Ifipempu fya Kubwelelamo Ifitunguluka Fifwaya Ukusambilisha kwa Kufumamo Cimo
1 Ifipempu fya kubwelelamo fyaba lubali lwakatama kabili ulwa kulengo buseko ulwa butumikishi bwesu ubwa mwi bala. Mulandu nshi tulingile ukuba aba mukoosha ukubwelelako ku balesekelela? Ishina lya kwa Yehova lilalengwo kwishibwa kabili uyu mulimo wa kupanga abasambi ulamucindika, kabili abatiina Lesa balaafwiwa ukusanga inshila ya ku mweo. (2 Kor. 2:17–3:3) Ukwishiba ukuti ukushishiwa kwe shina lya kwa Yehova ne myeo ya bambi fyalibimbwamo kulingile ukututuninkisha ukupekanya bwino ilyo tushilabwelelako.
2 Kasambilisha musuma akaafwa umusambi ukulundulukila pa citendekelo ico aimike kale kale. Kwati fye fintu kasambilisha wa ku sukulu alundulwila pa kwishiba uko abasambi banonka mu bumi bwa cila bushiku, tulingile ukukonkelela ukutandala kwesu ukwa kubalilapo mu kuba no kulandapo kwalundwapo pa lwa mutwe umo wine. Ici citungulula ku kutwalilila kwe tontonkanyo no kutontonkanya uko kuya kulelundulukilako.
3 Lintu wabwelelako pa numa ya kushalika broshuwa wa “Bushe Lesa mu Cituntulu Alatusakamana?” kuti wasanga amashiwi yakonkapo ukuba aya maka:
◼ “Ilyo namutandalile umuku wafumako, twalelanshanya pa ‘nshiku sha kulekelesha’ ishalumbulwa muli Baibolo na cintu shipilibula kuli ifwe. Kuti pambi mwatwishika ifyo twaishiba ukuti tuleikala mu nshiku sha kulekelesha. (2 Tim. 3:1) Abasambi ba kwa Yesu baalefwaisha icasuko kuli ici cipusho. [Belenga Mateo 24:3.] Mu casuko cakwe, Yesu alondolwele imibele iyo tulemona mpanga yonse ilelo. Iyi isanshamo ukumanama no lukaakala pa cipimo cishatala acimonwapo.” Alwila ukusakamana ku lubali lwa cishibilo ulwalandwapo mu maparagrafu 3 na 4 pe bula 19. Alwila ukusakamana ku mbali shimbi isha cishibilo mu maparagrafu 5 ukufika ku 8 pe bula 20. Mwebe ifyo kuti waitemenwa ukubwelelako no kwasuka ifipusho ifyaipushiwa pa nkupo ya broshuwa.
4 Pa kukonkelela ubuseko uko washile broshuwa wa “Cinshi Caba Imifwaile ya Bumi—Ni Shani Fintu Wingaisanga?” kuti pambi wasoso kuti:
◼ “Nalefwaisha sana ukuti tukakumane na kabili no kulanshanya na kabili pa lwa mifwaile ya kubela abomi. Ndemona tulesuminishanya ukuti Lesa afwaile fyo tuleikala pali lino isonde mu mibele ya nsansa no mutende ukucila imibele ya cimfulumfulu iyo twabamo ilelo. Bushe muleti akafikilisha ubulayo bwakwe?” Leka asuke. Belenga Esaya 55:11, kabili lyene lanshanyeni pa matontonkanyo yali mu maparagrafu 25 ukufika ku 27 pe bula 30. Mwebe ifyo alingile ukukwata isambililo lya Baibolo pantu e nshila yawamisha iya kusangilamo imifwaile isuma iya mu bumi.
5 Pa kukonkelela ubuseko bwalangilwe muli broshuwa wa “Ipakishe Ubumi pe Sonde kuli Pe na Pe!” kuti wamulangisha broshuwa na kabili no kusoso kuti:
◼ “Twalandile pa lwa calo cayemba icilangilwe pa nkupo ya uyu broshuwa. Ndefwaya ukumushimikilako umulandu icitetekelo muli Yesu Kristu cabela icakatamisha nga nshi ku bantu abalefwaya ukwikala muli ci calo.” Kupukula pa cikope calenga 41, no kubelenga Esaya 9:6. Losha ku cikope calenga 62, no kubelenga Yohane 3:16, ukukomaila pa kukabila kwa kuba ne cumfwila. Londolola ukuti Inte sha kwa Yehova shileafwa abantu ukusambilila ukubelesha icitetekelo ukupitila mu kusambilila Baibolo no kwesha ukwikala mu kumfwana no kufunda kwa iko.
6 Pa numa ya cipempu ca kubwelelamo cimo na cimo, pimununa imipeelele yobe no kumona umo wingawamyako. Ipushe auti: Bushe paciba ico nacikwata mu muntontonkanya icashininkishiwa ica kusosa? Bushe ukusakamana kwandi kwacitonta fye pali Baibolo? Bushe nacilundulwila pa citendekelo nashile pa kutandala kwa kubalilapo? Bushe imipeelele yandi yaciba mu nshila ya kuti kuti yatungulula kwi sambililo lya Baibolo? Ifyasuko fyobe kuli ifi fipusho nga ni ‘Ee,’ ninshi cili kwebekesha kwa kuti uletukuta ukuba kasambilisha musuma uwa Cebo ca kwa Lesa.