawala 168. Bushe tubomfya shani inshita yesu? Bushe mu cituntulu tulamoneka ukuti natwishiba fintu inshita ili ukufuma ku mimwene ya kwa Yehova? Bushe tulapumbulwa ku mibombele ishakatama?
3 Cili icacindama ukuti tube abaiteyanya bwino. Abengi balesha ukutantika umutande wa fintu fyacindama ifya kucita. Cimo na cimo cilatantikwa pa mutande ukulingana na fintu cicindeme. Ni shani fintu ubo bucindami bwingeshibikwa? Baibolo isoso kuti umuntu alingile “ukumone cisuma mu kucucutika kwakwe konse.” (Luk. Mil. 3:13) Imilimo imo ilaletako ifisabo ifisuma ukucila imbi. Languluka ifisabo ifyo umulimo umo na umo uli no kuletako. Bushe ukupwisha umulimo umo kukaletako ubunonshi bwacindama? Bushe uli no “kumone cisuma” mu kucucutika kobe? Nga te ifyo, ninshi uyo mulimo tauli uwacindama sana.
4 Mu Butumikishi Bwesu: Tulatasha nga nshi lintu bambi baisa ku kukumana kwa mulimo wa mwi bala ukwabulo kucelwa, ukukutika mu kusakamanishisha ku mitubululo, kabili mu kwangufyanya balungama ku cifulo ca kubombelamo. Kuti cacilapo kuwama ukupamfiwa mu kushimikila ukucila ukupembelela. Ukwabulo kutwishika Paulo alimwene ukucindama kwa muyano lintu alembele ukuti: “Fyonse ficitwe busaka busaka kabili mu kukonkana.”—1 Kor. 14:40.
5 Lintu twafumina mu mulimo wa mwi bala, kuti twaonaula inshita yakatama pa tushita twa kupeemwina. Nangu cibe fyo, kuti pambi mwapeemwinako pa numa ya kubomba amaawala ayengi mu mulimo. Nelyo lintu imiceele taili bwino sana, ukupeemwina kuti kwatupembesula no kutwaafwa ukutwalilila ukubomba. Nangu ni fyo, abengi, basalapo ukutwalilila no mulimo wa kucitilo bunte ku bantu ukucila ukukumana pamo na bamunyina ku kutuusha mu nshita bapaatulako ukuti ya kubombamo ubutumikishi. Icilekabilwa kulinganya.
6 “Kabaso . . . wena aishibe nshita shakwe ishalingwa” isha kukuukilamo, kabili ububenshi “buteyanye cilyo ca buko ulusuba” pa kuti bwingaiteyanishisha ku nshita ya mpepo, e fisosa Baibolo. (Yer. 8:7; Amapi. 6:6-8) Pano kanshi e pali ulufungulo lwa kubomfya bwino inshita. Na ifwe bene ‘tufwile ukwishibe nshita shesu ishalingwa.’ Ukwabula ukuba abaumina kumo mu kucishamo, tulingile ukusunge nshita. Tulekabila ukwishiba ifya kucita ne nshita lintu filekabilwa ukucitwa. Tulingile ukukwata icibelesho ca kutontonkanishisha libela, ukumona ifyo twingacita nga kwabako ifya kushingilisha. Na kabili tulingile ukuitemenwa ukuputulako imibombele imo ku kupeela inshita ku mibombele imbi iyacilapo kucindama, pamo ngo kupekanishisha ukulongana, ubutumikishi bwa mwi bala, ne mibombele imbi iya teokrasi.
7 Tulefwaya ukuba nga Shifwe wa ku muulu, Yehova Lesa, uutusambilisha ukuti “ku cintu conse kwabe nshita iyalingwa.” (Luk. Mil. 3:1) Pa kubomfya bwino inshita yesu, kuti ‘twafishapo bukapyunga bwesu.’—2 Tim. 4:5.