Umukululo wa Fipusho

◼ Cinshi cilingile ukucitwa lintu kalanda wa lyashi lya cintubwingi afilwa ukufika mu nshita ku kulongana?

Inshita shimo shimo, kulaba ificitika ifingalenga munyina ulelanda ilyashi ukucelwa. Nga kuli umulandu wa kucetekele fyo alafika mu kwangufyanya, baeluda kuti bapingulapo ukutendeka ne Sambililo lya Ulupungu lwa kwa Kalinda; lyene pa numa Ukulongana kwa Cintubwingi kuti kwakonkapo. Ni shani nga camoneka fye ukuti kalanda taise? Napamo umo uwa bakalanda ba pa myenu kuti alanda ilyashi ilyo aapekanya kale.

Takuba ubu bwafya ilingi line nga ca kuti kwaliba ukutantikila libela ukwasakamanisha. Uutantika amalyashi ya cintubwingi alingile ukucinkulako kalanda ilyo kucili napamo umulungu umo. Kuti amucinkulako ulwa nshita ya kulongana, ukwabela Ing’anda ya Bufumu na nambala ya foni, no kumulangilila bwino bwino ifya kwenda pa kuti talubile. Kalanda afwile ukumfwikisha ifi fyonse. Alingile ukukatamika uyu mulimo, ukuteulula ifya pa lwakwe ifilekabila ukuteululwa pa kuti afikilishe ici cishingamo. Nga kwaimako fimo ifingalenga ukukanafikilisha ulubali, alingile ukulanda no utantika amalyashi ilyo line pa kuti apyanikepo umbi. Kufwile ukuba ukubombesha pa kusengauka ukupyanikapo ilyo inshita naipwa. Nga munyina aishiba ukuti alacelwako panono, alingile ukushininkisha ukuti atuma foni nelyo imilai pa kuti bamunyina beshibe ica kucita.

Ukutesekesha imbali sha malyashi ya Baibolo, ukutantikila libela no kucinkulako, no kwangalila kwasakamanisha kuti kwashininkishe fyo icilonganino cileipakisha amalyashi ya kunonsha cila mulungu.