Bafweni Ukutendeka Ukubomba na Kabili
1 Pa kwishiba ubusanso bwa ku mupashi ubwingabako ku Bena Kristu banankwe, umutumwa Paulo alembele ukuti: “Mwaishibe nshita ino ukuti e nshita ya kushibuka mu tulo; pantu ipusukilo nalipalama ukucila ilyo twatendeke ukutetekela.” (Rom. 13:11) Paulo alisakamikwe pali bamunyina abo baleshipula lwa ku mupashi; alefwaisha ukubabuukulula pa kuti batendeke ukubomba na kabili.
2 Mu cine cine kuti casoswa ukuti ubushiku bwa ici calo cikote nabulunduluka kabili ukucelebuka kwa calo cipya kuli fye pa ntanshi yesu. (Rom. 13:12) Twalikwata umulandu usuma uwa kubela abasakamikwa pa lwa bamunyinefwe abaleka ukubishanya na ifwe pamo nga bakashimikila ba mbila nsuma. Umwaka wa mulimo wapwile, mu Zambia mweka fye, ukucila pali bakasabankanya 2,000 balipuupuutwilwe. Ni shani fintu twingaafwa bambi abanaka ukutendeka ukubombela Yehova na kabili?
3 Cintu Baeluda Bengacita: Abengi abanaka tabaasha icine iyo; baleka fye ukushimikila pa mulandu wa kufuupulwa, amafya ya pa lwabo, ifikwatwa, nelyo amasakamika yambi aya bumi. (Luka 21:34-36) Nga cingacitika, caliwamishapo ukubaafwa ilyo tabalanaka. Kalemba wa pa cilonganino alingile ukucinkulako katungulula we Sambililo lya Citabo pa Cilonganino lintu kasabankanya aba uwa manshintula mu kucita lipoti imibombele ya mwi bala. Kuti batantika ukutandala kwa bucemi. Balingile ukwishiba umulandu ukalamba uwa ubo bwafya na fintu bengafwilisha.—Moneni Ulupungu lwa kwa Kalinda ulwa September 15, 1993, amabula 20-3.
4 Fintu Bambi Bengaafwa: Fwe bengi twalishibapo umo uwanaka. Nakalimo muntu wapalamishe kuli ifwe inshita ya ku numa. Cinshi twingacita ku kumwaafwa? Mulandu nshi tushingashokelako ku kutandala ukwipi fye. Mwebeni ukuti mulamufuluka. Beni ne cimwemwe kabili aba kukuulilila. Lumbuleni ukuti muli abayangwako ukwabula ukutubulula ukuti ali uwanaka lwa ku mupashi. Shimikeni ifya kukumanya fya kukuulilila nelyo ifintu fisuma fimbi ifyo icilonganino cilepwishishisha. Mu kucincimuka mwebeni pa lwe Bungano lya Citungu ilya “Inkombe sha Mutende wa Bukapepa,” kabili mukoselesheni ukusangwako. Ukubishanya ne cilonganino na kabili kuti kwamwaafwa ukucila icili conse cimbi. Mwebeni ifyo kuti mwaendela capamo nankwe pa kuya ku kulongana. Ishibisheni baeluda pa lwa fintu ayankwileko.
5 Lintu uwanakile atendeka ukusangwa ku kulongana, nga fintu cingenekelwa takayumfwe bwino lintu alekumanya bambi abo aishibe inshita ya ku numa. Mwimwipusha ukuti, “Ni kwi mwaile?” Mu cifulo ca ico, mulengeni eshibe ukuti nasengelwa. Musanshenimo mu kulanshanya. Mulondololeni kuli abo ashaishiba. Ikaleni nankwe mu kati ka kulongana, ukushininkisha ukuti nakwata icitabo ca lwimbo ne fitabo fimbi ifilesambililwamo. Mukoselesheni ukubwela na kabili, kabili mwebeni ifyo kuti mwamwaafwa nga cili icakabilwa.
6 Pa kukwata icitemwishi ca cikabilila kuli abo baluba, Yehova na Yesu balasekelela lintu aba musango yo bapuupuutuka lwa ku mupashi. (Mal. 3:7; Mat. 18:12-14) Kuti twakwata ubuseko bumo bwine nga ca kuti twatunguluka mu kwaafwa bambi ukutendeka ukubombela Yehova na kabili.